ಮಿಲ್ಖಾಸಿಂಗ್ ಆರೋಗ್ಯ ಸ್ಥಿರ: ಪತ್ನಿಗೆ ಕೋವಿಡ್ ನ್ಯುಮೊನಿಯಾ

ಚಂಡೀಗಡ: ಕೋವಿಡ್ ಸೋಂಕಿನಿಂದ ಬಳಲಿ ಆಸ್ಪತ್ರೆಗೆ ದಾಖಲಾಗಿರುವ ದಿಗ್ಗಜ ಅಥ್ಲೀಟ್ ಮಿಲ್ಖಾ ಸಿಂಗ್ ಅವರ ಆರೋಗ್ಯ ಸ್ಥಿರವಾಗಿದೆ.

ಬುಧವಾರ ಅವರನ್ನು ತುರ್ತು ನಿಗಾ ಘಟಕದಿಂದ ವಾರ್ಡ್‌ಗೆ ಸ್ಥಳಾಂತರಿಸಲಾಗಿದೆ. ಅವರಿಗೆ ಕೋವಿಡ್ ನ್ಯುಮೊನಿಯಾಗೆ ಚಿಕಿತ್ಸೆ ನೀಡಲಾಗುತ್ತಿದ್ದು, ಆಮ್ಲಜನಕದ ನೆರವು ನೀಡಲಾಗಿದೆ.

ಸಿಂಗ್ ಅವರ ಪತ್ನಿ, ಭಾರತ ಮಹಿಳಾ ವಾಲಿಬಾಲ್ ತಂಡದ ಮಾಜಿ ನಾಯಕಿ ನಿರ್ಮಲ್ ಕೌರ್ ಅವರಿಗೂ ಕೋವಿಡ್‌ ನ್ಯೂಮೊನಿಯಾ ಖಚಿತವಾಗಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ.

‘ಸಿಂಗ್ ದಂಪತಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ಇಬ್ಬರ ಮೇಲೂ ನಿಗಾ ವಹಿಸಲಾಗಿದೆ. ಸಿಂಗ್ ಅವರ ಕುಟುಂಬದಲ್ಲಿ ಎಲ್ಲರನ್ನೂ ಪರೀಕ್ಷಿಸಿದಾಗ ನಿರ್ಮಲ್ ಕೌರ್ ಅವರ ವರದಿ ಮಾತ್ರ ನೆಗೆಟಿವ್ ಇತ್ತು. ಆದರೆ ಇವತ್ತು ಅವರಿಗೆ ಕೋವಿಡ್ ನ್ಯುಮೋನಿಯಾ ಕಂಡುಬಂದಿದ್ದು ಆಸ್ಪತ್ರೆಗೆ ದಾಖಲಿಸಲಾಗಿದೆ‘ ಎಂದು ಮೊಹಾಲಿಯ ಫೋರ್ಟಿಸ್ ಆಸ್ಪತ್ರೆಯ ವೈದ್ಯರು ತಿಳಿಸಿದ್ದಾರೆ.