ನಾರಾಯಣ ಗುರು ಮಲ್ತಿ ಮೌನ ಕ್ರಾಂತಿ

ಶ್ರಾವಣ ತಿಂಗೊಲ್ದ ಶತಭಿಷ ನಕ್ಷತ್ರದಾನಿ ನಾರಾಯಣ ಗುರುಕ್ಕುಲೆನ ಪುಟ್ಟ ಪರ್ಬೊನು ನಮ ಮಲ್ತೊಂದುಲ್ಲ. ಪ್ರತಿಯೊಂಜಿ ನರಮಾನಿ ಈ ಭೂಮಿಡ್ ಪುಟ್ಟುನು ಒವಾ ಒಂಜಿ ಮಲ್ಲ ಕೆಲಸೊಗು. ನರಮಾನಿ ದೇವೆರ್ನ ಬೊಲ್ಪುದ ಕಿಟಿ. ದೇವೆರೆ ಗುಂಡೊಡ್ದು ಬಲಿಮೂರ್ತಿ ಉತ್ಸವೊಗು ಪಿದಡುನಂಚ ಜೂವ ಪನ್ಪಿ ನಮ ಬಲಿಮೂರ್ತಿ ಆದ್ ಬಲಿ ಬರ್ಪ. ಉತ್ಸವ ಮುಗೀನೆ ತಿರ್ಗ ಗುಂಡ ಸೇರುವ. ಆಂಡ ಅಯಿಟ್ಟ್ ಕೆಲವು ಬಲಿ ಮೂರ್ತಿಲು ಬಜೀ ಉತ್ಸವ ಮೂರ್ತಿಲಾವಂದೆ ಭೂಮಿದ ಮಿತ್ತ್ ನರಮಾನ್ಯ ಉಡಲ ಗುಂಡೊಡು ಸೇರೊಂದು ನಿಚ್ಚದ ಪೂಜೆಗ್ ಅನುವಾಪುಂಡು. 2,500 ಪಿರವುದ ಬುದ್ಧೆ, 2,013 ವರ್ಷದ ಪಿರವುದ ಏಸುಕ್ರಿಸ್ತೆ, ತ್ರೇತಾಯು ಗತ್ತ ರಾಮೆ, ದ್ವಾಪರದ ಕ್ರಿಷ್ಣೆ ಮೊಕುಲು ಮಾತ ಇಂಚಿನ ದೇವ ಮೂರ್ತಿಲು. ಲೋಕ ನಿದ್ರೆಡಿತ್ತಿ ಪೊರ್ತುಡು ಲಕ್‍ದ್ ಪೋಯಿನ ಸಿದ್ಧಾರ್ಥೆ ಬುದ್ಧೆ ಆಯಿನಂಚ, ಲೋಕೊಗು ಗೇನದ ಬೊಲ್ಪು ಕೊರಿಲೆಕ 19ನೇ ಶತಮಾನದ ಪೊರ್ತುಗು ಪುಟುದು ಬತ್ತಿನ ಸಮಾಜ ಸುಧಾರಕೆರ್ನ ಪಂತೆಡ್ ಸುರುಕ್ಕು ತೋಜುನಾರ್ ಕೇರಳದ ಶ್ರೀ ನಾರಾಯಣ ಗುರುಕ್ಕುಲು. ಗೇನದ ಬೊಲ್ಪುಡು ಮೌನ ಕ್ರಾಂತಿ ಮಲ್ತಿನಾರ್.

