ಮೂರನೇ ಟ್ವೆಂಟಿ–20 ಕ್ರಿಕೆಟ್‌ ಪಂದ್ಯ: ನ್ಯೂಜಿಲೆಂಡ್‌ಗೆ ಮಣಿದ ಇಂಗ್ಲೆಂಡ್‌
ಗ್ರ್ಯಾಂಡ್ಹೋಮ್ ಅರ್ಧಶತಕ
ನೆಲ್ಸನ್‌: ನಿರ್ಣಾಯಕ ಘಟ್ಟದಲ್ಲಿ 10ರನ್‌ ಗಳಿಸುವಷ್ಟರಲ್ಲಿ ಐದು ವಿಕೆಟ್‌ ಕಳೆದುಕೊಂಡ ಇಂಗ್ಲೆಂಡ್‌ ತಂಡ ನ್ಯೂಜಿಲೆಂಡ್ ಎದುರಿನ ಮೂರನೇ ಟ್ವೆಂಟಿ–20 ಕ್ರಿಕೆಟ್‌ ಪಂದ್ಯದಲ್ಲಿ 14ರನ್‌ಗಳಿಂದ ಸೋತಿದೆ.
ಈ ಜಯದೊಂದಿಗೆ ಟಿಮ್‌ ಸೌಥಿ ಸಾರಥ್ಯದ ನ್ಯೂಜಿಲೆಂಡ್ 5 ಪಂದ್ಯಗಳ ಸರಣಿಯಲ್ಲಿ 2–1 ಮುನ್ನಡೆ ಪಡೆದಿದೆ.
181ರನ್‌ಗಳ ಗೆಲುವಿನ ಗುರಿ ಬೆನ್ನಟ್ಟಿದ್ದ ಇಂಗ್ಲೆಂಡ್‌ ತಂಡ ಒಂದು ಹಂತದಲ್ಲಿ 2 ವಿಕೆಟ್‌ಗೆ 139ರನ್‌ ಕಲೆಹಾಕಿ ಸುಸ್ಥಿತಿಯಲ್ಲಿತ್ತು. ಮಿಷೆಲ್‌ ಸ್ಯಾಂಟನರ್‌ ಹಾಕಿದ 15ನೇ ಓವರ್‌ನ ಕೊನೆಯ ಎಸೆತದಲ್ಲಿ ನಾಯಕ ಎಯೊನ್‌ ಮಾರ್ಗನ್‌ (18; 13ಎ, 2ಸಿ) ಔಟಾಗುತ್ತಿದ್ದಂತೆ ಪ್ರವಾಸಿ ಪಡೆ ಕುಸಿತದ ಹಾದಿ ಹಿಡಿಯಿತು.
ಸ್ಯಾಮ್‌ ಬಿಲ್ಲಿಂಗ್ಸ್‌ (1), ಸ್ಯಾಮ್‌ ಕರನ್‌ (2) ಮತ್ತು ಲೂಯಿಸ್‌ ಗ್ರೆಗೋರಿ (0) ಬಂದಷ್ಟೇ ವೇಗವಾಗಿ ಪೆವಿಲಿಯನ್‌ ಸೇರಿದರು. ಜೇಮ್ಸ್‌ ವಿನ್ಸ್‌ (49; 39ಎ, 4ಬೌಂ, 1ಸಿ) ಅರ್ಧಶತಕದ ಅಂಚಿನಲ್ಲಿ ಎಡವಿದರು.
ಡೇವಿಡ್ ಮಲಾನ್‌ (55; 34ಎ, 8ಬೌಂ, 1ಸಿ) ಅವರ ಪ್ರಯತ್ನಕ್ಕೆ ಫಲ ಸಿಗಲಿಲ್ಲ.
ಅಬ್ಬರದ ಆರಂಭ: ಮೊದಲು ಬ್ಯಾಟ್‌ ಮಾಡಿದ ನ್ಯೂಜಿಲೆಂಡ್ ತಂಡಕ್ಕೆ ಕಾಲಿನ್‌ ಮನ್ರೊ (6; 8ಎ) ಮತ್ತು ಮಾರ್ಟಿನ್‌ ಗಪ್ಟಿಲ್‌ (33; 17ಎ, 7ಬೌಂ) ಅಬ್ಬರದ ಆರಂಭ ನೀಡಿದರು. ಈ ಜೋಡಿ ಮೊದಲ ವಿಕೆಟ್‌ಗೆ 23 ಎಸೆತಗಳಲ್ಲಿ 40ರನ್‌ ಕಲೆಹಾಕಿತು.
