ಸಿಇಟಿ: 13,653 ಎಂಜಿನಿಯರಿಂಗ್‌ ಸೀಟು ಉಳಿಕೆ

ಬೆಂಗಳೂರು: ಎರಡನೇ ಸುತ್ತಿನ ಮುಂದುವರಿದ ಸೀಟು ಹಂಚಿಕೆಯ ಫಲಿತಾಂಶ ಪ್ರಕಟಣೆ ನಂತರವೂ 13,653 ಎಂಜಿನಿಯರಿಂಗ್‌ ಸೀಟುಗಳು ಉಳಿದಿವೆ.

ಎಂಜಿನಿಯರಿಂಗ್‌, ಕೃಷಿ, ಪಶುವೈದ್ಯಕೀಯ ಸೇರಿದಂತೆ ವಿವಿಧ ವೃತ್ತಿಪರ ಕೋರ್ಸ್‌ಗಳ 1,11,294 ಸೀಟುಗಳಲ್ಲಿ 85,259 ಸೀಟುಗಳು ಹಂಚಿಕೆಯಾಗಿವೆ. 26,036 ಸೀಟು ಉಳಿದಿವೆ. ಎಂಜಿನಿಯರಿಂಗ್‌ನ 79,907 ಸೀಟುಗಳಲ್ಲಿ 66,254 ಸೀಟುಗಳು ಹಂಚಿಕೆಯಾಗಿವೆ. ಸಿವಿಲ್‌, ಮೆಕ್ಯಾನಿಕಲ್‌, ಎಲೆಕ್ಟ್ರಾನಿಕ್ಸ್‌ ಎಂಜಿನಿಯರಿಂಗ್‌ ವಿಭಾಗದಲ್ಲಿ ಹೆಚ್ಚು ಸೀಟುಗಳು ಉಳಿದಿವೆ ಎಂದು  ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕ ಎಚ್‌. ಪ್ರಸನ್ನ ಹೇಳಿದ್ದಾರೆ.

ಫಾರ್ಮಸಿ ವಿಭಾಗದಲ್ಲಿ 401, ಯೋಗ ನ್ಯಾಚುರೋಪತಿ 125, ಕೃಷಿ (ಪ್ರಾಕ್ಟಿಕಲ್‌) 134 ಸೀಟುಗಳು ಹಂಚಿಕೆಗೆ ಬಾಕಿ ಇವೆ. ಎರಡನೇ ಮುಂದುವರಿದ ಸುತ್ತಿನಲ್ಲಿ ಸರ್ಕಾರಿ ಕೋಟಾದ ಸೀಟುಗಳನ್ನು ಮಾತ್ರ‌ ಕೆಇಎ ಮೂಲಕ ಹಂಚಿಕೆ ಮಾಡಲಾಗಿದೆ. ಸರ್ಕಾರದ ನಿರ್ದೇಶನದಂತೆ ಖಾಸಗಿ ಕೋಟಾದ ಸೀಟುಗಳನ್ನು ಹಂಚಿಕೆ ಮಾಡಿಲ್ಲ. ಹಾಗಾಗಿ, ನರ್ಸಿಂಗ್‌ನಲ್ಲಿ 11,673, ಸೀಟು ಉಳಿದಿವೆ ಎಂದು ಮಾಹಿತಿ ನೀಡಿದ್ದಾರೆ.