ಅಮಿತ್ ಪಂಘಾಲ್, ಶಿವ ಥಾಪಾಗೆ ಸ್ಥಾನ

ಪಟಿಯಾಲ (ಪಿಟಿಐ): ವಿಶ್ವ ಚಾಂಪಿಯನ್‌ಷಿಪ್ ಪದಕವಿಜೇತರಾದ ಅಮಿತ್ ಪಂಘಾಲ್ ಮತ್ತು ಶಿವ ಥಾಪಾ ಅವರನ್ನು ಕಾಮನ್‌ವೆಲ್ತ್ ಕ್ರೀಡಾಕೂಟದಲ್ಲಿ ಸ್ಪರ್ಧಿಸುವ ಭಾರತದ ಪುರುಷರ ಬಾಕ್ಸಿಂಗ್ ತಂಡಕ್ಕೆ ಆಯ್ಕೆ ಮಾಡಲಾಗಿದೆ.

2019ರ ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಅಮಿತ್ ಬೆಳ್ಳಿ ಮತ್ತು 2015ರ ಕಂಚಿನ ಪದಕವಿಜೇತ ಶಿವ ಕ್ರಮವಾಗಿ 51 ಕೆ.ಜಿ ಮತ್ತು 63 ಕೆ.ಜಿ ವಿಭಾಗಗಳಲ್ಲಿ ಸ್ಥಾನ ಪಡೆದಿದ್ದಾರೆ. ಥಾಪಾ ಇತ್ತೀಚೆಗೆ ಅಂತರರಾಷ್ಟ್ರೀಯ ಬಾಕ್ಸಿಂಗ್ ಸಂಸ್ಥೆಯ ಅಥ್ಲೀಟ್ಸ್‌ ಸಮಿತಿಗೆ ಸದಸ್ಯರಾಗಿ ಆಯ್ಕೆಯಾಗಿದ್ದಾರೆ.

ಆಯ್ಕೆ ಟ್ರಯಲ್ಸ್‌ ನಲ್ಲಿ ಅಮಿತ್ 4–1ರಿಂದ ಸರ್ವಿಸಸ್ ತಂಡದ ದೀಪಕ್ ವಿರುದ್ಧ ಜಯಿಸಿದರು. ತಾಪಾ 5–0ಯಿಂದ ಕಳೆದ ಸಲದ ಕಾಮನ್‌ವೆಲ್ತ್ ಕ್ರೀಡಾಕೂಟ ಪದಕವಿಜೇತ ಮನೀಷ್ ಕೌಶಿಕ್ ವಿರುದ್ಧ ಗೆದ್ದರು.

ಹಾಲಿ ರಾಷ್ಟ್ರೀಯ ಚಾಂಪಿಯನ್ ಸುಮಿತ್ ಅವರಿಗೆ 75 ಕೆ.ಜಿ ವಿಭಾಗದಲ್ಲಿ ಸ್ಥಾನ ಪಡೆದುಕೊಂಡಿದ್ದಾರೆ.

ಬರ್ಮಿಂಗ್‌ಹ್ಯಾಮ್‌ನಲ್ಲಿ ಜುಲೈ 28ರಿಂದ ಆಗಸ್ಟ್ 8ರವರೆಗೆ ಕಾಮನ್‌ವೆಲ್ತ್ ಕ್ರೀಡಾಕೂಟ ನಡೆಯಲಿದೆ. ಮಹಿಳೆಯರ ಬಾಕ್ಸಿಂಗ್ ತಂಡದ ಆಯ್ಕೆ ಟ್ರಯಲ್ಸ್ ಮುಂದಿನ ವಾರ ಆಯೋಜಿಸಲಾಗಿದೆ.

ಪುರುಷರ ತಂಡ: ಅಮಿತ್ ಪಂಘಾಲ್ (51ಕೆ.ಜಿ), ಮೊಹಮ್ಮದ್ ಹಸಮುದ್ದೀನ್ (57 ಕೆ.ಜಿ), ಶಿವ ಥಾಪಾ (63ಕೆ.ಜಿ), ರೋಹಿತ್ ಟೋಕಾಸ್ (67ಕೆ.ಜಿ), ಸುಮಿತ್ (75ಕೆಜಿ), ಆಶಿಶ್ ಕುಮಾರ್ (80 ಕೆ.ಜಿ), ಸಂಜೀತ್ (92 ಕೆ.ಜಿ), ಸಾಗರ್ (92ಕೆ.ಜಿ+)