ಹಜ್‌ ಯಾತ್ರೆ: ಸೌದಿ ಅರೇಬಿಯಾ ತಲುಪಿದ 15 ಲಕ್ಷ ವಿದೇಶಿ ಯಾತ್ರಿಕರು

ಮೆಕ್ಕಾ: ’ಹಜ್‌ ಯಾತ್ರೆ ಹಿನ್ನೆಲೆಯಲ್ಲಿ ಇದುವರೆಗೆ 15 ಲಕ್ಷ ವಿದೇಶಿ ಯಾತ್ರಿಕರು ಸೌದಿ ಅರೇಬಿಯಾಗೆ ಬಂದಿದ್ದಾರೆ’ ಎಂದು ಅಧಿಕಾರಿಗಳು ತಿಳಿಸಿದರು.

ಕೋವಿಡ್‌ ಹಿನ್ನೆಲೆಯಲ್ಲಿ 2020ರಿಂದ ಹಜ್‌ ಯಾತ್ರೆಗೆ ಕೆಲವು ನಿರ್ಬಂಧ ವಿಧಿಸಲಾಗಿತ್ತು. ಆದರೆ, ಈ ಬಾರಿ ಯಾವುದೇ ನಿರ್ಬಂಧಗಳಿಲ್ಲದೇ ಹಜ್‌ ಯಾತ್ರೆ ನಡೆಯಲಿದೆ. ಸೋಮವಾರದಿಂದ ಯಾತ್ರೆ ಆರಂಭವಾಗಲಿದ್ದು ಇನ್ನೂ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಬರುವ ನಿರೀಕ್ಷೆಯಿದೆ.

‘ಕೋವಿಡ್‌ಗೂ ಮುಂಚೆ ಬರುತ್ತಿದ್ದ ಸಂಖ್ಯೆಯಷ್ಟು ಭಕ್ತರು ಈ ವರ್ಷ ಬರುವ ನಿರೀಕ್ಷೆಯಿದೆ. 2019ರಲ್ಲಿ 24 ಲಕ್ಷ ಮಂದಿ ಮುಸಲ್ಮಾನರು ಹಜ್‌ ಯಾತ್ರೆಗೆ ಬಂದಿದ್ದರು’ ಎಂದು ಅಧಿಕಾರಿಗಳು ಹೇಳಿದರು.