ಇರಾನ್ ಡ್ರೋನ್ ದಾಳಿ: ಜೆರುಸೆಲೇಂ ಸುತ್ತಮುತ್ತ ಸೈರನ್ ಸದ್ದು

ಜೆರುಸೆಲೇಂ: ಇಸ್ರೇಲ್‌ ಮೇಲೆ ಶನಿವಾರ ತಡರಾತ್ರಿ ಇರಾನ್ ಭಾರಿ ಪ್ರಮಾಣದ ಡ್ರೋನ್ ದಾಳಿ ನಡೆಸಿದ್ದು, ಭಾನುವಾರ ಮುಂಜಾನೆ ಜೆರುಸೆಲೇಂ ಸುತ್ತಮುತ್ತ ಸೈರನ್‌ಗಳ ಸದ್ದು ಕೇಳಿಬರುತ್ತಿದೆ ಎಂದು ವರದಿಯಾಗಿದೆ.

ಸಿರಿಯಾದ ಡಮಾಸ್ಕಸ್‌ನಲ್ಲಿ ಇರಾನ್ ಕಚೇರಿಯ ಮೇಲಿನ ವೈಮಾನಿಕ ದಾಳಿಗೆ ಪ್ರತೀಕಾರವಾಗಿ ಇಸ್ರೇಲ್ ಮೇಲೆ ಇರಾನ್ ಡ್ರೋನ್ ದಾಳಿ ನಡೆಸಿದೆ.

ಇರಾನ್‌ನಿಂದ ಡ್ರೋನ್ ದಾಳಿ ನಡೆದಿರುವ ಮುನ್ಸೂಚನೆ ಸಿಕ್ಕಿದೆ. ಆದರೆ ಅದನ್ನು ಎದುರಿಸಲು ನಾವು ಸಿದ್ಧರಾಗಿದ್ದೇವೆ ಎಂದು ಇಸ್ರೇಲ್ ಮಿಲಿಟರಿ ತಿಳಿಸಿದೆ.

‘ದಿ ಆ್ಯರೋ, ಡೇವಿಡ್ಸ್‌ ಸ್ಲಿಂಗ್, ಪೆಟ್ರಿಯಾಟ್‌, ಐರನ್ ಡೋಮ್‌, ಐರನ್‌ ಬೀಮ್‌ ನಂತಹ ಅತ್ಯಾಧುನಿಕ ಯುದ್ಧ ತಂತ್ರಜ್ಞಾನಗಳನ್ನು ಇಸ್ರೇಲ್ ಹೊಂದಿದ್ದು, ಎಲ್ಲ ರೀತಿಯಲ್ಲೂ ದಾಳಿಯನ್ನು ಎದುರಿಸಲಿದ್ದೇವೆ’ ಎಂದು ಅದು ಹೇಳಿದೆ.

ಇರಾನ್ ದಾಳಿ ಬಗ್ಗೆ ಮುನ್ನೆಚ್ಚರಿಕೆ ನೀಡಿದ್ದ ಅಮೆರಿಕ ಅಧ್ಯಕ್ಷ ಜೋ ಬೈಡನ್‌, ಇಸ್ರೇಲ್‌ಗೆ ಸಂಪೂರ್ಣ ಬೆಂಬಲ ನೀಡುವುದಾಗಿ ತಿಳಿಸಿದ್ದರು.