ಸರ್ವ ಸಂಸ್ಕೃತಿದ, ಸರ್ವ ಧರ್ಮದ ನಿಲೆ ಆಯಿನ ಭಾರತ ದೇಶದ ಕೇರಳ ರಾಜ್ಯದ ತಿರುವನಂತಪುರತ್ತ ಚೆಂಬಿಳಂತಿ ಪನ್ಪಿ ಊರುಡು ಈಳವ ಜಾತಿಗ್ ಸೇರಿನ ಮಾದನ್ ಆಶಾನ್ ಬೊಕ್ಕ ಕುಟ್ಟಿ ಅಮ್ಮಾಳ್ ಪನ್ಪಿನ ಅಪ್ಪೆಮ್ಮಗ್ ಮಗೆ ಆದ್ 1885ನೇ ಇಸವಿ ಶ್ರಾವಣ ತಿಂಗೊಲ್ದ ಶತಭಿಷ ನಕ್ಷತ್ರ ದಾನಿ ಓಣಂ ಪರ್ಬದ ಪೊರ್ತುಡು ಮೇರ್ನ ಜನನ ಆಂಡ್. ಬಾಲೆಗ್ ‘ನಾರಾಯಣ' ಪನ್ಪಿ ಪುದರ್ ದೀದ್ ಮೋಕೆಡ್ ನಾಣು ಪಂಡ್‍ದ್ ಲೆತ್ತೆರ್. ಬಾಲೆದ ತಮ್ಮಲೆ, ಅಪ್ಪೆನ ತಗೆ ಕೃಷ್ಣ ವೈದ್ಯೆರ್ ಬಾಲೆದ ಪುಟಿರಾಸಿ ತೂಪೆರ್. ಬಾಲೆ ಲೋಕೊನು ತೂಪಿನ ದಿಟ್ಟಿಡ್ ಸಿದ್ಧಾರ್ಥೆ ಬುದ್ಧೆ ಆಯಿನಂಚಿನ ಸರ್ವದರ್ಮದ ಮೋಕೆದ ಮುಂಗೆ ಅಯಿಟ್ಟಿ
ತ್ತ್‌ಂಡ್. ಗುಡ್ಡೆದ ಕಲ್ಲ್, ಮೂರ್ತಿ ಆಪಿನಂಚ, ಕೆಸರ್ ನೀರ್‍ದ ಮಿತ್ತ್ ಕುರೆ ತಿಂದ್‍ದ್ ನೀರ್‍ನಮಡಿ ಮಲ್ಪುನಂಚ, ಸಮಾಜದ ಕಿಚ್ಚಿ ಮಚ್ಚರದ ನಂಜಿದ ಕುರೆ ದೆಕ್ಕುನ ತಾಕತ್ತ್ ಆ ಬಾಲೆಗಿತ್ತ್‌ಂಡ್. `ನಾಣು' ಪುಟುದಿನ ಕಾಲ ಕಷ್ಟ ಕಾಲ. ಬ್ರಿಟಿಷ್ ಸಾಮ್ರಾಜ್ಯದ ಅರತ್ತಾನ, ರಾಜೆರ್ನ ಆಂಕರದ ಕಾಲ, ಮೂಢನಂಬಿಕೆ, ಜಾತೀಯತೆ, ಅಸ್ಪೃಶ್ಯತೆ, ದೇವದಾಸಿ ಪದ್ಧತಿ, ಬೆತ್ತಲೆ ಸೇವೆ, ಬಾಲ್ಯವಿವಾಹ, ಗುಲಾಮಗಿರಿ, ಜಾತಿಪದ್ಧತಿ, ಜಮೀನ್ದಾರಿ ಪದ್ಧತಿ ಇಂಚಿತ್ತಿನ ಹಿಂದೂ ಧರ್ಮದ ಅನಿಷ್ಟ ಆಚರಣೆಲು ನಡತೊಂದಿತ್ತಿ ಕಾಲ. ಶೂದ್ರೆರಾಂಡಲಾ ನಾರಾಯಣ ಗುರುಕ್ಕುಲ್ನ ಕುಟುಮ ಗೇನದ ಕುಟುಮ. ಅಮ್ಮೆ ಮಾದನ್ ಆಶಾನ್ ಮಲ್ಲ ಬೆನ್ನಿದಾರ್, ಬಲಿಮೆದಾರ್, ಆಯುರ್ವೇದ ಶಾಸ್ತ್ರ ಪಂಡಿತೆರ್, ಊರುದ ಆಯನ್ಯಾಯದ ಮದಿಪುಗಾರೆ.

