ಪಾಕ್‌ ಪ್ರವಾಸ ಇಲ್ಲ: ಭಾರತ

ನವದೆಹಲಿ: ಐಸಿಸಿ ಚಾಂಪಿಯನ್ಸ್‌ ಟ್ರೋಫಿಯಲ್ಲಿ ಆಡಲು ಪಾಕಿಸ್ತಾನಕ್ಕೆ ಹೋಗುವುದಿಲ್ಲ ಎಂದು ಭಾರತ ಕ್ರಿಕೆಟ್‌ ನಿಯಂತ್ರಣ ಮಂಡಳಿ, ಐಸಿಸಿಗೆ ತನ್ನ ಅಸಹಾಯಕತೆ ವ್ಯಕ್ತಪಡಿಸಿದೆ. ಹೀಗಾಗಿ ಭಾರತ ಪಾಲ್ಗೊಳ್ಳಬೇಕಾದರೆ, ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿಗೆ ‘ಹೈಬ್ರಿಡ್‌ ಮಾದರಿ’ ಅನುಸರಿಸದೇ
ಅನ್ಯಮಾರ್ಗವಿಲ್ಲದಂತಾಗಿದೆ.

‘ಇದು ಐಸಿಸಿ ಟೂರ್ನಿಯಾಗಿದೆ. ಹೀಗಾಗಿ ಭಾರತ ತಂಡವು ಪಾಕಿಸ್ತಾನ ಪ್ರವಾಸ ಕೈಗೊಳ್ಳುವುದಿಲ್ಲ ಎಂದು ಐಸಿಸಿಗೆ ತಿಳಿಸಿದೆ. ಈ ಬೆಳವಣಿಗೆ ಕುರಿತು ಆತಿಥೇಯ ಪಾಕಿಸ್ತಾನಕ್ಕೆ ಐಸಿಸಿ ಮಾಹಿತಿ ನೀಡಬೇಕಾಗಿದೆ. ನಂತರವಷ್ಟೇ ಅಂತಿಮ ವೇಳಾ ಪಟ್ಟಿ ರೂಪಿಸಬೇಕಾಗುತ್ತದೆ’ ಎಂದು ಬಿಸಿಸಿಐ ಮೂಲ ತಿಳಿಸಿದೆ.

‘ಆದರೆ ಈ ವಿಷಯದ ಕುರಿತು ಬಿಸಿಸಿಐನಿಂದ ನಮಗೆ ಯಾವುದೇ ಅಧಿಕೃತ ಮಾಹಿತಿ ಬಂದಿಲ್ಲ ಎಂದು  ಪಾಕಿಸ್ತಾನ ಕ್ರಿಕೆಟ್‌  ಮಂಡಳಿ ಹೇಳಿದೆ. ಐಸಿಸಿಯಿಂದಲೂ ಯಾವುದೇ ಸಂದೇಶ ಬಂದಿಲ್ಲ’ ಎಂದು ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿ ಅಧ್ಯಕ್ಷ ಮೊಹ್ಸಿನ್ ನಕ್ವಿ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.