ನೇಪಾಳದಲ್ಲಿ ರೂಪೆ ಕಾರ್ಡ್‌ ಸೇವೆ

ನವದೆಹಲಿ (ಪಿಟಿಐ): ರೂಪೆ ಕಾರ್ಡ್ ಹೊಂದಿರುವವರು ಇನ್ನು ಮುಂದೆ ನೇಪಾಳದಲ್ಲಿ ಪಾವತಿ ವಹಿವಾಟು ನಡೆಸಬಹುದು. ಪ್ರಧಾನಿ ನರೇಂದ್ರ ಮೋದಿ ಮತ್ತು ನೇಪಾಳದ ಪ್ರಧಾನಿ ಶೇರ್ ಬಹದ್ದೂರ್ ದೇವುಬಾ ಅವರು ನೇಪಾಳದಲ್ಲಿ ರೂಪೆ ವಹಿವಾಟು ಆರಂಭಕ್ಕೆ ಭಾನುವಾರ ಚಾಲನೆ ನೀಡಿದ್ದಾರೆ.

ಭೂತಾನ್, ಸಿಂಗಪುರ ಮತ್ತು ಸಂಯುಕ್ತ ಅರಬ್ ಸಂಸ್ಥಾನಗಳಲ್ಲಿ (ಯುಎಇ) ರೂಪೆ ಕಾರ್ಡ್‌ಗೆ ಈಗಾಗಲೇ ಮಾನ್ಯತೆ ಇದೆ. ಈಗ ಈ ಸಾಲಿಗೆ ನೇಪಾಳ ಕೂಡ ಸೇರಿಕೊಂಡಿದೆ. ‘ನೇಪಾಳದಲ್ಲಿ ರೂಪೆ ಕಾರ್ಡ್‌ ವಹಿವಾಟು ಶುರುವಾಗುತ್ತಿರುವುದು ಭಾರತ ಮತ್ತು ನೇಪಾಳದ ಹಣಕಾಸಿನ ಸಂಬಂಧಕ್ಕೆ ಹೊಸ ಅಧ್ಯಾಯ ಸೇರ್ಪಡೆ ಆದಂತಾಗಿದೆ’ ಎಂದು ಮೋದಿ ಅವರು ಹೇಳಿದ್ದಾರೆ.