ಹಮಾಸ್ ದಾಳಿಯಿಂದ ಮೃತಪಟ್ಟವರು 1400 ಅಲ್ಲ, 1200: ಸಂಖ್ಯೆ ಪರಿಷ್ಕರಿಸಿದ ಇಸ್ರೇಲ್

ಜೆರುಸಲೇಂ: ಅಕ್ಟೋಬರ್‌ 7 ರಂದು ಹಮಾಸ್‌ ಬಂಡುಕೋರರು ನಡೆಸಿದ್ದ ದಾಳಿಯಲ್ಲಿ ಸಾವಿಗೀಡಾದದವರ ಸಂಖ್ಯೆಯನ್ನು ಇಸ್ರೇಲ್‌ ಪರಿಷ್ಕರಿಸಿದೆ. ದಾಳಿಯಲ್ಲಿ 1,200 ಮಂದಿ ಮೃತಪಟ್ಟಿದ್ದಾರೆ ಎಂದು ವಿದೇಶಾಂಗ ಇಲಾಖೆಯ ವಕ್ತಾರ ಲಿಯರ್‌ ಹಯಾತ್‌ ಹೇಳಿದ್ದಾರೆ.

1,400 ಮಂದಿ ಸಾವಿಗೀಡಾಗಿದ್ದಾಗಿ ಈ ಹಿಂದೆ ಇಸ್ರೇಲ್ ಹೇಳಿತ್ತು.

‘ಇದು ಸಾವಿಗೀಡಾದವರ ಹೊಸ ಅಂದಾಜು’ ಎಂದು ಹೇಳಿರುವ ಅವರು, ‘ಇದರಲ್ಲಿ ವಿದೇಶಿ ನೌಕರರು ಹಾಗೂ ವಿದೇಶಿ ಪ್ರಜೆಗಳು ಇದ್ದಾರೆ’ ಎಂದು ತಿಳಿಸಿದ್ದಾರೆ.

‘ಈ ಸಂಖ್ಯೆಯೇ ಅಂತಿಮವಲ್ಲ. ಎಲ್ಲಾ ದೇಹಗಳ ಗುರುತು ಪತ್ತೆಯಾದ ಬಳಿಕ ಇದು ಬದಲಾಗಬಹುದು’ ಎಂದು ಹೇಳಿದ್ದಾರೆ.

ಈ ದಾಳಿಯ ಬಳಿಕ ಹಮಾಸ್ ನಿರ್ನಾಮಕ್ಕೆ ಪಣ ತೊಟ್ಟಿರುವ ಇಸ್ರೇಲ್, ಗಾಜಾ ಪಟ್ಟಿಯಲ್ಲಿ ಸತತವಾಗಿ ದಾಳಿ ನಡೆಸುತ್ತಿದೆ. ಇಸ್ರೇಲ್ ದಾಳಿಯಿಂದಾಗಿ 4 ಸಾವಿರಕ್ಕೂ ಅಧಿಕ ಮಕ್ಕಳು ಸೇರಿ 11 ಸಾವಿರಕ್ಕೂ ಹೆಚ್ಚು ಮಂದಿ ಸಾವಿಗೀಡಾಗಿದ್ದಾರೆ ಎಂದು ಗಜಾದ ಆರೋಗ್ಯ ಸಚಿವಾಲಯ ತಿಳಿಸಿದೆ.