ರಣಜಿ ಟ್ರೋಫಿ ಕ್ರಿಕೆಟ್: ಆತಂಕದಲ್ಲಿರುವ ಆತಿಥೇಯರಿಗೆ ಅಭಿನವ್ ಆಸರೆ

ಬೆಂಗಳೂರು: ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ರಣಜಿ ಟ್ರೋಫಿ ಕ್ರಿಕೆಟ್ ಪಂದ್ಯದ ಎರಡನೇ ದಿನವಾಟವು  ಮಂದಬೆಳಕಿನಿಂದಾಗಿ ಸ್ಥಗಿತವಾಯಿತು. ಆತಿಥೇಯ ಕರ್ನಾಟಕದ ಬಳಗದಲ್ಲಿಯೂ ಅಂತಹದೇ ನಿರಾಶೆಯ ಛಾಯೆ ಆವರಿಸಿತ್ತು.  

ಮಯಂಕ್ ಅಗರವಾಲ್ ಬಳಗದ ಅಗ್ರಕ್ರಮಾಂಕದ ಬ್ಯಾಟರ್‌ಗಳು ಇಲ್ಲಿ ನಡೆಯುತ್ತಿರುವ ಸಿ ಗುಂಪಿನ ಪಂದ್ಯದಲ್ಲಿ ಬಂಗಾಳ ಎದುರು ಮುಗ್ಗರಿಸಿದ್ದೇ ಇದಕ್ಕೆ ಕಾರಣ. ಇದೀಗ ಕ್ರೀಸ್‌ನಲ್ಲಿರುವ ಅಭಿನವ್ ಮನೋಹರ್ (ಬ್ಯಾಟಿಂಗ್ 50; 73ಎ) ಮತ್ತು ಅನುಭವಿ ಆಲ್‌ರೌಂಡರ್ ಶ್ರೇಯಸ್ ಗೋಪಾಲ್ (ಬ್ಯಾಟಿಂಗ್ 23; 55ಎ) ಅವರ ಮೇಲೆ ನಿರೀಕ್ಷೆಯ ಭಾರ ಇದೆ. 

ಪ್ರಮುಖ ಬೌಲರ್‌ಗಳ ಕೊರತೆಯ ನಡುವೆ ಮಿಂಚಿದ ವಾಸುಕಿ ಕೌಶಿಕ್ (38ಕ್ಕೆ5) ಬಂಗಾಳ ತಂಡವನ್ನು ಮೊದಲ ಇನಿಂಗ್ಸ್‌ನಲ್ಲಿ 301 ರನ್‌ಗಳಿಗೆ ನಿಯಂತ್ರಿಸುವಲ್ಲಿ ಆತಿಥೇಯರು ಯಶಸ್ವಿಯಾದರು.  ಆದರೆ ಈ ಸಂತಸ ಬಹಳ ಹೊತ್ತು ಉಳಿಯಲಿಲ್ಲ. 

ಕರ್ನಾಟಕ ಇನಿಂಗ್ಸ್‌ನ ಊಟ ಹಾಗೂ ಚಹಾ ವಿರಾಮದ ನಡುವಿನ ಅವಧಿಯಲ್ಲಿ 4 ವಿಕೆಟ್‌ಗಳು ಉರುಳಿದವು. ದಿನದಾಟದ ಕೊನೆಯ ಅವಧಿಯಲ್ಲಿಯೂ ಒಂದು ವಿಕೆಟ್ ಪತನವಾಯಿತು. ಆಗಿನ್ನೂ ತಂಡದ ಮೊತ್ತ 100ರ ಗಡಿಯನ್ನೂ ಮುಟ್ಟಿರಲಿಲ್ಲ.  ಈ ಹಂತದಲ್ಲಿ ಮನೋಹರ್ ಮತ್ತು ಶ್ರೇಯಸ್ ಆಸರೆಯಾದರು. ಇದರಿಂದಾಗಿ  ದಿನದಾಟದ ಮುಕ್ತಾಯಕ್ಕೆ ತಂಡವು 51 ಓವರ್‌ಗಳಲ್ಲಿ 5 ವಿಕೆಟ್‌ಗಳಿಗೆ 155 ರನ್ ಗಳಿಸಿತು.  ಮೊದಲ ಇನಿಂಗ್ಸ್‌ ಮುನ್ನಡೆ ಸಾಧಿಸಬೇಕಾದರೆ ಇನ್ನೂ 146 ರನ್‌ ಗಳಿಸಬೇಕಿದೆ. ಅಭಿನವ್ ಮತ್ತು ಶ್ರೇಯಸ್ ಮುರಿಯದ 6ನೇ ವಿಕೆಟ್ ಜೊತೆಯಾಟದಲ್ಲಿ 58 ರನ್ ಸೇರಿಸಿದ್ದಾರೆ. 

