ಹಾಕಿ: ಒಲಿಂಪಿಕ್ಸ್‌ ಕ್ವಾಲಿಫೈರ್ಸ್‌ಗೆ ವಂದನಾ ಅಲಭ್ಯ

ರಾಂಚಿ: ಭಾರತ ಹಾಕಿ ತಂಡದ ಮುನ್ಪಡೆ ಆಟಗಾರ್ತಿ ವಂದನಾ ಕಟಾರಿಯಾ ಅವರಿಗೆ ತರಬೇತಿ ವೇಳೆ ಕೆನ್ನೆಯ ಎಲುಬು ಮುರಿದಿದಿದೆ. ಹೀಗಾಗಿ ಅವರು ಇದೇ 13 ರಿಂದ 19ರವರೆಗೆ ನಿಗದಿಯಾಗಿರುವ ಒಲಿಂಪಿಕ್‌ ಕ್ವಾಲಿಫೈರ್ಸ್‌ ಟೂರ್ನಿಗೆ ಅಲಭ್ಯರಾಗಿದ್ದು ತಂಡಕ್ಕೆ ದೊಡ್ಡ ಹಿನ್ನಡೆಯಾಗಿದೆ.

ಅವರ ಸ್ಥಾನಕ್ಕೆ ಯುವ ಆಟಗಾರ್ತಿ ಬಲ್ಜೀತ್ ಕೌರ್ ವಹಿಸಲಿದ್ದಾರೆ. ಅನುಭವಿ ವಂದನಾ ಅವರು ಉಪನಾಯಕಿಯೂ ಆಗಿದ್ದು, ಈಗ ಈ ಸ್ಥಾನವನ್ನು ನಿಕಿ ಪ್ರಧಾನ್ ವಹಿಸುವರು. ಒಲಿಂಪಿಕ್ಸ್‌ ಹಾಕಿಯಲ್ಲಿ ಆಡಿದ ಜಾರ್ಖಂಡ್‌ನ ಮೊದಲ ಆಟಗಾರ್ತಿ ಅವರು.

‘ವಂದನಾ ಟೂರ್ನಿಯ ಭಾಗವಾಗದಿರುವುದು ದುರದೃಷ್ಟಕರ. ತರಬೇತಿ ಅವಧಿಯಲ್ಲಿ ಅವರ ಗಲ್ಲದ ಎಲುಬಿಗೆ ಹಾನಿಯಾಗಿದೆ. ಅವರಿಗೆ ವಿಶ್ರಾಂತಿ ಪಡೆಯುವಂತೆ ಸಲಹೆ ನೀಡಲಾಗಿದೆ’ ಎಂದು ಚೀಫ್ ಕೋಚ್‌ ಯಾನೆಕ್ ಶೋಪ್‌ಮನ್ ತಿಳಿಸಿದರು.

ಒಲಿಂಪಿಕ್‌ ಕ್ವಾಲಿಫೈರ್ಸ್‌ನಲ್ಲಿ ಮೊದಲ ಮೂರು ಸ್ಥಾನ ಪಡೆಯುವ ತಂಡಗಳು ಪ್ಯಾರಿಸ್‌ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆಯಲಿವೆ. ಭಾರತ ತಂಡ ಬಿ ಗುಂಪಿನಲ್ಲಿದ್ದು, ಅಮೆರಿಕ, ನ್ಯೂಜಿಲೆಂಡ್‌, ಇಟಲಿ ತಂಡಗಳನ್ನು ಎದುರಿಸಲಿದೆ.