ಯುಜಿನೀಟ್‌: ಮಾಪ್‌ಅಪ್‌ನಲ್ಲಿ 596 ಸೀಟು

ಬೆಂಗಳೂರು: ಯುಜಿನೀಟ್‌–2024ರ ಆನ್‌ಲೈನ್‌ ಮಾಪ್‌ಅಪ್‌ ಸುತ್ತಿನಲ್ಲಿ 596 ವೈದ್ಯಕೀಯ ಸೀಟುಗಳು ಲಭ್ಯವಿವೆ. ಸರ್ಕಾರಿ ಕೋಟಾ–7, ಖಾಸಗಿ ಕೋಟಾ–135, ಮ್ಯಾನೇಜ್‌ಮೆಂಟ್‌ ಕೋಟಾ–453 ಮತ್ತು ಅನಿವಾಸಿ ಭಾರತೀಯ ಕೋಟಾ–1 ಸೀಟು ಲಭ್ಯವಿದೆ ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ಹೇಳಿದೆ.

ಈ ಮಾಪ್‌ಅಪ್‌ ಸುತ್ತಿನಲ್ಲಿ ಭಾಗವಹಿಸಲು ಇಚ್ಛಿಸುವ ಅಭ್ಯರ್ಥಿಗಳು ಇದೇ 5ರಿಂದ 8ರವರೆಗೆ ವೈದ್ಯಕೀಯ ಕೋರ್ಸ್‌ ಶುಲ್ಕ ಠೇವಣಿ ಪಾವತಿಸಬೇಕು. ಎರಡನೇ ಸುತ್ತಿನ ಕಾಷನ್‌ ಡೆಪಾಸಿಟ್‌ ಪಾವತಿಸಿದ್ದು ಯಾವುದೇ ವೈದ್ಯಕೀಯ ಸೀಟು ಹಂಚಿಕೆಯಾಗದಿದ್ದರೆ, ಅಷ್ಟು ಮೊತ್ತವನ್ನು ಕಡಿತ ಮಾಡಿಕೊಂಡು ಉಳಿದ ಠೇವಣಿ ಪಾವತಿ ಮಾಡಬೇಕು. ಅವರು ತಮ್ಮ ಆಯ್ಕೆಗಳನ್ನು ದಾಖಲಿಸಲು ಅ.7ರಿಂದ 14ರವರೆಗೆ ಅವಕಾಶ ನೀಡಲಾಗುವುದು ಎಂದು ಪ್ರಾಧಿಕಾರ ತಿಳಿಸಿದೆ.

ಮಾಪ್‌ಅಪ್‌ ಸುತ್ತಿನಲ್ಲಿ ಸೀಟು ಹಂಚಿಕೆಯಾಗಿದ್ದು ಕಾಲೇಜಿಗೆ ಪ್ರವೇಶ ಪಡೆಯದೇ ಇದ್ದರೆ ಅಥವಾ ಸೀಟನ್ನು ರದ್ದುಗೊಳಿಸಲು ಇಚ್ಛಿಸಿದಲ್ಲಿ ಅವರು ಪಾವತಿಸಿರುವ ವೈದ್ಯಕೀಯ ಕೋರ್ಸ್‌ ಶುಲ್ಕ ಠೇವಣಿಯನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗುವುದು. ದಂಡವನ್ನೂ ವಿಧಿಸಲಾಗುವುದು ಎಂದು ಪ್ರಾಧಿಕಾರ ಹೇಳಿದೆ.