ಅತಿಥಿ ಉಪನ್ಯಾಸಕರಿಗೆ ‘ಕೌನ್ಸಲಿಂಗ್‌’ ಮುಕ್ತಿ

ಬೆಂಗಳೂರು: ಸರ್ಕಾರಿ ಪ್ರಥಮ ದರ್ಜೆ ಕಾಲೇಜುಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅತಿಥಿ ಉಪನ್ಯಾಸಕರು ಕೌನ್ಸೆಲಿಂಗ್‌ಗೆ ಹಾಜರಾಗದೆ 2024–25ನೇ ಶೈಕ್ಷಣಿಕ ಸಾಲಿನಲ್ಲೂ ಅದೇ ಸ್ಥಳಗಳಲ್ಲಿ ಮುಂದುವರಿಯಬಹುದು.

2023–24ನೇ ಸಾಲಿನ ಅವಧಿ ಬಹುತೇಕ ಕಾಲೇಜುಗಳಲ್ಲಿ ಮುಕ್ತಾಯವಾಗಿದ್ದು, ಅತಿಥಿ ಉಪನ್ಯಾಸಕರನ್ನು ಸೇವೆಯಿಂದ ಬಿಡುಗಡೆ ಮಾಡಲಾಗಿದೆ. ಮುಂದಿನ ಶೈಕ್ಷಣಿಕ ಸಾಲಿಗೆ ಮತ್ತೆ ಅವರು ಅರ್ಜಿ ಸಲ್ಲಿಸಬೇಕಿದ್ದರೂ, ಈಗಾಗಲೇ ಕೆಲಸ ಮಾಡುತ್ತಿರುವ ಕಾಲೇಜುಗಳಲ್ಲೇ ಮುಂದುವರಿಯಲು ಇಚ್ಚಿಸುವವರು ತಾವು ಸಲ್ಲಿಸುವ ಅರ್ಜಿಯಲ್ಲೇ ಹಾಲಿ ಕೆಲಸ ಮಾಡುತ್ತಿರುವ ಸ್ಥಳ ನಮೂದಿಸಿದರೆ ಸಾಕು. ಅಂಥವರು ಕೌನ್ಸೆಲಿಂಗ್‌ನಲ್ಲಿ ಭಾವಹಿಸುವ ಅಗತ್ಯವಿಲ್ಲ ಎಂದು ಕಾಲೇಜು ಶಿಕ್ಷಣ ಇಲಾಖೆ ಹೇಳಿದೆ.

ಬೋಧನಾ ಅವಧಿ ಇಲ್ಲದಿದ್ದರೆ ಬೇರೆ ಕಾಲೇಜು: 

ವಿವಿಧ ಕಾಲೇಜುಗಳಲ್ಲಿ ಕೆಲಸ ಮಾಡುತ್ತಿರುವವರು ಆ ಕಾಲೇಜು ತೊರೆದು ಬೇರೆ ಕಾಲೇಜುಗಳಿಗೆ ಹೋಗುವುದಾದರೆ, ಕಾಯಂ ಅಧ್ಯಾಪಕರು ನೇಮಕವಾಗಿ, ವರ್ಗಾವಣೆಗೊಂಡು ಬಂದಾಗ ಬೋಧನಾ ಅವಧಿ ಕಡಿಮೆಯಾದರೆ ಅಂತಹ ಕಾಲೇಜುಗಳಲ್ಲಿ ಕೆಲಸ ಮಾಡುತ್ತಿರುವ ಅತಿಥಿ ಉಪನ್ಯಾಸಕರು ಕೌನ್ಸೆಲಿಂಗ್‌ನಲ್ಲಿ ಭಾಗವಹಿಸಿ, ಬೋಧನಾ ಅವಧಿ ಲಭ್ಯವಿರುವ ಕಾಲೇಜುಗಳನ್ನು ಆಯ್ಕೆ ಮಾಡಿಕೊಳ್ಳಬಹುದು. 