ಪುರಾಣದ ಗೇನ, ರಾಮಾಯಣ, ಮಹಾಭಾರತ, ಭಾಗವತದಂಚಿನ ಧರ್ಮ ಗ್ರಂಥೊಲೆನ್ ತೆರಿಯೊಂದಿನ ವಿದ್ವಾಂಸೆರ್. ಅತ್ತಾಂದೆ ತಮ್ಮಲೆ, ಅಜ್ಜೆರ್ ಮೊಕುಲು ಮಾತ ವಿದ್ಯೆದ ಮೂಲದಕುಲು. ಅಂಚಾದ್ `ನಾಣು'ಗು ಗೇನದ ಬೊಲ್ಪು ಪುಟ್ಟುಡೇ ಬತ್ತ್ಂಡ್. 5 ವರ್ಷದ ಬಾಲೆಗೇ ಗುರುಕುಲ ಪದ್ಧತಿದಲ್ಕ ಮುತ್ತ ಪಿಳ್ಳೆ ಆಶಾನ್ ಮೆರೆಡ್ದ್ ಮಲೆಯಾಳದ ಅಕ್ಷರಾಭ್ಯಾಸ, ಸುಂದರ ಪಿಳ್ಳೆಡ್ದ್ ತಮಿಳು, ಅಮ್ಮೆರೆಡ್ದ್ ಸಂಸ್ಕೃತದ ಬರವು ಸುರುವಾಂಡ್. ಪುರಾಣದ ಗೇನ ಬತ್ತ್ಂಡ್. 14 ವರ್ಷ ಆನಗ ಊರುಡು ಶಾಲೆದ ಶಿಕ್ಷಣ ಉಂತುದು ಒಂತೆ ಸಮಯ ಕೃಷಿ ಕೆಲಸ ಮಲ್ತಿನ ನಾಣುಗು ಮದ್ಮೆಮಲ್ಪರೆ ತೂಯೆರ್. ಆಂಡ ಅವುವೇ ಪೊರ್ತು ಅಪ್ಪೆ
ಕುಟ್ಟಿ ಅಮ್ಮಾಳ್ ಕಾಯ ಬುಡಿಯೆರ್. ಮದ್ಮೆದ ಮುಳ್ಳುದ ಪುದೆಲ್‍ಡ್ದ್ ಪಿದಯಿ ಬರ್ರೆ ನಾಣುಗು ಎಡ್ಡೆ ಆಂಡ್. 21 ವರ್ಷದ ಪೊರ್ತುಡು ಊರುಡ್ದು 145 ಕಿ.ಮೀ. ದೂರದ ಕರುನಾಗಪಳ್ಳಿದ ಚೆರುವನ್ನಾರ್ ಮನೆತನದ ಶ್ರೀರಾಮನ್ ಆಶಾನ್ ಪನ್ಪಿ
ನಾರ್ನ ಇಲ್ಲಡ್ ಬರವುದ ಬಲಕೆ ಕುಡ ಸುರುವಾಪುಂಡು. ಅಲ್ಪ ಒಣಸ್ ನಿದ್ರೆ ಬುಡ್ದು ಕಲ್ತಿನ ನಾಣು ಆಧ್ಯಾತ್ಮ, ಆಯುರ್ವೇದ, ಜ್ಯೋತಿಷ್ಯ ಶಾಸ್ತ್ರ, ವೇದ, ಉಪನಿಷತ್ತು 18 ಪುರಾಣೊನು ತೆರಿಯೊಂದು ತನ್ನ ಸ್ವ ಪ್ರಯತ್ನೊಡು ಕಾವ್ಯ, ನಾಟಕ, ವ್ಯಾಕರಣ, ಅಲಂಕಾರ ಬೊಕ್ಕ ತರ್ಕ ಶಾಸ್ತ್ರ ವಿದ್ಯೆಲೆನ್ ಕಲ್ತ್‍ದ್ ‘ನಾಣು ಚಟ್ಟಾಂಬಿ’ ಆದ್ ಆಧ್ಯಾತ್ಮ ಗುರು ಆಯೆರ್.

1888ನೇ ಇಸವಿ ಫೆಬ್ರವರಿ ತಿಂಗೊಲುಶಿವರಾತ್ರೆದ ದಿನ. ಕೇರಳದ ಅರವಿಪುರ ಪನ್ಪಿನ ಜಾಗೆ. ಶಿವಭಕ್ತೆರ್ ಮಾತ ಸೆರ್ದೆರ್.
