ಚಾಮುಂಡಿಬೆಟ್ಟದ 115 ಅಂಗಡಿಗಳ ತೆರವು: ವ್ಯಾಪಾರಸ್ಥರ ತೀವ್ರ ಆಕ್ರೋಶ

ಮೈಸೂರು:ಚಾಮುಂಡಿಬೆಟ್ಟದಲ್ಲಿನ‌ 250 ಅಂಗಡಿಗಳ ಪೈಕಿ 115 ಅಂಗಡಿಗಳನ್ನು ಜಿಲ್ಲಾಡಳಿತ ಗುರುವಾರ ಬೆಳಿಗ್ಗೆ 6.30ರಿಂದ ತೆರವು ಕಾರ್ಯಾಚರಣೆ ಕೈಗೊಂಡಿದೆ‌.

ಅಂಗಡಿಗಳ ತೆರವಿಗೆ ವ್ಯಾಪಾರಸ್ಥರಿಂದ ಭಾರಿ ವಿರೋಧ ವ್ಯಕ್ತವಾಗಿದೆ. ಹೀಗಾಗಿ ಸುಮಾರು 300ಕ್ಕೂ ಅಧಿಕ ಪೊಲೀಸರ ಭದ್ರತೆಯನ್ನು ಕಲ್ಪಿಸಲಾಗಿದೆ.

5 ಜೆಸಿಬಿಗಳು ಬೆಟ್ಟದಸಾರ್ವಜನಿಕ ರಸ್ತೆಯಲ್ಲಿ ಅಕ್ರಮವಾಗಿ ನಿರ್ಮಿಸಲಾಗಿದ್ದ ಅಂಗಡಿ ಮಳಿಗೆಗಳನ್ನು ತೆರವುಗೊಳಿಸುತ್ತಿವೆ.
ತಹಶೀಲ್ದಾರ ರಮೇಶಬಾಬು ನೇತೃತ್ವದ ಅಧಿಕಾರಿಗಳ ತಂಡ ಕಾರ್ಯಾಚರಣೆಯಲ್ಲಿದೆ.

ಈ ಕುರಿತು'ಪ್ರಜಾವಾಣಿ'ಗೆ ಪ್ರತಿಕ್ರಿಯೆ ನೀಡಿದ ತಹಶೀಲ್ದಾರ್ ರಮೇಶಬಾಬು, '47 ಮಂದಿಗೆ ಈಗಾಗಲೇ ಹೊಸದಾಗಿ ನಿರ್ಮಿಸಲಾಗುತ್ತಿರುವ ಅಂಗಡಿ ಮಳಿಗೆಗಳ ಹಕ್ಕುಪತ್ರವನ್ನು ನೀಡಲಾಗಿದೆ. ಇನ್ನುಳಿದವರಿಗೂ ದಸರೆ ಮುಗಿದ ನಂತರ ನೀಡಲಾಗುವುದು. ರಾತ್ರಿಯೆ ಅಂಗಡಿ ಮಾಲೀಕರಿಗೆ ತೆರವು ಸಂಬಂಧ ಸೂಚನೆ ನೀಡಲಾಗಿತ್ತು. ಅಂಗಡಿಯಲ್ಲಿದ್ದ ಪರಿಕರಗಳನ್ನು ವ್ಯಾಪಾರಸ್ಥರು ನಸುಕಿನ ಹೊತ್ತಿಗೆ ಖಾಲಿ ಮಾಡಿದ್ದರು. ಸದ್ಯ ಖಾಲಿ ಅಂಗಡಿಗಳನ್ನಷ್ಟೆ ತೆರವು ಮಾಡಲಾಗುತ್ತಿದೆ ಎಂದು ತಿಳಿಸಿದ್ದಾರೆ.