ಭಾರತಕ್ಕೆ ಹಸ್ತಾಂತರ ವಿರುದ್ಧ ಅರ್ಜಿ: ರಾಣಾಗೆ ನ.9ರವರೆಗೆ ಅವಕಾಶ

ವಾಷಿಂಗ್ಟನ್: 2008ರ ಮುಂಬೈ ಮೇಲಿನ ಭಯೋತ್ಪಾದಕ ದಾಳಿ ಪ್ರಕರಣಕ್ಕೆ ಸಂಬಂಧಿಸಿ ತನ್ನನ್ನು ಭಾರತಕ್ಕೆ ಹಸ್ತಾಂತರಿಸುವ ನಿರ್ಣಯದ ವಿರುದ್ಧ ಅರ್ಜಿ ಸಲ್ಲಿಸಲು ಪ್ರಕರಣದ ಪ್ರಮುಖ ಆರೋಪಿಯಾಗಿರುವ ಪಾಕಿಸ್ತಾನ ಮೂಲದ ಕೆನಡಾ ಉದ್ಯಮಿ ತನಾವ್ವುರ್‌ ರಾಣಾಗೆ ಇಲ್ಲಿನ ನ್ಯಾಯಾಲಯ ನವೆಂಬರ್‌ 9ರ ವರೆಗೆ ಅವಕಾಶ ನೀಡಿದೆ.

ಹಸ್ತಾಂತರ ವಿರೋಧಿಸಿ ಆಗಸ್ಟ್‌ನಲ್ಲಿ ಸಲ್ಲಿಸಿದ್ದ ಹೇಬಿಯಸ್‌ ಕಾರ್ಪಸ್‌ ಅರ್ಜಿಯನ್ನು ಕ್ಯಾಲಿಫೋರ್ನಿಯಾ ನ್ಯಾಯಾಲಯ ತಿರಸ್ಕರಿಸಿತ್ತು. ನ್ಯಾಯಾಲಯದ ಈ ನಿರ್ಣಯವನ್ನು ಪ್ರಶ್ನಿಸಿ ರಾಣಾ ಸಲ್ಲಿಸಿದ್ದ ಅರ್ಜಿಯನ್ನು ವಿಚಾರಣೆ ನಡೆಸಿದ್ದ 9ನೇ ಸರ್ಕೀಟ್ ಕೋರ್ಟ್‌ ಈ ಕಾಲಾವಕಾಶ ನೀಡಿದೆ. 

ಹೀಗಾಗಿ, ನವೆಂಬರ್‌ 9ರ ಒಳಗಾಗಿ ರಾಣಾ ಮೇಲ್ಮನವಿ ಸಲ್ಲಿಸಬೇಕಿದ್ದು, ಈ ಕುರಿತಂತೆ ಡಿಸೆಂಬರ್‌ 11ರ ಒಳಗಾಗಿ ಸರ್ಕಾರ ತನ್ನ ಪ್ರತಿಕ್ರಿಯೆ ಸಲ್ಲಿಸಬೇಕಿದೆ.