ಬರಿಟ್ಟಿತ್ತಿನ ನೆಯ್ಯಾರ್ ತುದೆಟ್ಟ್ ವಿೂದ್ ಮಡಿಯಾದ್ ಮಿತ್ತ್ ಬತ್‍ದ್ ಭಜನೆ ಮಲ್ತೊಂದುಲ್ಲೆರ್. ರಾತ್ರೆ ಸುಮಾರ್ 11 ಗಂಟೆ. ನಾರಾಯಣ ಗುರು ತುದೆಕ್ಕ್ ಲಾಗಿಯೆರ್. ಒಂಜಿ ಗಂಟೆ ಒಡೆ ಪೊಯೆರ್‌ಂದೇ ಯೇರೆಗ್‍ಲ ಗೊತ್ತುಜ್ಜಿ. 12 ಗಂಟೆದ ಪೊರ್ತುಗು ಒಂಜಿ ಪೊರ್ಲುದ ಕಲ್ಲ್‌ ದೊಟ್ಟುಗು ಮಿತ್ತ ಬತ್ತೆರ್. ಅಂದ್ ಯಾನ್ ಪನರೆ ಪಿದಡ್ದಿನಿ ಒರಿ ಶೂದ್ರಗ್ ದೇವೆರೆನ್ ಕೈತಲ್ಡ್ ತೂವರೆ ತಿಕ್‍ದಿನ ಕತೆ. ಗುರುಕ್ಕುಲ್ನ ಸಂಕಲ್ಪದ ಲೆಕ್ಕ ಶೂದ್ರೆರೆಗ್ ದೇವಸ್ಥಾನೊಗು ಪೊಗ್ಗರೆ ಆಪುಜಿಡ ಮಲ್ಲೆಜ್ಜಿ. ನಂಕ್ ಲಡಯಿ ಬೊಡ್ಚಿ. ನಮ್ಮ ದೇವೆರೆನ್ ನಮ ಪೂಜೆ ಮಲ್ಪುಗ. ನಂಕಾದೇ ಒಂಜಿ ದೇವಸ್ಥಾನ ಕಟ್ಟ್‌ ಗ ಪನೊಂದು ಕರಸೇವೆ ಮಲ್ತ್‍ದ್ ಒಂಜಿ ಎಲ್ಯ ದೇವಸ್ಥಾನ ಕಟಿಯೆರ್. ಶಿವರಾತ್ರೆದಾನಿ ಲಿಂಗ ತಾಪನೆ ಮಲ್ಪುನುಂದು ದಿನ ದೀತ್‍ಂಡ್. ಮಾತೆರೆಗ್‍ಲ ಬಾರೀ ಯೇವುದೆಪ್ಪು. ಲಿಂಗ ಒಲ್ತು ಕನಪೆರ್ ಪಂಡ್‍ದ್. ಆಂಡ ಗುರುಕ್ಕುಲು ತುದೆಡ್ದ್ ಕಲ್ಲ್ ಕನತೆರ್.

ಮೂಜಿ ಗಂಟೆ ಆ ಕಲ್ಲ್‌ ಗ್ ಕನನೀರ್‍ದ ಅಭಿಷೇಕ ಮಲ್ತೆರ್. ಅವು ಯೇನಿ ಕಾಲೊಡ್ದಿಂಚಿ ಧರ್ಮ ದೇವೆರೆ ನಿಲೆದಾಂತೆ, ಬುಲಿತ್ ಬುಲಿತ್‍ದ್ ಪೊಟ್ಟು ಉಗ್ಗೆಲ್ದ ಲೆಕ ಆತಿನ ಸಾರ ಸಾರ ಕಣ್ಣ್‌ ಲೆನ ಕನನೀರ ಪರಿಪು ಅಯಿಟ್ಟಿತ್ತ್‌ಂಡ್. ಪುಲ್ಯಕ್ಕಲ ಮೂಜಿ ಗಂಟೆದ ಪೊರ್ತುಡು ಆ ಶಿವಲಿಂಗೊನು ಶಿವ ಪಂಚಾಕ್ಷರೀ ಮಂತ್ರದ ಸೊರತ್ತೊಟ್ಟುಗು ಒಂಜಿ ಶಿಲೆತ್ತ ಮಿತ್ತ್ ಮಂದಿರದ ಉಲಯಿ ತಾಪನೆ ಮಲ್ತೆರ್. ಶಿವಲಿಂಗ ಸ್ವಾಮಿನ್ ಲೆತ್ತ್‌ ದ್ ಪಂಡೆರ್‍ಗೆ ‘ನಿಕ್‍ಲೆಗ್ ಈ ಲಿಂಗ ಯೇಪ ಬೊಡ್ಚಿಂದಾಪುಂಡು ಆನಿ ಒಂಜಿ ಆನೆನ್ ಕಂತ್‍ದ್ ಒಯಿಪಾಲೆ’ ಪನೊಂದು ಮೂಜಿ ಸುತ್ತು ಬತ್‍ದ್ ಅಡ್ಡ ಬೂರಿಯೆರ್‍ಗೆ. ಇನಿಕ್‌ 130 ವರ್ಷ ಆಂಡ್.

