ದೀಪಾ ಮಲಿಕ್‌ಗೆ ಕಂಚಿನ ಪದಕ
ಏಷ್ಯನ್ ಪ್ಯಾರಾ ಕ್ರೀಡಾಕೂಟ: ಡಿಸ್ಕಸ್‌ ಥ್ರೋದಲ್ಲಿ ಭಾರತದ ಅಥ್ಲೀಟ್ ಸಾಧನೆ
Published 12 ಅಕ್ಟೋಬರ್ 2018, 10:55 IST
ದೀಪಾ ಮಲಿಕ್‌
ಜಕಾರ್ತ: ಡಿಸ್ಕಸ್‌ ಥ್ರೋದಲ್ಲಿ ಕಂಚಿನ ಪದಕ ಗೆದ್ದ ಭಾರತದ ದೀಪಾ ಮಲಿಕ್‌ ಏಷ್ಯನ್ ಪ್ಯಾರಾ ಕ್ರೀಡಾಕೂಟದಲ್ಲಿ ವೈಯಕ್ತಿಕ ಎರಡನೇ ಪದಕ ತಮ್ಮದಾಗಿಸಿಕೊಂಡರು.
ಶುಕ್ರವಾರ ನಡೆದ ಎಫ್‌–51/52/53 ವಿಭಾಗದಲ್ಲಿ 9.67 ಮೀಟರ್ಸ್ ದೂರ ಎಸೆದು ಅವರು ತೃತೀಯ ಸ್ಥಾನ ಗೆದ್ದರು. ರಿಯೊ ಪ್ಯಾರಾಲಿಂಪಿಕ್ಸ್‌ನಲ್ಲಿ ಪದಕ ಗೆದ್ದಿದ್ದ ದೀಪಾ ಇಲ್ಲಿ ನಾಲ್ಕನೇ ಪ್ರಯತ್ನದಲ್ಲಿ ಪದಕ ಗೆಲ್ಲುವ ಅಂತರವನ್ನು ತಲುಪಿದರು. ಮಹಿಳೆಯರ ಜಾವೆಲಿನ್ ಥ್ರೋದಲ್ಲೂ ಅವರು ಕಂಚು ಗೆದ್ದಿದ್ದರು.
ಇರಾನ್‌ನ ಎಲ್ನಾಜ್ ದರಾಬಿಯನ್‌ ಅವರು ಏಷ್ಯನ್ ದಾಖಲೆ ಮುರಿಯುವ ಮೂಲಕ (10.71 ಮೀಟರ್ಸ್) ಚಿನ್ನ ಗೆದ್ದರೆ, ಬಹರೇನ್‌ನ ಫಾತಿಮಾ ನೆಧಾಮ್‌ (9.87 ಮೀಟರ್ಸ್) ಬೆಳ್ಳಿಯ ಪದಕ ಗೆದ್ದರು.
ಕಣದಲ್ಲಿದ್ದ ಭಾರತದ ಮತ್ತೊಬ್ಬ ಅಥ್ಲೀಟ್ ಏಕ್ತಾ ಭ್ಯಾನ್‌ (6.52 ಮೀಟರ್ಸ್) ನಾಲ್ಕನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.