ಕ್ರಿಕೆಟ್: ಶರವೇಗದ ದ್ವಿಶತಕ ಗಳಿಸಿದ ಚಾದ್ ಬೋವ್ಸ್

ವೆಲಿಂಗ್ಟನ್: ನ್ಯೂಜಿಲೆಂಡ್‌ ಆಟಗಾರ ಚಾದ್ ಬೌವ್ಸ್‌ ಲಿಸ್ಟ್ ಎ ಕ್ರಿಕೆಟ್‌ನಲ್ಲಿ ಶರವೇಗದ ದ್ವಿಶತಕ ಗಳಿಸಿದರು. 

ಬುಧವಾರ ಇಲ್ಲಿ ನಡೆದ ಫೋರ್ಡ್ ಟ್ರೋಫಿ ಕ್ರಿಕೆಟ್  ಟೂರ್ನಿಯಲ್ಲಿ ಕ್ಯಾಂಟರ್‌ಬರಿ ತಂಡವನ್ನು ಪ್ರತಿನಿಧಿಸಿದ ಚಾದ್ ಅವರು ಒಟಾಗೊ ವಿರುದ್ಧ ನಡೆದ ಪಂದ್ಯದಲ್ಲಿ 103 ಎಸೆತಗಳಲ್ಲಿ ದ್ವಿಶತಕ ಗಳಿಸಿದರು. ಇದರೊಂದಿಗೆ ಭಾರತದ ಎನ್‌. ಜಗದೀಶನ್ ಮತ್ತು ಆಸ್ಟ್ರೇಲಿಯಾದ ಟ್ರಾವಿಸ್ ಹೆಡ್ ಅವರ ದಾಖಲೆಗಳನ್ನು ಮೀರಿ ನಿಂತರು.

ಜಗದೀಶನ್ ಮತ್ತು ಟ್ರಾವಿಸ್ ಅವರು 114 ಎಸೆತಗಳಲ್ಲಿ ದ್ವಿಶತಕ ಗಳಿಸಿದ್ದರು. ತಮಿಳುನಾಡಿನ ಜಗದೀಶನ್ 2 ವರ್ಷಗಳ ಹಿಂದೆ ವಿಜಯ್ ಹಜಾರೆ ಟ್ರೋಫಿ ಟೂರ್ನಿಯಲ್ಲಿ ಅರುಣಾಚಲ ಪ್ರದೇಶ ಎದುರು ಈ ಸಾಧನೆ ಮಾಡಿದ್ದರು. ಸೌಥ್ ಆಸ್ಟ್ರೆಲಿಯಾದ ಹೆಡ್ ಅವರು ಕ್ವಿನ್ಸ್‌ಲೆಂಡ್ ವಿರುದ್ಧ ಮಾರ್ಷ್ ಕಪ್‌ (2022) ಟೂರ್ನಿಯಲ್ಲಿ ಮಿಂಚಿನ ದ್ವಿಶತಕ ಗಳಿಸಿದ್ದರು. 

ದಕ್ಷಿಣ ಆಫ್ರಿಕಾದಲ್ಲಿ ಜನಿಸಿ ನ್ಯೂಜಿಲೆಂಡ್ ತಂಡವನ್ನು ಪ್ರತಿನಿಧಿಸುವ ಚಾದ್ ಈ ಏಕದಿನ ಪಂದ್ಯದಲ್ಲಿ ಒಟ್ಟು 110 ಎಸೆತಗಳಲ್ಲಿ 205 ರನ್ ಗಳಿಸಿ ಔಟಾದರು. 53 ಎಸೆತಗಳಲ್ಲಿ ಶತಕದ ಗಡಿ ದಾಟಿದರು. ಇದು ಅವರ 100ನೇ ಲಿಸ್ಟ್ ಎ ಪಂದ್ಯ. 27 ಬೌಂಡರಿ ಮತ್ತು ಏಳು ಸಿಕ್ಸರ್‌ ಗಳಿಸಿದರು.