‘ನನ್ನ ಹೆಂಡ್ತಿಗೂ ಡಕೋಟ.. ನಿನ್ನ ಹೆಂಡ್ತಿಗೂ..’: ಎ.ನಾರಾಯಣಸ್ವಾಮಿ ವ್ಯಂಗ್ಯ

ಚಿತ್ರದುರ್ಗ: ‘ಹೇ ಹುಲಿಯಾ... ನಿನಗೂ ಫ್ರೀ... ನನಗೂ ಫ್ರೀ’ ಎಂದು ಚುನಾವಣೆ ಸಮಯದಲ್ಲಿ ಹೇಳಿದ್ದ ಸಿದ್ದರಾಮಯ್ಯ ಈಗ ಮುಖ್ಯಮಂತ್ರಿ ಆದ ಬಳಿಕ ‘ನನ್ನ ಹೆಂಡತಿಗೂ ಡಕೋಟ.. ನಿನ್ನ ಹೆಂಡತಿಗೂ ಡಕೋಟ ಬಸ್‌... ಎಂಬುದಾಗಿ ಹೇಳುತ್ತಿದ್ದಾರೆ’ ಎಂದು ಕೇಂದ್ರ ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ಖಾತೆ ರಾಜ್ಯ ಸಚಿವ ಎ.ನಾರಾಯಣಸ್ವಾಮಿ ವ್ಯಂಗ್ಯವಾಡಿದರು.

ಎಲ್ಲ ಬಸ್‌ಗಳಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣ ಎಂದು ಹೇಳಿದ್ದ ಸಿದ್ದರಾಮಯ್ಯ ಇದೀಗ ಷರತ್ತು ವಿಧಿಸಿದ್ದು, ‘ಡಕೋಟ ಬಸ್‌’ಗಳಲ್ಲಿ ಮಾತ್ರ ಅವಕಾಶ ನೀಡಿದ್ದಾರೆ. ಈ ಮೂಲಕ ಜನರನ್ನು ವಂಚಿಸಿದ್ದಾರೆ ಎಂದು ಅವರು ಆರೋಪಿಸಿದರು. 

ನಾರಾಯಣಸ್ವಾಮಿ ಹೇಳಿಕೆಗೆ ತಿರುಗೇಟು ನೀಡಿದ ಸಚಿವ ಎಂ.ಬಿ.ಪಾಟೀಲ, ‘ಸಾಮಾನ್ಯ ಬಸ್‌ಗಳಲ್ಲಿ ಉಚಿತ ಪ್ರಯಾಣಕ್ಕೆ ಅವಕಾಶ ಕಲ್ಪಿಸಲಾಗಿದೆ. ರಾಜ್ಯದಲ್ಲಿ ನೀವು ಅಧಿಕಾರದಲ್ಲಿ ಇದ್ದಾಗಲೂ ಶೇ 94ರಷ್ಟು ಸಾಮಾನ್ಯ ಬಸ್‌ಗಳಿದ್ದವು. ಈಗ ಮಾತ್ರ ಅವು ನಿಮಗೆ ಡಕೋಟ ಥರ ಕಾಣುತ್ತಿವೆಯೇ?’ ಎಂದು ಪ್ರಶ್ನಿಸಿದರು.