ಎರಡು ರನ್‌ಗಳ ಅಂತರದಲ್ಲಿ ಇವರಿಬ್ಬರೂ ಔಟಾದರು. ಇದರ ಬೆನ್ನಲ್ಲೇ ಟಿಮ್‌ ಸೀಫರ್ಟ್‌ (7) ಕೂಡ ಪೆವಿಲಿಯನ್‌ ಸೇರಿದರು. ನಂತರ ಕಾಲಿನ್‌ ಡಿ ಗ್ರ್ಯಾಂಡ್ಹೋಮ್ (55; 35ಎ, 5ಬೌಂ, 3ಸಿ) ಮತ್ತು ರಾಸ್‌ ಟೇಲರ್‌ (27; 24ಎ, 2ಬೌಂ, 1ಸಿ) ಜವಾಬ್ದಾರಿಯುತ ಇನಿಂಗ್ಸ್‌ ಕಟ್ಟಿದರು. ಇವರು ನಾಲ್ಕನೇ ವಿಕೆಟ್‌ಗೆ 66ರನ್‌ ಸೇರಿಸಿದರು.
ಬಳಿಕ ಜೇಮ್ಸ್‌ ನೀಶಮ್‌ (20; 15ಎ, 2ಬೌಂ, 1ಸಿ) ಮತ್ತು ಮಿಷೆಲ್‌ ಸ್ಯಾಂಟನರ್‌ (15; 9ಎ, 2ಬೌಂ) ತಂಡದ ಮೊತ್ತ ಹೆಚ್ಚಿಸಿದರು.
ಸಂಕ್ಷಿಪ್ತ ಸ್ಕೋರ್‌
ನ್ಯೂಜಿಲೆಂಡ್: 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 180 (ಮಾರ್ಟಿನ್‌ ಗಪ್ಟಿಲ್‌ 33, ಕಾಲಿನ್‌ ಡಿ ಗ್ರ್ಯಾಂಡ್ಹೋಮ್ 55, ರಾಸ್‌ ಟೇಲರ್‌ 27, ಜೇಮ್ಸ್‌ ನೀಶಮ್‌ 20, ಮಿಷೆಲ್‌ ಸ್ಯಾಂಟನರ್‌ 15; ಸ್ಯಾಮ್‌ ಕರನ್‌ 29ಕ್ಕೆ1, ಟಾಮ್‌ ಕರನ್‌ 29ಕ್ಕೆ2, ಪ್ಯಾಟ್ರಿಕ್‌ ಬ್ರೌನ್‌ 34ಕ್ಕೆ1, ಮ್ಯಾಥ್ಯೂ ಪಾರ್ಕಿನ್‌ಸನ್‌ 14ಕ್ಕೆ1).
ಇಂಗ್ಲೆಂಡ್‌: 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 166 (ಡೇವಿಡ್ ಮಲಾನ್‌ 55, ಜೇಮ್ಸ್‌ ವಿನ್ಸ್‌ 49, ಎಯೊನ್‌ ಮಾರ್ಗನ್‌ 18, ಟಾಮ್‌ ಕರನ್‌ ಔಟಾಗದೆ 14; ಲಾಕಿ ಫರ್ಗ್ಯೂಸನ್‌ 25ಕ್ಕೆ2, ಬ್ಲೇರ್‌ ಟಿಕ್ನರ್‌ 25ಕ್ಕೆ2).
ಫಲಿತಾಂಶ: ನ್ಯೂಜಿಲೆಂಡ್‌ಗೆ 14ರನ್‌ ಗೆಲುವು.
ಪಂದ್ಯಶ್ರೇಷ್ಠ: ಕಾಲಿನ್‌ ಡಿ ಗ್ರ್ಯಾಂಡ್ಹೋಮ್.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.