ಅಫ್ಗಾನಿಸ್ತಾನ VS ನ್ಯೂಜಿಲೆಂಡ್ ಏಕೈಕ ಟೆಸ್ಟ್: ಮೂರನೇ ದಿನದಾಟವೂ ರದ್ದು
ಗ್ರೇಟರ್ ನೋಯ್ಡಾ ಕ್ರೀಡಾಂಗಣಕ್ಕೆ ಹುಲ್ಲು ತೇಪೆಗಳನ್ನು ಹಾಕುತ್ತಿರುವುದು
–ಪಿಟಿಐ ಚಿತ್ರ
ಗ್ರೇಟರ್ ನೊಯ್ಡಾ: ಅಫ್ಗಾನಿಸ್ತಾನ ಮತ್ತು ನ್ಯೂಜಿಲೆಂಡ್ ನಡುವಣ ಏಕೈಕ ಟೆಸ್ಟ್ ಪಂದ್ಯಕ್ಕೆ ಮಳೆ ಕೃಪೆದೋರುವಂತೆ ಕಾಣುತ್ತಿಲ್ಲ. ಕ್ರೀಡಾಂಗಣ ತೇವಗೊಂಡಿದ್ದ ಕಾರಣ ಟೆಸ್ಟ್ ಪಂದ್ಯದ ಮೂರನೇ ದಿನದಾಟ ಬುಧವಾರ ಒಂದೂ ಎಸೆತ ಕಾಣದೇ ರದ್ದುಗೊಂಡಿತು.
ಮೊದಲ ಎರಡು ದಿನ ಕ್ರೀಡಾಂಗಣದ ಕೆಲಭಾಗ ಕೊಚ್ಚಿಯಾಗಿದ್ದ ಕಾರಣ ಆಟ ಸಾಧ್ಯವಾಗಿರಲಿಲ್ಲ. ಅಷ್ಟೇ ಏಕೆ, ಟಾಸ್‌ ಕೂಡ ನಡೆದಿರಲಿಲ್ಲ.
ಮಂಗಳವಾರ ಸಂಜೆ ನವದೆಹಲಿಯ ಅರುಣ್ ಜೇಟ್ಲಿ ಕ್ರೀಡಾಂಗಣದಿಂದ ಪಿಚ್‌ ಮುಚ್ಚಲು ಕವರ್‌ಗಳನ್ನು ತರಲಾಗಿತ್ತು. ಆದರೆ, ರಾತ್ರಿ ಸುರಿದ ಮಳೆಯಿಂದ ಇತರ ಕೆಲವು ಭಾಗಗಳಲ್ಲಿ ನೀರು ನಿಂತಿತ್ತು. ಹೀಗಾಗಿ ಹೆಚ್ಚು ಸಮಯ ತೆಗೆದುಕೊಳ್ಳದೇ ಅಂಪೈರ್‌ಗಳು ದಿನದಾಟವನ್ನು ಬೇಗನೇ ರದ್ದುಗೊಳಿಸುವ ನಿರ್ಧಾರಕ್ಕೆ ಬಂದರು.
‘ಬಿಟ್ಟುಬಿಟ್ಟು ಬಂದ ಮಳೆಯಿಂದಾಗಿ ಮೂರನೇ ದಿನದಾಟ ರದ್ದುಗೊಳಿಸಲಾಗಿದೆ. ಮಳೆಯಿಲ್ಲದೇ ಹೋದಲ್ಲಿ ನಾಳೆಯಿಂದ 98 ಓವರುಗಳ ಆಟ ನಡೆಯಲಿದೆ’ ಎಂದು ಅಫ್ಗಾನಿಸ್ತಾನ ಕ್ರಿಕೆಟ್ ಮಂಡಳಿ ಹೇಳಿಕೆಯಲ್ಲಿ ತಿಳಿಸಿದೆ.
ಈ ಪಂದ್ಯ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ನ ಭಾಗವಾಗಿಲ್ಲ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.