ಇದೇ ಆ. 6ಕ್ಕೆ ಅತಿಥಿ ಉಪನ್ಯಾಸಕರ 10 ತಿಂಗಳ ಅವಧಿ ಮುಕ್ತಾಯವಾಗಿತ್ತು. ಎಲ್ಲರನ್ನೂ ಆ. 7ರಂದು ಬಿಡುಗಡೆ ಮಾಡಲಾಗಿತ್ತು. ಆದರೆ, ಬಹುತೇಕ ವಿಶ್ವವಿದ್ಯಾಲಯಗಳ ವ್ಯಾಪ್ತಿಯ ಕಾಲೇಜುಗಳಲ್ಲಿ ಎರಡು, ನಾಲ್ಕು ಹಾಗೂ ಆರನೇ ಸೆಮಿಸ್ಟರ್‌ಗಳು ಪೂರ್ಣಗೊಳ್ಳದ ಕಾರಣ ಅಂತಹ ಕಾಲೇಜುಗಳಲ್ಲಿ ಮತ್ತೆ ಆ. 8ರಿಂದ ಕೆಲಸಕ್ಕೆ ವರದಿ ಮಾಡಿಸಿಕೊಳ್ಳಲಾಗಿದೆ. ಉಳಿದವರ ಮರು ಪ್ರವೇಶಕ್ಕೆ ಮುಂದಿನ ವಾರ ಸುತ್ತೋಲೆ ಹೊರಡಿಸಲಾಗುತ್ತದೆ ಎಂದು ಕಾಲೇಜು ಶಿಕ್ಷಣ ಇಲಾಖೆ ಅಧಿಕಾರಿಗಳು ಹೇಳಿದ್ದಾರೆ.

ಹೊಸಬರಿಗಷ್ಟೇ ಕೌನ್ಸೆಲಿಂಗ್:

ಪ್ರಸ್ತುತ ಕೆಲಸ ಮಾಡುತ್ತಿರುವ ಅತಿಥಿ ಉಪನ್ಯಾಸಕರು ಆಯ್ಕೆ ಮಾಡಿಕೊಂಡ ನಂತರವೂ ಬೋಧನಾ ಅವಧಿ ಉಳಿದರೆ ಮಾತ್ರ ಅಂತಹ ಕಾಲೇಜುಗಳಿಗೆ ಹೊಸಬರು ಕೌನ್ಸಿಲಿಂಗ್‌ನಲ್ಲಿ ಭಾಗವಹಿಸಿ ಸ್ಥಳ ಆಯ್ಕೆ ಮಾಡಿಕೊಳ್ಳಬಹುದು. 

ಗ್ರಾಮೀಣ ಅತಿಥಿಗಳಿಗೆ ‘ಕಾಯಂ’ ಸಂಕಷ್ಟ:

1,242 ಸಹಾಯಕ ಪ್ರಾಧ್ಯಾಪಕರ ನೇಮಕಾತಿ ಪ್ರಕ್ರಿಯೆ ಅಂತಿಮ ಹಂತ ತಲುಪಿದ್ದು, ಒಂದೆರಡು ತಿಂಗಳಲ್ಲಿ ಅವರಿಗೆ ಸ್ಥಳ ನಿಯೋಜನೆ ಆದೇಶ ದೊರೆಯಲಿದೆ. ನಿಯಮದಂತೆ ಸೇವೆಗೆ ಸೇರಿದ ನಂತರ ಗ್ರಾಮೀಣ ಪ್ರದೇಶದ ಕಾಲೇಜುಗಳಲ್ಲಿ (‘ಇ’ ವಿಭಾಗ) ಕೆಲಸ ಮಾಡಬೇಕು. ಅವರಿಗೆ ಆದೇಶ ನೀಡಿದರೆ ಅಂತಹ ಕಾಲೇಜುಗಳಲ್ಲಿನ 1,500ರಷ್ಟು ಅತಿಥಿ ಉಪನ್ಯಾಸಕರು ಕೆಲಸ ಕಳೆದುಕೊಳ್ಳಲಿದ್ದಾರೆ.