ಸಂದರ್ಶನ | ಯಕ್ಷಗಾನ–ನಾಟಕ ಬೆಸುಗೆ ಕೆಲಸಕ್ಕೆ ಆದ್ಯತೆ: ಬಿ.ಆರ್. ವೆಂಕಟರಮಣ

ಅರ್ಥಪೂರ್ಣವಾದ ರಂಗ ಭೂಮಿಯನ್ನು ಗಂಭೀರವಾಗಿ ತೆಗೆದುಕೊಂಡು, ಅದನ್ನು ಜನರ ಮಧ್ಯೆ ಕೊಂಡೊಯ್ಯುವುದು ರಂಗಾಯಣದ ಮೂಲ ಉದ್ದೇಶ. ಯಕ್ಷ ರಂಗಾಯಣ ಎಂಬ ಹೆಸರು ಕೇಳಿ ಹಲವರಲ್ಲಿ ಗೊಂದಲ ಉಂಟಾಗುತ್ತಿದೆ. ಇಲ್ಲಿ ಯಕ್ಷಗಾನದ ಸ್ವರೂಪವನ್ನು ರಂಗಭೂಮಿಗೆ ಅಳವಡಿಸಿಕೊಳ್ಳುವುದಿಲ್ಲ. ಕರಾವಳಿಯ ಉದಾತ್ತ ಕಲೆಯ ಸತ್ವವನ್ನು ಇಟ್ಟುಕೊಂಡು ರಂಗಭೂಮಿಯನ್ನು ಬೆಳೆಸುವ ಕಾರ್ಯ ನಡೆಯಲಿದೆ. ಯಕ್ಷಗಾನ ಮತ್ತು ನಾಟಕವನ್ನು ಬೆರಕೆ ಮಾಡುವುದಲ್ಲ, ಎರಡನ್ನು ಬೆಸುಗೆ ಮಾಡುವ ಕೆಲಸಕ್ಕೆ ಆದ್ಯತೆ ನೀಡಲಾಗುವುದು. ಹಾಗೆ ಮಾಡಿದರೆ ರಂಗಭೂಮಿಗೆ ಹೊಸ ಕೊಡುಗೆ ಕೊಟ್ಟಂತೆ ಆಗುತ್ತದೆ.

ಯಕ್ಷ ರಂಗಾಯಣವು ಎರಡು ವರ್ಷಗಳ ಹಿಂದೆಯಷ್ಟೇ ಆರಂಭಗೊಂಡಿದೆ. ಆದ್ದರಿಂದ ಹಲವು ಸವಾಲುಗಳು ನಮ್ಮ ಮುಂದಿವೆ. ಆರನೇ ರಂಗಾಯಣವಾಗಿರುವ ಇದು ಇನ್ನೂ ಪೂರ್ಣ ಪ್ರಮಾಣದಲ್ಲಿ ಸಜ್ಜುಗೊಂಡಿಲ್ಲ. ಪ್ರಾಥಮಿಕ ಹಂತದ ಕೆಲಸಗಳಷ್ಟೇ ನಡೆದಿವೆ. ರಂಗಾಯಣದ ಆಶಯಗಳಿಗನುಗುಣವಾಗಿ ಕೈಗೊಳ್ಳಬೇಕಾದ ಕಾರ್ಯಗಳ ಬಗ್ಗೆ ಚಿಂತನೆ ನಡೆಸಿ ಕಾರ್ಯರೂಪಕ್ಕೆ ತರಲಾಗುವುದು.

ತುಳು ರಂಗಭೂಮಿ ಸೇರಿದಂತೆ ನಿರಂತರವಾಗಿ ರಂಗ ಚಟುವಟಿಕೆಗಳನ್ನು ನಡೆಸುವ ರಂಗ ತಂಡಗಳು, ರಂಗಕರ್ಮಿಗಳು ಕರಾವಳಿ ಜಿಲ್ಲೆಯಲ್ಲಿ ಸಾಕಷ್ಟು ಮಂದಿ ಇದ್ದಾರೆ. ಅವರೆಲ್ಲರಿಂದಲೂ ಸಲಹೆ, ಸಹಕಾರ ಪಡೆದು ಮುಂದಿನ ಯೋಜನೆ ಕಾರ್ಯರೂಪಕ್ಕೆ ತರಲಾಗುವುದು. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಮಾರ್ಗಸೂಚಿಗಳಿಗನುಗುಣವಾಗಿ ಹೊಸ ತಂಡವನ್ನು ರಚಿಸಿ, ರಂಗಭೂಮಿಗೆ ಪೂರಕವಾದ ಚಟುವಟಿಕೆಗಳನ್ನು ನಡೆಸಲಾಗುವುದು.

ನಟರನ್ನು ಆಯ್ಕೆ ಮಾಡಿದ ಬಳಿಕ ಅವರಿಗೆ ತರಬೇತಿ ನೀಡುವಲ್ಲಿ ಆಯಾ ರಂಗಾಯಣದವರು ಬೇರೆ ಬೇರೆ ರೀತಿ ಯೋಜನೆ ರೂಪಿಸುತ್ತಾರೆ. ಇಲ್ಲಿ ದೇಶಿ ರಂಗಭೂಮಿಯ ಸಾಧ್ಯತೆಗಳನ್ನು ಮನಗಂಡು ಆಧುನಿಕ ರಂಗಭೂಮಿಯನ್ನು ರೂಪಿಸುವ ನಿಟ್ಟಿನಲ್ಲಿ ಕಾರ್ಯ ಪ್ರವೃತ್ತನಾಗಬೇಕೆನ್ನುವುದು ನನ್ನ ಆಶಯ. ನಾವು ತರಬೇತಿ ನೀಡಿದವರು ಬೇರೆ ಕಡೆಗೆ ಹೋಗಿ ರಂಗ ಪ್ರದರ್ಶನ ನೀಡಬೇಕು. ಅವರನ್ನು ರಂಗಭೂಮಿಯಲ್ಲಿ ಸಮರ್ಥರನ್ನಾಗಿಸುವ ನಿಟ್ಟಿನಲ್ಲಿ ಯೋಜನೆ ರೂಪಿಸಲಿದ್ದೇವೆ.