ತಂಡಕ್ಕೆ ಉತ್ತಮ ಆರಂಭ ಕೊಡುವ ಪ್ರಯತ್ನವನ್ನು ಮಯಂಕ್ ಅಗರವಾಲ್ ಮತ್ತು ಕಿಶನ್ ಬೆದಾರೆ (ಫೀಲ್ಡಿಂಗ್ ಮಾಡುವಾಗ ಹಣೆಗೆ ಚೆಂಡು ಬಡಿದು ಗಾಯಗೊಂಡಿದ್ದ ನಿಕಿನ್ ಜೋಸ್ ಅವರಿಗೆ ಕಂಕಷನ್ ಬದಲಿ ಆಟಗಾರ) ಮಾಡಿದರು. ಇಬ್ಬರೂ ಅಪಾರ ತಾಳ್ಮೆಯಿಂದ ಬಂಗಾಳ ಬೌಲರ್‌ಗಳನ್ನು ಎದುರಿಸಿದರು.  ಇದರಿಂದಾಗಿ 15 ಓವರ್‌ಗಳಲ್ಲಿ ಈ ಜೋಡಿಯು ಕೇವಲ 34 ರನ್ ಸೇರಿಸಿತು.

ಬಂಗಾಳ ತಂಡದ ವೇಗಿ ಇಶಾನ್ ಪೊರೆಲ್ ಎಸೆತವನ್ನು ಕಿಶನ್ ಅವರು ಬೌಂಡರಿಗೆ ಕಳಿಸುವ ಪ್ರಯತ್ನ ಮಾಡಿದರು. ಆದರೆ, ಗಾಳಿಯಲ್ಲಿ ಸಾಗಿದ ಚೆಂಡನ್ನು ಪಾಯಿಂಟ್ ಫೀಲ್ಡರ್ ಶಾಬಾಜ್ ಸುಲಭವಾಗಿ ಕ್ಯಾಚ್ ಮಾಡಿದರು. ಇದರೊಂದಿಗೆ ಜೊತೆಯಾಟ ಮುರಿಯಿತು. ಸಾಲು ಸಾಲು ವಿಕೆಟ್ ಪತನವೂ ಶುರುವಾಯಿತು. ಬಂಗಾಳದ ಬಲಗೈ ಮಧ್ಯಮವೇಗಿ ರಿಷವ್ ವಿವೇಕ್ (44ಕ್ಕೆ2) ಮತ್ತು ಸೂರಜ್ ಸಿಂಧು ಜೈಸ್ವಾಲ್ (44ಕ್ಕೆ2) ಆತಿಥೇಯರಿಗೆ ಪೆಟ್ಟುಕೊಟ್ಟರು. 

ಎರಡನೇ ರಣಜಿ ಋತು ಆಡುತ್ತಿರುವ ಬೆಳಗಾವಿಯ ಸುಜಯ್ ಸತೇರಿ (10 ರನ್) ಮತ್ತು ನವಪ್ರತಿಭೆ ಆರ್. ಸ್ಮರಣ್ (26; 35ಎ) ಅವಕಾಶ ಕೈಚೆಲ್ಲಿದರು. ಅನುಭವಿ ಆರಂಭಿಕ ಬ್ಯಾಟರ್ ಮಯಂಕ್ ತಾವೆದುರಿಸಿದ 78ನೇ ಎಸೆತದಲ್ಲಿ ಜೈಸ್ವಾಲ್ ಹಾಕಿದ ಚೆಂಡಿನ ಚಲನೆ ಗುರುತಿಸದೇ ಕ್ಲೀನ್‌ಬೌಲ್ಡ್‌ ಆದರು. ಮನೀಷ್ ಪಾಂಡೆ ಖಾತೆಯನ್ನೇ ತೆರೆಯಲಿಲ್ಲ. ವಿವೇಕ್ ಎಸೆತವನ್ನು ಆಡುವ ಭರದಲ್ಲಿ ಶುವಾಂ ಡೇ ಕೈಗೆ ಕ್ಯಾಚಿತ್ತರು. ಅಭಿನವ್ ಅವರೊಂದಿಗೆ 5ನೇ ವಿಕೆಟ್ ಜೊತೆಯಾಟದಲ್ಲಿ 34 ರನ್‌ ಸೇರಿಸಿದ್ದ ಸ್ಮರಣ್ ಅವರಿಗೆ ಜೈಸ್ವಾಲ್ ಪೆವಿಲಿಯನ್ ದಾರಿ ತೋರಿಸಿದರು. 

ಐಪಿಎಲ್‌ನಲ್ಲಿ ತಮ್ಮ ಬೀಸುಹೊಡೆತಗಳ ಮೂಲಕ ಗಮನ ಸೆಳೆದಿರುವ ಮನೋಹರ್ ಇಲ್ಲಿ ಕ್ರೀಸ್‌ಗೆ ಬಂದವರೇ ಪಟಪಟನೆ ರನ್‌ ಗಳಿಸಿದರು. ಆದರೆ ವಿಕೆಟ್‌ಗಳು ಪತನಗೊಳ್ಳಲಾರಂಭಿಸಿದಾಗ ತಮ್ಮ ಆಟದ ವೇಗ ಕಡಿಮೆ ಮಾಡಿದರು. ಶ್ರೇಯಸ್ ಕೂಡ ಸಹನೆಯಿಂದ ಬ್ಯಾಟಿಂಗ್ ಮಾಡಿದರು. 

Cut-off box -