ರಣಜಿ ಕ್ರಿಕೆಟ್ | ಅನುಸ್ಟುಪ್ ಮಜುಂದಾರ್ ಶತಕ: ಉತ್ತಮ ಮೊತ್ತದತ್ತ ಬಂಗಾಳ
ಬಂಗಾಳ ತಂಡದ ಅನುಸ್ಟುಪ್ ಮಜುಂದಾರ್ ಶತಕ ಸಂಭ್ರಮ –ಪ್ರಜಾವಾಣಿ ಚಿತ್ರ/ಎಸ್‌.ಕೆ. ದಿನೇಶ್
ಬೆಂಗಳೂರು: ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಬುಧವಾರ ಇಡೀ ದಿನ ಕರ್ನಾಟಕ ತಂಡಕ್ಕೆ ಅನುಭವಿ ಬೌಲರ್‌ಗಳ ಕೊರತೆಯ ನಡುವೆ ಒಂದಿಷ್ಟು ಸಮಾಧಾನ ತಂದಿದ್ದು ವಾಸುಕಿ ಕೌಶಿಕ್ ಅವರು. ಆದರೆ ಇನ್ನೊಂದು ತುದಿಯಿಂದ ಯುವ ಬೌಲರ್‌ಗಳ ಎಸೆತಗಳನ್ನು ಲೀಲಾಜಾಲವಾಗಿ ಎದುರಿಸಿದ ಬಂಗಾಳ ತಂಡದ ನಾಯಕ ಅನುಸ್ಟುಪ್ ಮಜುಂದಾರ್ ಶತಕ ಸಂಭ್ರಮ ಆಚರಿಸಿದರು.
ಇಲ್ಲಿ ಆರಂಭವಾದ ರಣಜಿ ಟ್ರೋಫಿ ಕ್ರಿಕೆಟ್ ಟೂರ್ನಿ ಸಿ ಗುಂಪಿನ ಪಂದ್ಯದಲ್ಲಿ ಟಾಸ್ ಗೆದ್ದ ಕರ್ನಾಟಕ ತಂಡವು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಮೊದಲ ಓವರ್‌ನಲ್ಲಿಯೇ ಕೌಶಿಕ್ ಅವರು ಶಿವಂ ಡೇ ವಿಕೆಟ್ ಗಳಿಸಿದರು. ಮನೀಷ್ ಪಾಂಡೆ ಪಡೆದ ಕ್ಯಾಚ್‌ಗೆ ಅವರು ನಿರ್ಗಮಿಸಿದರು. ಇದರಿಂದಾಗಿ ಉತ್ತಮ ಆರಂಭದ ನಿರೀಕ್ಷೆ ಆತಿಥೇಯರ ಬಳಗದಲ್ಲಿ ಗರಿಗೆದರಿತು.
ಆದರೆ 16ನೇ ಓವರ್‌ನವರೆಗೂ ರಾಜ್ಯದ ಬೌಲರ್‌ಗಳಿಗೆ ವಿಕೆಟ್ ಒಲಿಯಲಿಲ್ಲ. ಸುದೀಪ್ ಚಟರ್ಜಿ ಮತ್ತು ಸುದೀಪ್ ಕುಮಾರ್ ಘರಮಿ ಎರಡನೇ ವಿಕೆಟ್ ಜೊತೆಯಾಟದಲ್ಲಿ 21 ರನ್ ಸೇರಿಸಲು 14.5 ಓವರ್ ಆಡಿದರು. ಕೌಶಿಕ್ ಬೌಲಿಂಗ್‌ನಲ್ಲಿ ನಿಕಿನ್ ಜೋಸ್ ಪಡೆದ ಆಕರ್ಷಕ ಕ್ಯಾಚ್‌ಗೆ ಸುದೀಪ್ ಕುಮಾರ್ ಔಟಾದರು. ಇದರೊಂದಿಗೆ ಜೊತೆಯಾಟ ಮುರಿಯಿತು. ಆದರೆ ಕ್ರೀಸ್‌ಗೆ ನಾಯಕ ಮಜುಂದಾರ್ (101; 164ಎಸೆತ) ಅವರು ಎರಡು ಜೊತೆಯಾಟಗಳನ್ನು ಕಟ್ಟಿದರು. ಅದರಿಂದಾಗಿ ತಂಡವು ಮೊದಲ ದಿನದಾಟದ ಅಂತ್ಯಕ್ಕೆ 78 ಓವರ್‌ಗಳಲ್ಲಿ 5 ವಿಕೆಟ್‌ಗಳಿಗೆ 249 ರನ್‌ಗಳನ್ನು ಗಳಿಸಲು ಸಾಧ್ಯವಾಯಿತು. ಮಂದಬೆಳಕಿನಿಂದಾಗಿ ಆಟವನ್ನು ಸ್ಥಗಿತಗೊಳಿಸಲಾಯಿತು. ಶಹಬಾಜ್ ಅಹಮದ್ (ಬ್ಯಾಟಿಂಗ್ 54; 103ಎ) ಮತ್ತು ವೃದ್ಧಿಮಾನ್ ಸಹಾ (ಬ್ಯಾಟಿಂಗ್ 6) ಕ್ರೀಸ್‌ನಲ್ಲಿದ್ದಾರೆ.
