Youth ODIs: ಸಾಹಿಲ್ ಪರಖ್ ಅಜೇಯ ಶತಕ

ಪುದುಚೇರಿ: ಆರಂಭ ಆಟಗಾರ ಸಾಹಿಲ್ ಪರಖ್ ಅವರ ಆಕ್ರಮಣಕಾರಿ ಶತಕದ (ಔಟಾಗದೇ 109, 75ಎಸೆತ) ನೆರವಿನಿಂದ ಭಾರತ ತಂಡ, ಏಕದಿನ ಯುವ (19 ವರ್ಷದೊಳಗಿನವರ) ಸರಣಿಯ ಎರಡನೇ ಪಂದ್ಯವನ್ನು ಗೆದ್ದು 9 ವಿಕೆಟ್‌ಗಳಿಂದ ಗೆದ್ದುಕೊಂಡಿತು. ಮೂರು ಪಂದ್ಯಗಳ ಸರಣಿಯಲ್ಲಿ 2–0 ಮುನ್ನಡೆ ಪಡೆಯಿತು.

ಶನಿವಾರ ನಡೆದ ಮೊದಲ ಪಂದ್ಯವನ್ನು ಭಾರತ ಏಳು ವಿಕೆಟ್‌ಗಳಿಂದ ಗೆದ್ದುಕೊಂಡಿತ್ತು.

ಮುಂಬೈನ 19 ವರ್ಷ ವಯಸ್ಸಿನ ಪರಖ್ ಅವರ ಬಿರುಸಿನ ಇನಿಂಗ್ಸ್‌ನಲ್ಲಿ 14 ಬೌಂಡರಿ ಮತ್ತು ಐದು ಸಿಕ್ಸರ್‌ಗಳಿದ್ದವು. 177 ರನ್‌ಗಳ ಗುರಿಯನ್ನು ಭಾರತ ಕೇವಲ 22 ಓವರುಗಳಲ್ಲಿ (1 ವಿಕೆಟ್‌ಗೆ 177) ದಾಟಿತು. ರುದ್ರ ಪಟೇಲ್ (10) ನಿರ್ಗಮನದ ನಂತರ ಅಭಿಗ್ಯಾನ್ ಕುಂದು (ಔಟಾಗದೇ 53) ಜೊತೆ ಅವರು ಮುರಿಯದ ಎರಡನೇ ವಿಕೆಟ್‌ಗೆ 153 ರನ್ ಸೇರಿಸಿದರು.

ಇದಕ್ಕೆ ಮೊದಲು ಕರ್ನಾಟಕದ ವೇಗಿ ಸಮರ್ಥ ನಾಗರಾಜ್ (34ಕ್ಕೆ2), ಕೇರಳದ ಲೆಗ್‌ ಸ್ಪಿನ್ನರ್ ಮೊಹಮ್ಮದ್ ಇನಾನ್ ಮತ್ತು ಆಫ್ ಸ್ಪಿನ್ನರ್ ಕಿರಣ್ ಚೋರ್ಮಲೆ (29ಕ್ಕೆ2) ಅವರ ದಾಳಿಗೆ ಪರದಾಡಿದ  ಆಸ್ಟ್ರೇಲಿಯಾ ಯುವ ತಂಡ 49.3 ಓವರುಗಳಲ್ಲಿ 176 ರನ್‌ಗಳಿಗೆ ಉರುಳಿತ್ತು.

ಔಪಚಾರಿಕವಾದ ಮೂರನೇ ಏಕದಿನ ಪಂದ್ಯ ಗುರುವಾರ ಇಲ್ಲಿಯೇ ನಡೆಯಲಿದೆ. ಎರಡು ‘ಅನಧಿಕೃತ’ ಟೆಸ್ಟ್‌ ಪಂದ್ಯಗಳ ಸರಣಿಯ ಮೊದಲ ಪಂದ್ಯ ಚೆನ್ನೈನಲ್ಲಿ ಇದೇ ತಿಂಗಳ 30ರಂದು ಆರಂಭವಾಗಲಿದೆ.

ಸ್ಕೋರುಗಳು:

ಆಸ್ಟ್ರೇಲಿಯಾ ಯುವ ತಂಡ: 49.3 ಓವರುಗಳಲ್ಲಿ 176 (ಅಡಿಸನ್ ಶೆರಿಫ್‌ 39, ಕ್ರಿಸ್ಟಿಯನ್ ಹೋವ್ 28; ಸಮರ್ಥ್ ನಾಗರಾಜ್ 34ಕ್ಕೆ2, ಮೊಹಮ್ಮದ್ ಇನಾನ್ 30ಕ್ಕೆ2, ಕಿರಣ್ ಚೋರ್ಮಲೆ 29ಕ್ಕೆ2); ಭಾರತ ಯುವ ತಂಡ: 22 ಓವರುಗಳಲ್ಲಿ 1 ವಿಕೆಟ್‌ಗೆ 177 (ಸಾಹಿಲ್ ಪರಖ್ ಔಟಾಗದೇ 109, ಅಭಿಗ್ಯಾನ್ ಕುಂದು ಔಟಾಗದೇ 53). ಪಂದ್ಯದ ಆಟಗಾರ: ಸಾಹಿಲ್ ಪರಖ್.