ಚೀನಾ: ಸುಂಟರಗಾಳಿಯ ಅಬ್ಬರ

ಬೀಜಿಂಗ್‌: ಚೀನಾದ ಗೌಂಗ್‌ಝೋ ನಗರದಲ್ಲಿ ಶನಿವಾರ ತೀವ್ರ ಆಲಿಕಲ್ಲು ಮಳೆಯ ನಡುವೆ  ಸುಂಟರಗಾಳಿಯೊಂದು ಬೀಸಿತು ಎಂದು ಚೀನಾ ಮಾಧ್ಯಮಗಳು ವರದಿ ಮಾಡಿವೆ.

‘ಮಧ್ಯಾಹ್ನ 3 ಗಂಟೆಯ ವೇಳೆ ಸುಂಟರಗಾಳಿ ಕಾಣಿಸಿಕೊಂಡಿದ್ದು, ಯಾವುದೇ ಹಾನಿ ಮತ್ತು ಗಾಯಗಳಾಗಿರುವ ಬಗ್ಗೆ ವರದಿಯಾಗಿಲ್ಲ’ ಎಂದು ಚೀನಾದ ಹವಾಮಾನ ಇಲಾಖೆ ತಿಳಿಸಿದೆ.

ಮಧ್ಯಾಹ್ನದ ವೇಳೆ ಆಕಾಶ ಕತ್ತಲಾಗಿರುವುದು ಮತ್ತು‌ ದೂಳು, ಕಲ್ಲುಗಳು ಗಾಳಿಯೊಂದಿಗೆ ಸುತ್ತುತ್ತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.

ಇತರ ಭಾಗದಲ್ಲಿಯೂ ಸುಂಟರಗಾಳಿ ಅಪ್ಪಳಿಸುವ ಬಗ್ಗೆ ಎಚ್ಚರಿಕೆ ನೀಡಲಾಗಿದೆ ಎಂದು ಮೂಲಗಳು ತಿಳಿಸಿವೆ.