ಕ್ರಿಕೆಟ್: ಪ್ರಸಿದ್ಧ, ಈಶ್ವರನ್ ಮೇಲೆ ಕಣ್ಣು

ಮೆಕೆ, ಆಸ್ಟ್ರೇಲಿಯಾ (ಪಿಟಿಐ): ಭಾರತ ಎ ಮತ್ತು ಆಸ್ಟ್ರೇಲಿಯಾ ತಂಡಗಳ ನಡುವಣ ಗುರುವಾರ ಚತುರ್ದಿನ ಕ್ರಿಕೆಟ್ ಪಂದ್ಯವು ಆರಂಭವಾಗಲಿದೆ. 

ಭಾರತ ಎ ತಂಡದಲ್ಲಿರುವ ಬ್ಯಾಟರ್ ಅಭಿಮನ್ಯು ಈಶ್ವರನ್, ನಿತೀಶ್ ಕುಮಾರ್ ರೆಡ್ಡಿ ಹಾಗೂ ಕರ್ನಾಟಕದ ವೇಗಿ ಪ್ರಸಿದ್ಧ ಕೃಷ್ಣ ಅವರ ಮೇಲೆ ಎಲ್ಲರ ಚಿತ್ತ ನೆಟ್ಟಿದೆ. 

ನ. 22ರಿಂದ ಬಾರ್ಡರ್‌–ಗಾವಸ್ಕರ್ ಟೆಸ್ಟ್ ಸರಣಿ ಆರಂಭವಾಗಲಿದೆ. ಅದರಿಂದಾಗಿ ಎ ತಂಡಗಳ ನಡುವಣ ಪಂದ್ಯದಲ್ಲಿ ಮಿಂಚುವ ಆಟಗಾರರಿಗೆ ಭಾರತ ಸೀನಿಯರ್ ತಂಡದಲ್ಲಿ ಆಡುವ ಅವಕಾಶ ಗಿಟ್ಟಿಸುವ ಸಾಧ್ಯತೆ ಇದೆ. ಅಜಿತ್ ಆಗರ್ಕರ್ ನೇತೃತ್ವದ ಆಯ್ಕೆ ಸಮಿತಿಯು  ಈ ಪಂದ್ಯದ ಮೇಲೆ ನಿಗಾ ವಹಿಸಿದೆ. 

ಆತಿಥೇಯ ತಂಡವನ್ನು ನೇಥನ್ ಮ್ಯಾಕ್‌ಸ್ವೀನಿ ಮುನ್ನಡೆಸಲಿದ್ದಾರೆ. ಭಾರತ ಎ ತಂಡಕ್ಕೆ ಋತುರಾಜ್ ಗಾಯಕವಾಡ ನಾಯಕರಾಗಿದ್ದಾರೆ. ಈ ತಂಡದಲ್ಲಿ ಕರ್ನಾಟಕದ ದೇವದತ್ತ ಪಡಿಕ್ಕಲ್ ಕೂಡ ಇದ್ದಾರೆ.