50 ವರ್ಷದ ಹಿಂದೆ: ನಲ್ಲಿಯಲ್ಲಿ ಹಾವಿನ ಮರಿ?!

ನಲ್ಲಿಯಲ್ಲಿ ಹಾವಿನ ಮರಿ?!

ಚಿಕ್ಕಮಗಳೂರು, ಸೆ. 16– ಇಲ್ಲಿಯ ಕ್ರೈಸ್ತ ಕಾಲೊನಿಯಲ್ಲಿ ಅಲ್ಲಿಯ ನಿವಾಸಿಯೊಬ್ಬರು ಇಂದು ಬೆಳಿಗ್ಗೆ ಮುಖ ತೊಳೆಯಲು ನಲ್ಲಿ ತಿರುಗಿಸಿದಾಗ ನಾಗರ ಹಾವನ್ನು ಹೋಲುವ 11 ಅಂಗುಲದ ಜೀವಿಯೊಂದು ಕೆಳಗೆ ಬಿತ್ತೆಂದು ಗೊತ್ತಾಗಿದೆ.

ಅದನ್ನು ಒಂದು ಸೀಸೆಯಲ್ಲಿ ಹಾಕಿ ಜಿಲ್ಲಾಧಿಕಾರಿ ಕಚೇರಿಗೆ ಅವರು ಕಳುಹಿಸಿದರು. ಈ ಮಧ್ಯೆ ‍ಪುರಸಭೆಯ ಕಾರ್ಯನಿರ್ವಹಣಾ ಅಧಿಕಾರಿ ನಾರಾಯಣ್, ಪತ್ರಕರ್ತರನ್ನು ನೀರು ಶುದ್ಧೀಕರಣ ಮಾಡುವ ಸ್ಥಳಕ್ಕೆ ಕರೆದೊಯ್ದು, ಜೀವಂತ ಪ್ರಾಣಿಗಳಾವುವೂ ಶುದ್ಧೀಕರಣ ಮಾಡಿದ ಜಲಾಶಯದೊಳಕ್ಕೆ ಹೋಗಲು ಸಾಧ್ಯವಿಲ್ಲ ಎಂಬುದನ್ನು ತೋರಿಸಿದರು. ಪೈಪ್‌ನಲ್ಲಿ ನೀರು ಸೋರುವ ಕಡೆ ಎಲ್ಲೋ ಅದು ಒಳಹೊಕ್ಕಿರಬಹುದೆಂದು ಊಹಿಸಲಾಗಿದೆ. ಸಣ್ಣ ನಾಗರಹಾವು ಅಥವಾ ಲಾಡಿ ಹುಳದಂತಿರುವ ಈ ಜೀವಿ ಬಹಳ ಅಪರೂಪವೆಂದು ಹೇಳಲಾಗುತ್ತಿದೆ.