ಮಾಲಿ: ಸೇನಾ ಶಿಬಿರದ ಮೇಲೆ ಉಗ್ರರ ದಾಳಿ, 21 ಯೋಧರ ಹತ್ಯೆ

ಬಾಮಾಕೊ: ಮಾಲಿಯ ಕೇಂದ್ರ ಭಾಗದಲ್ಲಿರುವ ಸೇನಾ ಶಿಬಿರದ ಮೇಲೆ ಉಗ್ರರು ದಾಳಿ ನಡೆಸಿದ್ದು, ಗುಂಡಿನ ಚಕಮಕಿಯಲ್ಲಿ 21 ಮಂದಿ ಹತ್ಯೆಯಾಗಿದ್ದಾರೆ ಎಂದು ಸೇನೆಯ ಮೂಲಗಳು ತಿಳಿಸಿವೆ. ಮೃತರ ಸಂಖ್ಯೆ ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಹೇಳಲಾಗಿದೆ.

ಮೊಪ್ತಿ ವಲಯದಲ್ಲಿರುವ ಡಿಯೂರಾ ಸೇನಾ ಶಿಬಿರಕ್ಕೆ ಕಾರು ಹಾಗೂ ಬೈಕ್‌ಗಳಲ್ಲಿ ಉಗ್ರರು ನುಗ್ಗಿದ್ದರಿಂದ ಹಲವು ಸೈನಿಕರು ಕಾಣೆಯಾಗಿದ್ದು, ಕೆಲವರು ಮೃತಪಟ್ಟಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಇಲ್ಲಿಯವರೆಗೆ 21 ಯೋಧರುಹತ್ಯೆಯಾಗಿದ್ದಾರೆ ಎಂದು ಮಾಲಿಯ ಭದ್ರತಾ ಪಡೆ ತಿಳಿಸಿದ್ದರೆ, ಸ್ಥಳೀಯರು ಮಾತ್ರ 15 ಜನರು ಸಾವನ್ನಪ್ಪಿದ್ದಾರೆ ಎಂದಿದ್ದಾರೆ.

ಉಗ್ರರು ಹಾಗೂ ಭದ್ರತಾ ಪಡೆಯ ನಡುವೆ ಗುಂಡಿನ ಚಕಮಕಿ ನಡೆದಿದೆ ಎಂದೂ ಸೇನೆ ಮಾಹಿತಿ ನೀಡಿದೆ.