ಭಾರತದ ಇಬ್ಬರು ಮೀನುಗಾರರು ನಾಪತ್ತೆ: ಶ್ರೀಲಂಕಾ ನೌಕಾಪಡೆ

ಕೊಲಂಬೊ: ಶ್ರೀಲಂಕಾದ ಕಛತೀವು ದ್ವೀಪದ ಬಳಿ ನಾಲ್ವರು ಭಾರತೀಯ ಮೀನುಗಾರರಿದ್ದ ದೋಣಿ ಮಗುಚಿದ್ದು, ಇಬ್ಬರು ಈಜಿ ಸುರಕ್ಷಿತವಾಗಿ ದಡ ತಲುಪಿದ್ದರೆ, ಮತ್ತಿಬ್ಬರು ನಾಪತ್ತೆಯಾಗಿದ್ದಾರೆ ಎಂದು ಶ್ರೀಲಂಕಾ ನೌಕಾಪಡೆ ತಿಳಿಸಿದೆ.

ಮಂಗಳವಾರ ಮುಂಜಾನೆ ಈ ಘಟನೆ ಜರುಗಿದ್ದು, ಇಬ್ಬರು ಮೀನುಗಾರರು ಸುರಕ್ಷಿತವಾಗಿ ಕಛತೀವು ದ್ವೀಪಕ್ಕೆ ಬಂದಿದ್ದಾರೆ. ಶ್ರೀಲಂಕಾ ನೌಕಾಪಡೆಯು ಸ್ಥಳಕ್ಕೆ ತೆರಳಿ, ನಾಪತ್ತೆಯಾದವರ ಪತ್ತೆಗೆ ಕಾರ್ಯಾಚರಣೆ ನಡೆಸುತ್ತಿದೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ವಶ: ಮತ್ತೊಂದು ಘಟನೆಯಲ್ಲಿ ಶ್ರೀಲಂಕಾದ ಜಲ ಗಡಿಗೆ ಪ್ರವೇಶಿಸಿ ಅಕ್ರಮವಾಗಿ ಮೀನುಗಾರಿಕೆ ಮಾಡುತ್ತಿದ್ದ ಆರೋಪದ ಮೇಲೆ 8 ಮಂದಿ ಭಾರತೀಯ ಮೀನುಗಾರರು ಹಾಗೂ ಒಂದು ದೋಣಿಯನ್ನು ಶ್ರೀಲಂಕಾ ನೌಕಾಪಡೆಯು ಸೋಮವಾರ ತಡರಾತ್ರಿ ವಶಕ್ಕೆ ಪಡೆದಿದೆ.