ರಿಕಿ ಪಾಂಟಿಂಗ್ ಕೈಬಿಟ್ಟ ಡೆಲ್ಲಿ

ನವದೆಹಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟೂರ್ನಿಯಲ್ಲಿ ಆಡುವ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಮುಖ್ಯ ಕೋಚ್ ಸ್ಥಾನದಿಂದ ರಿಕಿ ಪಾಂಟಿಂಗ್ ಅವರನ್ನು ಕೈಬಿಡಲಾಗಿದೆ. 

ಕಳೆದ ಏಳು ವರ್ಷಗಳಿಂದ ಅವರು ತಂಡದ ಮುಖ್ಯ ಕೋಚ್ ಆಗಿದ್ದರು. ಇದೇ ತಂಡದ ನಿರ್ದೇಶಕರಾಗಿದ್ದ  ಸೌರವ್ ಗಂಗೂಲಿ ಅವರು ಮುಂದಿನ ಆವೃತಿಯಲ್ಲಿ ಮುಖ್ಯ ಕೋಚ್ ಆಗಿ ನೇಮಕಗೊಳ್ಳುವ ಸಾಧ್ಯತೆ ಇದೆ. 

‘ತಾವು (ರಿಕಿ) ನಮ್ಮ ತಂಡದ ಕೋಚ್ ಹುದ್ದೆಯಿಂದ ನಿರ್ಗಮಿಸುತ್ತಿದ್ದೀರಿ. ಕಳೆದ ಏಳು ವರ್ಷಗಳಲ್ಲಿ ಪ್ರತಿ ಹಂತದಲ್ಲಿಯೂ ಕಾಳಜಿ, ಬದ್ಧತೆ, ನಡವಳಿಕೆ ಮತ್ತು ಪರಿಶ್ರಮ ಕುರಿತು ಮನವರಿಕೆ ಮಾಡಿಕೊಟ್ಟಿದ್ದೀರಿ’ ಎಂದು ಫ್ರ್ಯಾಂಚೈಸಿಯು ಎಕ್ಸ್‌ ಖಾತೆಯಲ್ಲಿ ಸಂದೇಶ ಹಾಕಿದೆ. 

‘ಫ್ರ್ಯಾಂಚೈಸಿ ಮ್ಯಾನೇಜ್‌ಮೆಂಟ್‌ನ ಉನ್ನತ ಸ್ಥಾನದಲ್ಲಿರುವವರು ರಿಕಿ ಕಾರ್ಯವೈಖರಿಯ ಬಗ್ಗೆ ಅಸಮಾಧಾನಗೊಂಡಿದ್ದರೆನ್ನಲಾಗಿದೆ.  ಅವರ ಅವಧಿಯಲ್ಲಿ ತಂಡವು ಪ್ರಶಸ್ತಿ ಗೆಲ್ಲದಿರುವುದು ಇದಕ್ಕೆ ಕಾರಣ. ಮುಂದಿನ ಟೂರ್ನಿಯಿಂದ ನೆರವು ಸಿಬ್ಬಂದಿಯನ್ನು ಬದಲಾಯಿಸುವ ಇರಾದೆಯೂ ಮ್ಯಾನೇಜ್‌ಮೆಂಟ್‌ಗೆ ಇದೆ’ ಎಂದು ಮೂಲಗಳು ತಿಳಿಸಿವೆ.