ಭಾರತದಲ್ಲಿ ನೇಮಕಾತಿ | ಐಎಸ್‌ಐಎಲ್‌ ಉಗ್ರ ಸಂಘಟನೆ ಯತ್ನ: ವಿಶ್ವಸಂಸ್ಥೆ ವರದಿ

ವಿಶ್ವಸಂಸ್ಥೆ: ಭಯೋತ್ಪಾದಕ ಸಂಘಟನೆಯಾದ ಐಎಸ್‌ಐಎಲ್‌–ಕೆ (ಇಸ್ಲಾಮಿಕ್ ಸ್ಟೇಟ್ ಇನ್ ಇರಾಕ್ ಆ್ಯಂಡ್ ದಿ ಲೇವಂತ್ – ಖೊರಾಸಾನ್) ಭಾರತದಲ್ಲಿ ಇರುವ ತನ್ನ ಬೆಂಬಲಿಗರ ನೆರವಿನಿಂದ, ಒಬ್ಬಂಟಿಯಾಗಿ ಕೆಲಸ ಮಾಡುವವರನ್ನು ನೇಮಕ ಮಾಡಿಕೊಳ್ಳಲು ಮುಂದಾಗಿದೆ ಎಂದು ವಿಶ್ವಸಂಸ್ಥೆಯ ವರದಿಯೊಂದು ಹೇಳಿದೆ.

ದೇಶದಲ್ಲಿ ಭಾರಿ ಪ್ರಮಾಣದಲ್ಲಿ ದಾಳಿ ನಡೆಸಲು ಈ ಭಯೋತ್ಪಾದಕ ಸಂಘಟನೆಗೆ ಸಾಧ್ಯವಾಗದೆ ಇದ್ದರೂ, ಅದು ಈ ಮಾರ್ಗ ಅನುಸರಿಸಲು ಮುಂದಾಗಿದೆ ಎಂದು ವರದಿಯು ಎಚ್ಚರಿಸಿದೆ.

‘ಸಂಘಟನೆಯು ಉರ್ದು ಭಾಷೆಯಲ್ಲಿ ಕೈಪಿಡಿಯೊಂದನ್ನು ಬಿಡುಗಡೆ ಮಾಡಿದ್ದು, ಹಿಂದೂ–ಮುಸ್ಲಿಂ ಭಿನ್ನಮತವನ್ನು ಭಾರಿ ದೊಡ್ಡದಾಗಿ ತೋರಿಸುವ ಕೆಲಸ ಮಾಡಿದೆ’ ಎಂದು ವಿಶ್ವಸಂಸ್ಥೆಯ ವರದಿಯು ಹೇಳಿದೆ. ಈ ಪ್ರದೇಶದಲ್ಲಿ ಐಎಸ್‌ಐಎಲ್‌–ಕೆ ಸಂಘಟನೆಯು ಬಹಳ ಗಂಭೀರ ಬೆದರಿಕೆಯಾಗಿದೆ ಎಂದು ಹೇಳಿದೆ.