ಪ್ರೊ ಕಬಡ್ಡಿ ಲೀಗ್ | ಗುಜರಾತ್ ಜೈಂಟ್ಸ್ ಶುಭಾರಂಭ
ಗುಜರಾತ್ ಜೈಂಟ್ಸ್ ಮತ್ತು ತೆಲುಗು ಟೈಟನ್ಸ್ ಪಂದ್ಯದ ದೃಶ್ಯ
ಅಹಮದಾಬಾದ್‌: ಸೋನು ಅವರ ಉತ್ತಮ ರೈಡಿಂಗ್‌ ನೆರವಿನಿಂದ ಗುಜರಾತ್ ಜೈಂಟ್ಸ್ ತಂಡ, ಶನಿವಾರ ಆರಂಭವಾದ ಪ್ರೊ ಕಬಡ್ಡಿ ಲೀಗ್‌ನ ಉದ್ಘಾಟನಾ ಪಂದ್ಯದಲ್ಲಿ ತೆಲುಗು ಟೈಟನ್ಸ್ ತಂಡವನ್ನು 38–32 ಪಾಯಿಂಟ್ಸ್‌ಗಳಿಂದ ಸೋಲಿಸಿತು.
ಟ್ರಾನ್ಸ್‌ ಸ್ಟೇಡಿಯಾದಲ್ಲಿ ನಡೆದ ಈ ಪಂದ್ಯದಲ್ಲಿ ವಿರಾಮದ ವೇಳೆಗೆ 13–16 ರಿಂದ ಹಿಂದೆಯಿದ್ದ ಜೈಂಟ್ಸ್ ತಂಡ ಉತ್ತರಾರ್ಧದಲ್ಲಿ ಉತ್ತಮ ಪ್ರದರ್ಶನ ನೀಡಿತು.
ಸೋನು ಒಂದೇ ರೈಡ್‌ನಲ್ಲಿ ಐವರನ್ನು ಔಟ್‌ ಮಾಡಿದ್ದು ಗಮನಸೆಳೆಯಿತು. ಈ ರೈಡ್‌ ನಂತರ 18–16ರಲ್ಲಿ ಪಡೆದ ಮುನ್ನಡೆಯನ್ನು ಗುಜರಾತ್ ಬಿಟ್ಟುಕೊಡಲಿಲ್ಲ. ವಿರಾಮದ ಏಳು ನಿಮಿಷಗಳ ನಂತರ ಮೊದಲ ಬಾರಿ ಟೈಟನ್ಸ್ ತಂಡವನ್ನು ಆಲೌಟ್‌ ಮಾಡಿತು. ಪಂದ್ಯದ ಕೊನೆಯ ಕೆಲವು ನಿಮಿಷಗಳಲ್ಲಿ ಮುನ್ನಡೆ ಹೆಚ್ಚುತ್ತಾ ಹೋಯಿತು. ಮುಕ್ತಾಯಕ್ಕೆ ನಾಲ್ಕು ನಿಮಿಷಗಳಿರುವಾಗ ಗುಜರಾತ್ ತಂಡ ಮತ್ತೊಮ್ಮೆ ಎದುರಾಳಿ ಅಂಕಣವನ್ನು ‘ಖಾಲಿ’ ಮಾಡಿತು. ಟೈಟನ್ಸ್ ತಂಡದ ನಾಯಕ ಹಾಗೂ ಸ್ಟಾರ್‌ ರೈಡರ್‌ ಪವನ್ ಸೆಹ್ರಾವತ್ ಅವರೂ ಉತ್ತಮ ಪ್ರದರ್ಶನ ನೀಡಿ 11 ಪಾಯಿಂಟ್ಸ್ ಕಲೆಹಾಕಿದರು.
ಯು ಮುಂಬಾಕ್ಕೆ ಜಯ: ದಿನದ ಎರಡನೇ ಪಂದ್ಯದಲ್ಲಿ ಯು ಮುಂಬಾ ತಂಡ 34–31 ಪಾಯಿಂಟ್‌ಗಳಿಂದ ಯು.ಪಿ ಯೋಧಾಸ್ ತಂಡವನ್ನು ಸೋಲಿಸಿತು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.