ಅರವಿಪುರೊತ್ತ ಶಿವಲಿಂಗೊಗು ಇನಿಮುಟ್ಟಲಾ ಬ್ರಹ್ಮಕಲಶ ಆತ್‍ಜಿ. ಅಯಿತ ಕಲೆ ಕುಂದುದುಜಿ. ಉಂದು ಶೂದ್ರ ಶಿವನ ಕತೆ. ಯೇತೋ ಜನ ಮಿತ್ತ ಜಾತಿದಕುಲು ಬತ್‍ದ್ ಕೇನ್ನಗ ಪಂಡೆರ್‍ಗೆ ‘ಯಾನ್ ಪೂಜೆ ಮಲ್ಪುನು ನಿಕಲ್ನ ಈಶ್ವರನ್ ಅತ್ತ್. ಬಡವೆರೆ ಈಶ್ವರನ್. ಶೂದ್ರ ಈಳವ ಶಿವನ್’ ಉಂದು ನರಮಾನ್ಯ ಚರಿತ್ರೆಡ್ ಒಂಜಿ ಮದಪರೆ ಆವಂದಿನ ಮುಟ್ಟು. ಮುಟ್ಟರೆ ಆವಂದಿನ ಜನೊಕುಲೆಗ್ ದೇವರೆನ್ ತೂವರೆ ಅನು ಮಲ್ತ್ ಕೊರಿನ, ದೇವೆರೇ ದಾಂತಿನಕಲೆಗ್ ನಿಕ್‍ಲೆಗ್‍ಲಾ ಒಂಜಿ ದೇವೆರ್ ಬೋಡು, ನಿಕುಲ್ಲಾ ನರಮಾನಿಲೆಕ ಬದ್‍ಕೊಡು ಪಂಡ್‍ದ್, ನಿಜ ಬದ್‍ಕ್ ಕೊರಿನ ನಾರಾಯಣ ಗುರುಕ್ಕುಲ್ನ ಮೌನ ಕ್ರಾಂತಿದ ಚರಿತ್ರೆ.

1893ಟ್ಟ್ ಅಮೆರಿಕೊಡು ನಡತಿನ ಸರ್ವಧರ್ಮ ಸಮ್ಮೇಳನೊಡು ಭಾರತದ ಧರ್ಮದ ರಂಗ್‍ನ್ ಪಾರಾದಿನ ಬೀರ ಸನ್ನೇಸಿ
ಸ್ವಾಮಿ ವಿವೇಕಾನಂದೆರ್ ಊರು ತಿರ್ಗೊಂದು ಕೇರಳ ರಾಜ್ಯೊಗು ಬತ್ತೆರ್‍ಗೆ. ಮುಲ್ಪದ ಮೇಲ್, ಕೀಲ್, ಜಾತಿಪದ್ಧತಿನ್ ತೂದು ಮೈಯೇಸ್‍ದ್ ಪಂಡೆರ್‍ಗೆ ‘ಉಂದೊಂಜಿ ಮರ್ಲೆರೆ ಆಸ್ಪತ್ರೆ’. ಉಂದೆನ್ ಬದಲ್ ಮಲ್ಪೊಡಾಂಡ ಆ ದೇವೆರೇ ಭೂಮಿದ ಮಿತ್ತ್ ಬರೊಡಾವು ಪಂಡ್‍ದ್ ಮಿತ್ತನ್ನಾದ್ ಕೈ ಮುಗಿಯೆರ್‍ಗೆ. ಆಂಡ ಅಯಿಡ್ದ್ ಬೊಕ್ಕ 1922ನೇ ಇಸವಿಡ್ ಶಿವಗಿರಿಗ್ ಬತ್ತಿನ ಲೋಕ ಕವಿ ರವೀಂದ್ರನಾಥ ಠಾಗೋರೆರ್ ‘ಯಾನ್ ಲೋಕ ಇಡೀ ತಿರ್ಗುವೆ. ಯೇತೋ ರುಸಿ, ಸನ್ನೇಸಿಲೆನ್ ತೂಪೆ. ದೇವೆರೆಗ್ ಸರಿ
