ದಕ್ಷಿಣ ಏಷ್ಯಾ ಜೂನಿಯರ್ ಅಥ್ಲೆಟಿಕ್ಸ್‌: ಭಾರತ ತಂಡದಲ್ಲಿ ಕರ್ನಾಟಕದ ಅಥ್ಲೀಟ್‌ಗಳು

ಬೆಂಗಳೂರು: ಚೆನ್ನೈನಲ್ಲಿ ಬುಧವಾರ ಆರಂಭವಾಗಲಿರುವ 4ನೇ ದಕ್ಷಿಣ ಏಷ್ಯಾ ಜೂನಿಯರ್ ಅಥ್ಲೆಟಿಕ್ಸ್‌ ಚಾಂಪಿಯನ್‌ಷಿಪ್‌ನಲ್ಲಿ ಸ್ಪರ್ಧಿಸಲಿರುವ ಭಾರತ ತಂಡದಲ್ಲಿ ಕರ್ನಾಟಕದ ಐವರು ಅಥ್ಲೀಟ್‌ಗಳು ಸ್ಥಾನ ಪಡೆದಿದ್ದಾರೆ. 

ಬೋಪಣ್ಣ (800 ಮೀ ಓಟ), ಉನ್ನತಿ ಅಯ್ಯಪ್ಪ (ಮಹಿಳೆಯರ 100 ಮೀ ಹರ್ಡಲ್ಸ್‌, 200 ಮೀ ಓಟ), ನಿಯೊಲ್ ಕಾರ್ನೆಲಿಯೊ (4X100 ಮೀ ರಿಲೆ), ವಿ. ಸುಧೀಕ್ಷಾ (100 ಮೀ ಓಟ, 4X100 ಮೀ ರಿಲೆ), ಸಿ. ರಿಹಾನ್ (400 ಮೀ ಓಟ, 4X400 ಮೀ ರಿಲೆ) ಅವರು ಸ್ಪರ್ಧಿಸುವರು. ಶಿವಾನಂದ ಮತ್ತು  ಬಿಂದುರಾಣಿ ಅವರು ತರಬೇತುದಾರರಾಗಿದ್ದಾರೆ ಎಂದು ಕರ್ನಾಟಕ ರಾಜ್ಯ ಅಥ್ಲೆಟಿಕ್ಸ್ ಸಂಸ್ಥೆ ಕಾರ್ಯದರ್ಶಿ ಎ. ರಾಜವೇಲು ತಿಳಿಸಿದ್ದಾರೆ.