ಬಾಕ್ಸಿಂಗ್‌: ಪ್ರಶಸ್ತಿ ಉಳಿಸಿಕೊಂಡ ಬಿವೊಲ್‌

ಲಾಸ್ ವೇಗಾಸ್: ಕನೆಲೊ ಅಲ್ವಾರಿಸ್‌ ಎದುರು ಅಚ್ಚರಿಯ ಜಯ ಸಾಧಿಸಿದ ರಷ್ಯಾದ ದಿಮಿಟ್ರಿ ಬಿವೊಲ್ ಅವರು ವಿಶ್ವ ಬಾಕ್ಸಿಂಗ್ ಸಂಸ್ಥೆಯ ಲೈಟ್ ಹೆವಿವೇಟ್ ವಿಭಾಗದ ವಿಶ್ವ ಚಾಂಪಿಯನ್ ಪಟ್ಟ ಉಳಿಸಿಕೊಂಡರು.

ಟಿ–ಮೊಬೈಲ್ ಅರೆನಾದಲ್ಲಿ ನಡೆದ ಬೌಟ್‌ನಲ್ಲಿ ದಿಮಿಟ್ರಿ ಏಕಪಕ್ಷೀಯ ಜಯ ಸಾಧಿಸಿದರು. 12 ಸುತ್ತುಗಳ ಅಂತ್ಯದಲ್ಲಿ ಮೂವರು ನಿರ್ಣಾಯಕರು ದಿಮಿಟ್ರಿ ಪರವಾಗಿ 115-113 ಪಾಯಿಂಟ್‌ಗಳನ್ನು ನೀಡಿದರು. ಮೆಕ್ಸಿಕೊದ ಅಲ್ವಾರಿಸ್‌ಗೆ ಇದು ಈ ಋತುವಿನ ಎರಡನೇ ಸೋಲಾಗಿದೆ. ದಿಮಿಟ್ರಿ, ಅಲ್ವಾರಿಸ್ ಎದುರಿನ 20 ಬೌಟ್‌ಗಳ ಪೈಕಿ ಎಲ್ಲವನ್ನೂ ಗೆದ್ದಂತಾಯಿತು.

ಗೆಲ್ಲುವ ನೆಚ್ಚಿನ ಬಾಕ್ಸರ್ ಎನಿಸಿಕೊಂಡಿದ್ದ ಅಲ್ವಾರಿಸ್ ಬೌಟ್‌ನ ಪ್ರತಿ ಹಂತದಲ್ಲೂ ಹಿನ್ನಡೆ ಅನುಭವಿಸಿದರು. 31 ವರ್ಷದ ದಿಮಿಟ್ರಿ ಅವರ ರಕ್ಷಣಾತ್ಮಕ ಆಟದ ಎದುರು ಅವರಿಗೆ ಪಾಯಿಂಟ್‌ಗಳನ್ನು ಗಳಿಸಲು ಸಾಧ್ಯವಾಗಲಿಲ್ಲ. ಅವಕಾಶ ಸಿಕ್ಕಿದಾಗಲೆಲ್ಲ ಬಲಶಾಲಿ ಪಂಚ್‌ಗಳನ್ನು ನೀಡಿದ ದಿಮಿಟ್ರಿ ಗೆಲುವು ತಮ್ಮದಾಗಿಸಿಕೊಂಡರು.