ಯಾದ್ ಪನೊಡಾಂಡ ನಾರಾಯಣ ಗುರುಕ್ಕುಲ್ನಂಚಿನ ಒಂಜಿ ಚೈತನ್ಯ ಶಕ್ತಿನ್ ಯಾನ್ ತೂತುಜಿ. 29 ವರ್ಷೊಡ್ದು ಬೊಕ್ಕ ಆನಿ ವಿವೇಕಾನಂದೆರ್ ತೂತಿನ ಕೇರಳ ಬದಲಾತ್‍ಂಡ್. ಉಂದೆಕ್ಕ್ ನಾರಾಯಣ ಗುರು ಪನ್ಪಿ ಮಹಾತ್ಮೆನೇ ಬರೊಡಾಂಡ್’ ಪಂಡೆರ್‍ಗೆ.

ನಾರಾಯಣ ಗುರು ಕೇರಳೊಡು ಪುಟಿನಾಂಡಲಾ ಆರ್ ಕೇರಳ ರಾಜ್ಯೊಗು ಮಾತ್ರ ಗುರುವಾಯಿಜೆರ್. ಆರ್ ಲೋಕ ಗುರು ಆಯೆರ್. ಇನಿ ಶೂದ್ರೆರ್ ಮಾತೆರ್ಲ ಆರೆನ್ ಪೂಜೆ ಮಲ್ಪೊಡು. ಆರ್ನ ಸಂದೇಶೊನು ಆಚರಣೆ ಮಲ್ಪೊಡು. ಇನಿ ಸಂವಿಧಾನೊಡು ಪಿರ ಒರೀದಿನ ಜಾತಿದಕಲೆಗ್ ಮೀಸಲಾತಿ ತಿಕ್ಕರೆಲಾ ನಾರಾಯಣ ಗುರುಕ್ಕುಲ್ನ ಹೋರಾಟ ಕಾರಣ ಆತ್‍ಂಡ್ ಪಂಡ ನಂಕ್ ಇಚಿತ್ರ ಆವು. ಸಂವಿಧಾನ ಶಿಲ್ಪಿ ಅಂಬೇಡ್ಕರ್‍ಗ್ ಮೇರ್ನ ಪ್ರಭಾವ ಆತ್‍ಂಡ್‍ಗೆ. ಕೇರಳೊಡು ಶೂದ್ರೆರೆಗ್ 300 ರೀತಿದ ತೆರಿಗೆ ಪಾಡೊಂದಿತ್ತೆರ್‍ಗೆ. ಸಮಾಜದ ಕಟ್ಟ್‌ ಪಾಡ್ ಎಂಚ ಇತ್ತ್‌ಂ ಡ್ ಪಂಡ ಕ್ಷತ್ರಿಯೆರ್ ಬೆರಣೆರೆಡ್ದ್ 2 ಅಡಿ ದೂರ ಉಂತೊಡು.ನಾಯರ್ 16 ಅಡಿ ದೂರ, ಈಳವೆ 32 ಅಡಿ ದೂರ, ಪುಲಯ ಬೊಕ್ಕ ಪರಯ ಜಾತಿದಕುಲು 64 ಅಡಿ ದೂರ ಉಂತೊಡಿತ್ತ್‌ಂಡ್. ನಾಯರ್‌ ಜಾತಿದಕುಲು ಬೆರಣೆರೆನ, ನಂಬೂದರಿಲೆನ ಕಣ್ಣ್‌ಗೇ ಬೂರ್ರೆ ಬಲ್ಲಿ, ರಾಜ ಮಾರ್ಗೊಡು ಪೋವರೆ ಬಲ್ಲಿ, ದೇವಸ್ಥಾನೊಲೆಗ್ ಪೊಗ್ಗರೆ ಬಲ್ಲಿ, ಮುಟ್ಟು ಪಾಡರೆ ಬಲ್ಲಿ, ಕೊಡೆ ಪತ್ತರೆ ಬಲ್ಲಿ. ಇಲ್ಲ್ ಕಟ್‍ನಗ ಅಕ್‍ಲ್ನ ಇಲ್ಲಲೆಡ್ದ್ ಎತ್ತರ ಮಲ್ಪರೆ ಬಲ್ಲಿ. ಉಂದು ಕೇರಳೊಡು ಮಾತ್ರ ಅತ್ತ್ ನಮ್ಮ ಊರುಡುಲಾ ಇತ್ತ್‌ಂಡ್. ಅಂಚಾದ್ ಕುಡ್ಲಡ್ ಗೋಕರ್ಣನಾಥ ಕ್ಷೇತ್ರ ತಾಪನೆ ಆವರೆ ಕಾರಣ ಆಂಡ್.

