ಗ್ರಾಹಕರ ದತ್ತಾಂಶ ನಗದೀಕರಣ: ಟೆಂಡರ್ ಹಿಂಪಡೆದ ಐಆರ್‌ಸಿಟಿಸಿ
ನವದೆಹಲಿ: ಗ್ರಾಹಕರ ದತ್ತಾಂಶದ ನಗದೀಕರಣಕ್ಕಾಗಿ ಕರೆದಿದ್ದ ಟೆಂಡರ್ ಅನ್ನು ಭಾರತೀಯ ರೈಲ್ವೆ ಕೇಟರಿಂಗ್ ಹಾಗೂ ಪ್ರವಾಸೋದ್ಯಮ ನಿಗಮ (ಐಆರ್‌ಸಿಟಿಸಿ) ಹಿಂಪಡೆದಿದೆ.
ಗ್ರಾಹಕರ ದತ್ತಾಂಶದ ಸುರಕ್ಷತೆಯನ್ನು ನಿರ್ಲಕ್ಷಿಸಲಾಗುತ್ತಿದೆ ಎಂಬ ವ್ಯಾಪಕ ಟೀಕೆಗಳು ವ್ಯಕ್ತವಾದ ಬೆನ್ನಲ್ಲೇ, ಐಆರ್‌ಸಿಟಿಸಿ ಈ ಕ್ರಮ ಕೈಗೊಂಡಿದೆ.
ಕೇಂದ್ರ ಸರ್ಕಾರವು ‘ವೈಯಕ್ತಿಕ ಮಾಹಿತಿ ಸಂರಕ್ಷಣಾ ಮಸೂದೆ–2018’ ಅನ್ನು ಹಿಂಪಡೆದಿದೆ. ಈ ಕಾರಣಕ್ಕೆ ಗ್ರಾಹಕರ ದತ್ತಾಂಶ ನಗದೀಕರಣಕ್ಕಾಗಿ ಕರೆದಿದ್ದ ಟೆಂಡರನ್ನು ಹಿಂಪಡೆಯಲಾಗಿದೆ ಎಂದು ಐಆರ್‌ಸಿಟಿಸಿಯು ಷೇರು ವಿನಿಮಯ ಕೇಂದ್ರಕ್ಕೆ ತಿಳಿಸಿದೆ.
ಪ್ರಯಾಣಿಕರು, ಪ್ರಯಾಣದ ದರ್ಜೆ, ಪಾವತಿ ವಿಧಾನ, ಸರಕು ಸೇವೆಗಳು ಮತ್ತು ವ್ಯಾಪಾರ ಮಾದರಿ ಗುರುತಿಸುವಿಕೆ,ಹೆಸರು, ವಯಸ್ಸು, ಮೊಬೈಲ್ ಸಂಖ್ಯೆ, ಲಿಂಗ, ವಿಳಾಸ, ಇಮೇಲ್-ಐಡಿ, ಪಾಸ್‌ವರ್ಡ್‌ ಸೇರಿದಂತೆ ಗ್ರಾಹಕರ ದತ್ತಾಂಶದ ನಗದೀಕರಣಕ್ಕೆ ಸಲಹೆ ನೀಡಲು ಕನ್ಸಲ್ಟಂಟ್‌ ನೇಮಕಕ್ಕಾಗಿ ಜುಲೈ 29 ರಂದು ಐಆರ್‌ಸಿಟಿಸಿ ಇ-ಟೆಂಡರ್ ಕರೆದಿತ್ತು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.