ತಾಂಜೇನಿಯಾ ಅಧ್ಯಕ್ಷರ ಅಂತಿಮ ದರ್ಶನದ ವೇಳೆ ಕಾಲ್ತುಳಿತ: 45 ಮಂದಿ ಸಾವು

ದಾರ್ ಎಸ್ ಸಲಾಂ: ತಾಂಜೇನಿಯಾದ ಅಧ್ಯಕ್ಷರಾಗಿದ್ದ ಜಾನ್‌ ಮಗುಫುಲಿ ಅವರ ಅಂತಿಮ ದರ್ಶನದ ವೇಳೆ ಮಾರ್ಚ್‌ 21ರಂದು ಇಲ್ಲಿನ ಸ್ಟೇಡಿಯಂನಲ್ಲಿ ಉಂಟಾದ ನೂಕುನುಗ್ಗಲು ಮತ್ತು ಕಾಲ್ತುಳಿತದಲ್ಲಿ 45 ಮಂದಿ ಮೃತಪಟ್ಟಿದ್ದರು ಎಂಬ ಮಾಹಿತಿಯನ್ನು ಪೊಲೀಸರು ಮಂಗಳವಾರ ಬಹಿರಂಗಪಡಿಸಿದ್ದಾರೆ.

ಮೂರು ವಾರಗಳ ಕಾಲ ನಿಗೂಢವಾಗಿ ಕಣ್ಮರೆಯಾಗಿದ್ದ 61 ವರ್ಷದ ಅಧ್ಯಕ್ಷ ಮಗುಫುಲಿ ಅವರು ಮಾರ್ಚ್‌ 17ರಂದು ಮೃತಪಟ್ಟಿದ್ದಾರೆ ಎಂದು ಘೋಷಿಸಲಾಗಿತ್ತು. ಹಲವು ನಗರಗಳಿಗೆ ಮೃತದೇಹವನ್ನು ಸಾಗಿಸಿ, ಸಾರ್ವಜನಿಕ ದರ್ಶನದ ವ್ಯವಸ್ಥೆ ಮಾಡಿದ ಬಳಿಕ ಮಾರ್ಚ್‌ 26ರಂದು ದೇಶದ ವಾಯವ್ಯ ಭಾಗದ ಛಾಟೊ ಎಂಬಲ್ಲಿ ಅಂತ್ಯಸಂಸ್ಕಾರ ನಡೆಸಲಾಗಿತ್ತು. ದಾರ್‌ ಎಸ್‌ ಸಲಾಂನಲ್ಲಿ ನಡೆದ ಈ ಕಾಲ್ತುಳಿತ ದುರಂತವನ್ನು ನೂತನ ಅಧ್ಯಕ್ಷೆ ಸಮಿಲಾ ಸುಲುಹು ಆಡಳಿತ ಇದುವರೆಗೆ ಮುಚ್ಚಿಟ್ಟಿತ್ತು.