ಅನುಸ್ಟುಪ್ ಜೊತೆಯಾಟ
ಘರಮಿ ಔಟಾದ ನಂರ ಕ್ರೀಸ್‌ಗೆ ಬಂದ ಅನುಸ್ಟುಪ್ ಅವರು ವೇಗವಾಗಿ ರನ್ ಗಳಿಸಿದರು. ಇನ್ನೊಂದೆಡೆ ಕ್ರೀಸ್‌ನಲ್ಲಿದ್ದ ಚಟರ್ಜಿ ಮಾತ್ರ ತಾಳ್ಮೆಯ ಬ್ಯಾಟಿಂಗ್ ಮಾಡಿದರು. ಊಟದ ವಿರಾಮಕ್ಕೆ (2ಕ್ಕೆ86) ಇಬ್ಬರು ತಲಾ 37 ರನ್ ಗಳಿಸಿದ್ದರು.
ವಿರಾಮದ ನಂತರವೂ ಇವರಿಬ್ಬರ ಜೊತೆಯಾಟ ಮುಂದುವರಿಯಿತು. ಚಟರ್ಜಿ (55; 120ಎ, 4X5) ಅರ್ಧಶತಕ ಗಳಿಸಿದರು. 100 ರನ್ ಸೇರಿಸಿದ ಈ ಜೊತೆಯಾಟವನ್ನೂ ಮಧ್ಯಮವೇಗಿ ಕೌಶಿಕ್ ಮುರಿದರು. ವಿಕೆಟ್‌ಕೀಪರ್ ಸುಜಯ್ ಸತೇರಿ ಪಡೆದ ಕ್ಯಾಚ್‌ಗೆ ಚಟರ್ಜಿ ಆಟಕ್ಕೆ ತೆರೆ ಬಿತ್ತು.
ಆದರೆ ಅನುಸ್ಟುಪ್ ತಮ್ಮ ಆಟ ಮುಂದುವರಿಸಿದರು. ಅವರಿಗೆ ಶಹಬಾಜ್ ಜೊತೆಗೂಡಿದರು. ಅನುಸ್ಟುಪ್ 124 ನಿಮಿಷದಲ್ಲಿ ಶತಕದ ಗಡಿ ಮುಟ್ಟಿದರು. ಅದಕ್ಕಾಗಿ 157 ಎಸೆತ ಎದುರಿಸಿದರು. 16 ಬೌಂಡರಿಗಳನ್ನು ಚಚ್ಚಿದರು.
ಇದರಿಂದಾಗಿ ಬೌಲರ್‌ಗಳು ಪರದಾಡುವಂತಾಯಿತು. ಅನುಸ್ಟುಪ್ ಮತ್ತು ಶಹಬಾಜ್ ನಾಲ್ಕನೆ ವಿಕೆಟ್ ಜೊತೆಯಾಟದಲ್ಲಿ 80 ರನ್ ಸೇರಿಸಿದರು.
ಚಹಾ ವಿರಾಮದ ನಂತರದ ಅವಧಿಯಲ್ಲಿ ಅನುಸ್ಟುಪ್ ಆಟಕ್ಕೆ ಕಡಿವಾಣ ಹಾಕುವಲ್ಲಿ ಸ್ಪಿನ್ನರ್ ಶ್ರೇಯಸ್ ಗೋಪಾಲ್ ಯಶಸ್ವಿಯಾದರು. ಅನುಭವಿ ಸ್ಪಿನ್ನರ್ ಬೀಸಿದ ಎಲ್‌ಬಿಡಬ್ಲ್ಯು ಜಾಲದಲ್ಲಿ ಅನುಸ್ಟುಪ್ ಬಂಧಿಯಾದರು. ಅಸಮಾಧಾನದಿಂದಲೇ ಹೊರನಡೆದರು.
ಕ್ರೀಸ್‌ನಲ್ಲಿದ್ದ ಶಹಬಾಜ್ ಇನಿಂಗ್ಸ್ ಹೊಣೆ ಹೊತ್ತರು. ಅವಿಲಿನ್ ಘೋಷ್ (22 ರನ್) ಜೊತೆಗೆ ಇನಿಂಗ್ಸ್ ಬೆಳೆಸಿದರು. ಘೋಷ್ 2 ಸಿಕ್ಸರ್ ಮತ್ತು 1 ಬೌಂಡರಿ ಕೂಡ ಗಳಿಸಿದರು.
ಈ ಪಂದ್ಯದ ಮೂಲಕ ಪದಾರ್ಪಣೆ ಮಾಡಿದ ಎಡಗೈ ವೇಗಿ ಅಭಿಲಾಷ್ ಶೆಟ್ಟಿ ಘೋಷ್ ಅವರನ್ನು ಔಟ್ ಮಾಡಿ ತಮ್ಮ ಚೊಚ್ಚಲ ವಿಕೆಟ್ ಗಳಿಸಿದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.