ಚೀನಾದ ವಾಯವ್ಯ ಭಾಗದಲ್ಲಿ ಪ್ರವಾಹ: 16 ಜನರ ಸಾವು

ಬೀಜಿಂಗ್‌: ಚೀನಾದ ವಾಯವ್ಯ ಭಾಗದ ಕ್ವಿಂಘೈ ಪ್ರಾಂತ್ಯದಲ್ಲಿ ಗುರುವಾರ ದಿಢೀರನೆ ಎದುರಾದ ಪ್ರವಾಹದಿಂದಾಗಿ ಕನಿಷ್ಠ 16 ಜನರು ಮೃತಪಟ್ಟಿದ್ದು, 36 ಜನರು ಕಾಣೆಯಾಗಿದ್ದಾರೆ ಎಂದು ಸ್ಥಳೀಯ ಆಡಳಿತ ತಿಳಿಸಿದೆ.

ಸ್ವಾಯತ್ತ ಕೌಂಟಿಗಳಾದ ‘ಡಾಟಾಂಗ್‌ ಹುಯಿ’ ಮತ್ತು ‘ತು’ ಪ್ರದೇಶದಲ್ಲಿ ಪ್ರವಾಹ ಉಂಟಾಗಿದೆ ಎಂದು ಸರ್ಕಾರಿ ಸ್ವಾಮ್ಯದ ಕ್ಸಿನ್ಹುವಾ ಸುದ್ದಿ ಸಂಸ್ಥೆ ತಿಳಿಸಿದೆ.

ಫ್ರಾನ್ಸ್‌ನಲ್ಲಿ 3 ಸಾವು: ಫ್ರಾನ್ಸ್‌ನ ಕೋರ್ಸಿಕಾ ದ್ವೀಪದಲ್ಲಿ ಗುರುವಾರ ಬೆಳಿಗ್ಗೆ ಬಿರುಗಾಳಿ ಬೀಸಿದ್ದರಿಂದ ಮೂವರು ಮೃತಪಟ್ಟಿದ್ದಾರೆ ಹಾಗೂ 12ಕ್ಕೂ ಅಧಿಕ ಮಂದಿ ಗಾಯಗೊಂಡಿದ್ದಾರೆ.

ಸುಡಾನ್‌ನಲ್ಲಿ ಪ್ರವಾಹ–77 ಸಾವು: ಸುಡಾನ್‌ನಲ್ಲಿ ಮೇ ತಿಂಗಳಿನಿಂದೀಚೆಗೆ ಸಂಭವಿಸಿದ ಪ್ರವಾಹ ಸಂಬಂಧಿತ ದುರಂತಗಳಲ್ಲಿ 77 ಮಂದಿ ಮೃತಪಟ್ಟಿದ್ದಾರೆ ಹಾಗೂ 14,500 ಮನೆಗಳು ಹಾನಿಗೊಂಡಿವೆ.