ಪ್ರಯಾಣಿಕರ ಮೇಲೆ ದಯೆ ಇರಲಿ

ದೂರ ಪ್ರಯಾಣದ ಕೆಎಸ್‌ಆರ್‌ಟಿಸಿ ಲಕ್ಷುರಿ ಬಸ್ಸುಗಳು ಈಗ ಚಲಿಸುವ  ತಿಗಣೆ  ಸಾಕಣೆ  ಕೇಂದ್ರಗಳಾಗಿ  ಮಾರ್ಪಾಟಾಗಿವೆ. ಈ ಬಸ್ಸುಗಳಲ್ಲಿ ರಾತ್ರಿ ದೂರ ಪ್ರಯಾಣ ಮಾಡುವವರು ಒಂದು ಯೂನಿಟ್  ರಕ್ತದಾನಕ್ಕಾದರೂ ಸಿದ್ಧರಾಗಿರಬೇಕು.

ಈ ‘ತಿಗಣೆ- ಸಾರಿಗೆ’ ಬಸ್ಸುಗಳಲ್ಲಿ ಒಮ್ಮೆ ಪ್ರಯಾಣಿಸಿದರೆ  ತಿಗಣೆ ಮತ್ತು ಪ್ರಯಾಣಿಕನ  ರಕ್ತ ಸಂಬಂಧ ಅಲ್ಲಿಗೇ ಮುಗಿಯುವುದಿಲ್ಲ. ಕಾರಣ ಈ ಬಸ್ಸಿನ  ಕೆಲವು ಸ್ನೇಹಮಯಿ  ತಿಗಣೆಗಳು ತಮ್ಮ ಕುಟುಂಬ ಸಮೇತ ನಮ್ಮ ಬಟ್ಟೆ ಬ್ಯಾಗುಗಳಲ್ಲಿ ಸೇರಿಕೊಂಡು ನಮ್ಮ ಮನೆಗೂ ವಲಸೆ ಬಂದು ಅಲ್ಲಿಯೂ ತಮ್ಮ ಸಂಸಾರ ಭರ್ಜರಿಯಾಗಿ ಬೆಳೆಸುತ್ತವೆ.  ಸರ್ಕಾರಿ ಬಸ್ಸಿನವರು ಇದರ ನಿರ್ಮೂಲನೆಯ ಕೆಲಸದ ಹೊರಗುತ್ತಿಗೆ ಯಾಕೆ ಕೊಡುತ್ತಿಲ್ಲ ಎನ್ನುವುದು ಅರ್ಥವಾಗುತ್ತಿಲ್ಲ.