ಇನಿ ದಕ್ಷಿಣ ಕನ್ನಡ ಉಡುಪಿ ಜಿಲ್ಲೆಲೆಡ್ ಅಲ್ಪಲ್ಪ ನಾರಾಯಣ ಗುರು ಮಂದಿರೊಲು ಆವರೆ ಕುದ್ರೊಳಿ ಕ್ಷೇತ್ರ ಕಾರಣ ಆಂಡ್. ಇನಿನಾರಾಯಣ ಗುರುಕ್ಕುಲು ಮೂರ್ತಿ ಆದುಲ್ಲೆರ್. ಆರ್ ಅಕೇರಿಗ್ ‘ನನ ನಿಕುಲು ದೇವಸ್ಥಾನ ಕಟ್ಟುನ ಬೊಡ್ಚಿ. ವಿದ್ಯಾಸಂಸ್ಥೆ
ಲೆನ್ ಕಟ್ಟ್‌ ಲೆ’ ಪಂಡೆರ್‍ಗೆ. ಧರ್ಮದ ನಿರೆಲ್‍ಡ್ ಶಿಕ್ಷಣಬೊಕ್ಕ ಬೌದ್ಧಿಕ ಚಿಂತನೆದ ಒಟ್ಟುಗ್ ನರಮಾನ್ಯ ಗೇನ ಪರಿವರ್ತನೆ ಆವೊಡು. ಸಂಘಟನೆ ಆವೊಡು. ಅಯಿಟ್ ಸಮಾಜೊಗು ಬಲ ಬರ್ಪುಂಡು ಪನೊಂದು 1927ಟ್ಟ್ ಸಿಂಹಳದ ಕಲವನ್ ಕೊಟುಡ್ ಅಕೇರಿದ ದೇವಸ್ಥಾನ ತಾಪನೆ ಮಲ್ತ್‌ ದ್ ಅಲ್ಪ ಮೂರ್ತಿ ದಿವಂದೆ ಕನ್ನಡಿನ್ ತಾಪನೆ ಮಲ್ತೆರ್. ಅಂಚ ತನನ್ ತಾನ್ ತೆರಿದ್ ಸಮಾಜೊನು ಸುಧಾರಣೆ ಮಲ್ಪೊಡು ಪಂಡೆರ್. ನಮ ಯೇಪ ನಮಡ್ದ್ ತಿರ್ತ್‍ದಕ್ಲೆನ್ ನಮಲೆಕ ತೂಪುಜ ಅಪಗ ಮಿತ್ತ್‌ ದಕುಲ್ ನಮನ್ ದೊಂಕುವೆರ್.’ ಇನಿ ಆರ್ನ್ ಪುಟ್ಟ ಪರ್ಬ ಪೊರ್ತುಡು ನಮ ಭಜನೆ ಮಲ್ಪುನ್ ಮಾತ್ರ ಅತ್ತ್ ಆರ್ನ ಸಂದೇಶದ ಅನುಷ್ಠಾನ ಮಲ್ಪುನ ಬೇಲೆ ಮಲ್ತ್‌ಂ ಡ ಮಾತ್ರ ಆರ್ನ ಪೂಜೆಗ್ ನಿಜವಾಯಿನ ಅರ್ಥ ಬರ್ಪುಂಡು. ನರಮಾನ್ಯ ಬದ್‍ಕ್‍ದ ಬೇನೆನ್ ತೂದೇ ಸಿದ್ದಾರ್ಥೆ ಬುದ್ಧೆ ಆಯಿನಂಚ ನಾರಾಯಣ ಗುರು ಮೂತ್ತ ಪಿಳ್ಳೆ ಆಶಾನ್, ಚೆರುವನೂರು ರಮಣ ಪಿಳ್ಳೆ ಆಶಾನ್ ಇಂಚಿತ್ತಿ ಪಂಡಿತೆರ್ಡ ವಿದ್ಯೆ ಕಲ್ತೆರ್. ಸಂಸಾರದ ಕಡಲ್‍ಗ್ ಜಪ್ಪಂದೆ ಲೋಕದ ಬೇನೆನ್ ತುಂಬುನನೇ ಮಲ್ಲ ಸಂಸಾರಂದ್ ಎನ್ನ್‌ದ್ ಸಂಸಾರ ತ್ಯಾಗ ಮಲ್ತೆರ್. ಅಲ್ಪಲ್ಪ ದೇವಸ್ಥಾನೊಲೆನ್ ಕಟ್ಟಾಯೆರ್. ವಿದ್ಯೆ ಬುದ್ಧಿ ದಾಂತಿನ, ಪಿರ ಒರಿದಿನ, ಮುಟ್ಟರೆ ಆವಂದಿನ ಜನೊಕುಲೆಗ್ ತೊಟ್ಟರೆ ಆಪಿಲೆಕ ಮಲ್ತೆರ್.

ಇನಿ ಬಿಲ್ಲವೆರೆಗ್ ಮಾತ್ರ ಅತ್ತ್ ಲೋಕೊಗು ಗುರುವಾದ್ ಮೆರೆಪಿನ ಕರ್ತೆ ಆಯೆರ್. ಇನಿ ಅಲ್ಪಲ್ಪ ನಾರಾಯಣ ಗುರುಕ್ಕುಲ್ನ ಮೂರ್ತಿ ದೀದ್ ಪೂಜೆ ಮಲ್ಪುವ ನಮ. ಭಜನೆ ಮಲ್ಪುವ ನಮ. ಆರ್ ದಾದ ಪಂತೆರ್‍ಂದ್ ತೆರೀದನಾ? ಆರ್ ಕೊರ್ತಿ ಸಂದೇಶದ ವಿದ್ಯೆ, ಧರ್ಮ ಸಂಘಟನೆ ಮಲ್ತೊಂದುಲ್ಲನಾ? ಪನ್ಪಿನೆನ್ ಗೇನದ ಬೊಲ್ಪುಡು ತೂಕ. ನಂಕ್ ಇನಿ ನಾರಾಯಣ ಗುರು ಪಂತಿನ ಮನುಷ್ಯ ಧರ್ಮ ಬೋಡು. ಅರೆನ ಸಂದೇಶದ ಪಾಲನೆ ಬೋಡು. ನಮನ್ ಪಾತಾಲದ ತರ್ಕೆಗ್ ತೊರ್ದಿನ ವೈದಿಕ ಸಂಸ್ಕೃತಿದ ಅಂಗಲಪ್ಪು ನಂಕ್ ಬೊಡ್ಚಿ, ಎಚ್ಚೆಲ್ಮೆಗಾದ್ ಪುದರ್ಗಾದ್ ವೈಭವೊಗಾದ್ ಕಟ್ಟುನ ಪೇರಶಿಲೆ ಕಲ್ಲ್‌ದ ದೇವಸ್ಥಾನ ಬೊಡ್ಚಿ. ಇನಿ ಕರ್ನಾಟಕ ಸರಕಾರ ನಾರಾಯಣ ಗುರು ಜಯಂತಿನ್ ಮಲ್ತೊಂದುಂಡು. ಉಂದು ಎಡ್ಡೆ ವಿಚಾರ. ಆಂಡ ಗುರು ಜಯಂತಿ ಪನ್ಪಿನ ಸರ್ಕಾರಿ ಕಾರ್ಯಕ್ರಮ ಆವರೆ ಬಲ್ಲಿ, ಸರ್ವ ಜನಾಂಗದ ಜನೊಕುಲ್ನ ಕಾರ್ಯಕ್ರಮ ಆವೊಡು.