ನೇಮಕ ಕಾರ್ಯಕ್ಕೆ ವಿರಾಮ: ಯುಎಫ್‌ಸಿ ಚಾಂಪಿಯನ್ಷಿಪ್ ಹಣಾಹಣಿ ವೀಕ್ಷಿಸಿದ ಟ್ರಂಪ್
ಪಾಮ್ ಬೀಚ್‌: ಆಯಕಟ್ಟಿನ ಸ್ಥಳಗಳಿಗೆ ಆಪ್ತರನ್ನು ನೇಮಿಸುವ ಪ್ರಕ್ರಿಯೆಗೆ ಶನಿವಾರ ವಿರಾಮ ನೀಡಿದ ಅಮೆರಿಕದ ಚುನಾಯಿತ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಯುಎಫ್‌ಸಿ ಹೆವಿವೇಟ್ ಚಾಂಪಿಯನ್ಷಿಪ್ ಹಣಾಹಣಿ ವೀಕ್ಷಿಸಿದರು.
ಮ್ಯಾಡಿಸನ್‌ ಸ್ಕ್ವೇರ್‌ನಲ್ಲಿ ಶನಿವಾರ ರಾತ್ರಿ ಸ್ಪರ್ಧೆ ನಡೆಯಿತು. ಮೂರನೇ ಹೆವಿವೇಟ್ ಚಾಂಪಿಯನ್ಷಿಪ್ ಮೇಲೆ ಕಣ್ಣಿಟ್ಟಿರುವ ಸ್ಟೈಪ್‌ ಮಿಯೊಕಿಕ್ ಅವರು ಹಾಲಿ ಚಾಂಪಿಯನ್‌ ಜಾನ್ ಜೋನ್ಸ್ ವಿರುದ್ಧ ಯುಎಫ್‌ಸಿ 309 ಸ್ಪರ್ಧೆಯಲ್ಲಿ ಮುಖಾಮುಖಿಯಾದರು.
ಕುಸ್ತಿ ಸ್ಪರ್ಧೆ ಅಭಿಮಾನಿಯಾದ ಟ್ರಂಪ್ ಯುಎಫ್‌ಸಿಯ ಸುದೀರ್ಘ ಕಾಲದ ಪ್ರೇಕ್ಷಕರು. ಪ್ರಮುಖ ಸ್ಪರ್ಧೆಗಳ ವೀಕ್ಷಣೆಗೆ ಖುದ್ದುಹಾಜರಿ ಇರುತ್ತದೆ. ಇತ್ತೀಚಿನ ಚುನಾವಣಾ ಪ್ರಚಾರದಲ್ಲೂ ಕುಸ್ತಿಯ ಹಾವಭಾವ ಪ್ರದರ್ಶಿಸಿದ್ದ ಟ್ರಂಪ್, ಪುರುಷ ಮತದಾರರ ಸೆಳೆಯಲು ಯಶಸ್ವಿಯಾಗಿದ್ದರು.
ಪ್ರಚಾರದ ಅವಧಿಯಲ್ಲಿಯೂ ಟ್ರಂಪ್ ಅವರು ನಿಯಮಿತವಾಗಿ ಪಾಡ್‌ಕಾಸ್ಟ್‌ ಮತ್ತು ಗೇಮಿಂಗ್‌ ವೇದಿಕೆಗಳಿಗೆ ಬೆಂಬಲಿಗರ ಜೊತೆಗೆ ಭೇಟಿ ನೀಡುತ್ತಿದ್ದರು. ಯುಎಫ್‌ಸಿ ಅಧ್ಯಕ್ಷ ಡಾನಾ ವೈಟ್‌ ಅವರೊಂದಿಗೂ ಟ್ರಂಪ್ ಸುಮಾರು ಎರಡು ದಶಕದ ಬಾಂಧವ್ಯ ಹೊಂದಿದ್ದಾರೆ.
ಇಂಧನ ಕಾರ್ಯದರ್ಶಿಯಾಗಿ ಕ್ರಿಸ್‌ ರೈಟ್ ನೇಮಕ
ಇಂಧನ ಕಾರ್ಯದರ್ಶಿ ಸ್ಥಾನಕ್ಕೆ ಕ್ರಿಸ್‌ ರೈಟ್ ಅವರನ್ನು ಅಮೆರಿಕದ ಚುನಾಯಿತ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಯ್ಕೆ ಮಾಡಿದ್ದಾರೆ. ಟ್ರಂಪ್ ಅವರ ಪ್ರಚಾರ ಕಾರ್ಯಕ್ರಮಗಳಿಗೆ ಆರ್ಥಿಕ ನೆರವು ನೀಡಿದ್ದ ರೈಟ್ ಲಿಬರ್ಟಿ ಎನರ್ಜಿ ಸಂಸ್ಥೆಯ ಸಿಇಒ ಆಗಿದ್ದಾರೆ.
ಇಂಧನ ಕ್ಷೇತ್ರದಲ್ಲಿ ಪ್ರಭಾವಿಯಾಗಿರುವ ರೈಟ್, ತಾಪಮಾನ ಬದಲಾವಣೆ ವಿರುದ್ಧದ ಹೋರಾಟದಲ್ಲಿ ಪ್ರಬಲ ಧ್ವನಿಯಾಗಿದ್ದಾರೆ. ಇವರ ಆಯ್ಕೆಗೆ ಅನಿಲ ಕ್ಷೇತ್ರದ ಪ್ರಮುಖರಾದ ಹರೊಲ್ಡ್ ಹ್ಯಾಮ್‌ ಬೆಂಬಲ ಸೂಚಿಸಿದ್ದಾರೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.