ಕರ್ನಲ್‌ ಸಿ.ಕೆ. ನಾಯ್ಡು ಟ್ರೋಫಿ: ಕರ್ನಾಟಕ ತಂಡಕ್ಕೆ ಅನೀಶ್ವರ್‌ ನಾಯಕ

ಬೆಂಗಳೂರು: ಅನೀಶ್ವರ್‌ ಗೌತಮ್‌ ಅವರು ಇದೇ 15ರಿಂದ 18ರವರೆಗೆ ಒಡಿಶಾದ ಬಲಂಗೀರ್ ಗಾಂಧಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಕರ್ನಲ್‌ ಸಿ.ಕೆ. ನಾಯ್ಡು ಟ್ರೋಫಿ ಟೂರ್ನಿಯಲ್ಲಿ ಚಂಡೀಗಢ ವಿರುದ್ಧದ ಪಂದ್ಯದಲ್ಲಿ ಕರ್ನಾಟಕ ತಂಡವನ್ನು ಮುನ್ನಡೆಸಲಿದ್ದಾರೆ.

ಮೂರು ಪಂದ್ಯಗಳಲ್ಲಿ ಒಂದನ್ನು ಗೆದ್ದು, ಎರಡರಲ್ಲಿ ಡ್ರಾ ಸಾಧಿಸಿರುವ ಕರ್ನಾಟಕ ತಂಡವು 30 ಅಂಕಗಳೊಂದಿಗೆ ಎ ಗುಂಪಿನಲ್ಲಿ ಮೂರನೇ ಸ್ಥಾನದಲ್ಲಿದೆ. ತಮಿಳುನಾಡು (33) ಮತ್ತು ಮಹಾರಾಷ್ಟ್ರ (30) ಕ್ರಮವಾಗಿ ನಂತರದ ಸ್ಥಾನದಲ್ಲಿದೆ. ಹಾಲಿ ಚಾಂಪಿಯನ್‌ ಕರ್ನಾಟಕ ತಂಡವು ನಾಲ್ಕನೇ ಪಂದ್ಯದಲ್ಲಿ ಉತ್ತಮ ಪ್ರದರ್ಶನದ ವಿಶ್ವಾಸದಲ್ಲಿದೆ.

ಕರ್ನಾಟಕ ತಂಡ ಹೀಗಿದೆ: ಅನೀಶ್ವರ್‌ ಗೌತಮ್‌ (ನಾಯಕ), ಕೃತಿಕ್ ಕೃಷ್ಣ (ಉಪನಾಯಕ/ ವಿಕೆಟ್‌ ಕೀಪರ್‌), ವಿಶಾಲ್ ಓನತ್‌, ಮ್ಯಾಕ್ನಿಲ್ ನೊರೊನ್ಹಾ, ಪ್ರಖರ್ ಚತುರ್ವೇದಿ, ಹರ್ಷಿಲ್ ಧರ್ಮಾನಿ, ಮನ್ವಂತ್ ಕುಮಾರ್ ಎಲ್, ಮೋನಿಶ್ ರೆಡ್ಡಿ, ಶಶಿಕುಮಾರ್ ಕೆ, ಪಾರಸ್ ಗುರುಬಕ್ಷ್‌ ಆರ್ಯ, ಸಂಜಯ್ ಅಶ್ವಿನ್ (ವಿಕೆಟ್‌ ಕೀಪರ್‌), ಧನುಷ್ ಗೌಡ, ಧ್ರುವ ಪ್ರಭಾಕರ್, ರಾಜವೀರ್ ವಾಧ್ವಾ, ಶಿಖರ್ ಶೆಟ್ಟಿ, ಜಾಸ್ಪರ್ ಇ.ಜೆ.