ರಾಜ್ಯದಲ್ಲಿ ಬೀದಿದೀಪ ನಿರ್ವಹಣೆಗೆ ಮೀಟರ್‌

ಮಂಡ್ಯ: ರಾಜ್ಯದಲ್ಲಿ ಆಯ್ದ 200 ಗ್ರಾಮ ಪಂಚಾಯಿತಿಗಳಲ್ಲಿ ಬೀದಿದೀಪಗಳಿಗೆ ಪ್ರಾಯೋಗಿಕವಾಗಿ ಮೀಟರ್‌ ಅಳವಡಿಸಲು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್‌ ಇಲಾಖೆ ಮುಂದಾಗಿದೆ. 

ವಿದ್ಯುತ್‌ ಬಳಕೆಯ ಮೇಲೆ ನಿಗಾ ವಹಿಸುವುದು ಮತ್ತು ವೆಚ್ಚ ಕಡಿಮೆ ಮಾಡುವುದೇ ಪ್ರಮುಖ ಉದ್ದೇಶ. ಅತಿ ಹೆಚ್ಚು ವಿದ್ಯುತ್‌ ಶುಲ್ಕ ಪಾವತಿಸುವ ಪಂಚಾಯಿತಿಗಳ ವಿವರಗಳನ್ನು ಆರು ‘ಎಸ್ಕಾಂ’ಗಳಿಂದ ಪಡೆದು ಪಂಚಾಯಿತಿಗಳನ್ನು ಆಯ್ಕೆ ಮಾಡಲಾಗಿದೆ. ಯೋಜನೆಗೆ ಆಡಳಿತಾತ್ಮಕ ಅನುಮೋದನೆಯೂ ದೊರೆತಿದೆ. 

ಯೋಜನೆಯನ್ನು ಕಾರ್ಯರೂಪಕ್ಕೆ ತರಲು ಆಯಾ ಜಿಲ್ಲೆಯ ಎಸ್ಕಾಂಗೆ ಪ್ರಸ್ತಾವ ಸಲ್ಲಿಸಬೇಕು. ಗ್ರಾಮವಾರು ಮೀಟರ್‌ ಅಳವಡಿಸಲು ಅಂದಾಜು ಪಟ್ಟಿಯನ್ನು ತಯಾರಿಸಿ, ಕ್ರೋಡೀಕೃತ ವರದಿಯನ್ನು ಸಲ್ಲಿಸುವಂತೆ ಇಲಾಖೆಯ ಆಯುಕ್ತರು ಸೂಚಿಸಿದ್ದಾರೆ.

ಜಟಾಪಟಿಗೆ ಕಾರಣ:

‘ವಿದ್ಯುತ್‌ ಕಂಪನಿಗಳು ಅವೈಜ್ಞಾನಿಕವಾಗಿ ವಿದ್ಯುತ್‌ ಬಿಲ್‌ ನೀಡುತ್ತಿರುವುದರಿಂದ ಹಣ ಪಾವತಿ ದೊಡ್ಡ ಹೊರೆಯಾಗಿದೆ’ ಎಂಬುದು ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗಳ ಆರೋಪ. ‘ಕೆಲವು ಪಂಚಾಯಿತಿಗಳು ₹50 ಲಕ್ಷದಿಂದ ₹1 ಕೋಟಿಯವರೆಗೆ ಬಿಲ್‌ ಬಾಕಿ ಉಳಿಸಿಕೊಂಡಿವೆ. ಇದರಿಂದ ಸಮರ್ಪಕ ವಿದ್ಯುತ್‌ ಪೂರೈಕೆಗೆ ತೊಡಕಾಗಿದೆ’ ಎಂಬುದು ಸೆಸ್ಕ್‌ ಅಧಿಕಾರಿಗಳ ದೂರು. 

ಹಗಲಿನಲ್ಲೂ ಬೀದಿದೀಪ:

‘ಹಲವು ಗ್ರಾಮಗಳಲ್ಲಿ ಸಮರ್ಪಕ ನಿರ್ವಹಣೆ ಕೊರತೆಯಿಂದ ಹಗಲಲ್ಲೂ ಬೀದಿದೀಪಗಳು ಉರಿಯುತ್ತಿವೆ. ಕೆಲವೆಡೆ ಅನಧಿಕೃತವಾಗಿ ಜನ ವಿದ್ಯುತ್‌ ಸಂಪರ್ಕ ಪಡೆಯುತ್ತಿದ್ದಾರೆ. ಹೀಗಾಗಿ ಪಂಚಾಯಿತಿಗಳಿಗೆ ವಿದ್ಯುತ್‌ ಶುಲ್ಕ ಪಾವತಿಸುವುದು ದೊಡ್ಡ ಹೊರೆಯಾಗಿತ್ತು. ಮೀಟರ್‌ ಅಳವಡಿಸಿದರೆ ವಿದ್ಯುತ್‌ ಪೋಲಾಗುವುದನ್ನು ತಪ್ಪಿಸಬಹುದು’ ಎನ್ನುತ್ತಾರೆ ಇಲಾಖೆಯ ಅಧಿಕಾರಿಗಳು.