Pro Kabaddi: ಯೋಧಾಸ್‌, ಮುಂಬಾಗೆ ಜಯ

ನೊಯ್ಡಾ: ಭವಾನಿ ರಜಪೂತ್‌ ಮತ್ತು ಭರತ್‌ ಹೂಡಾ ಅವರ ಅಮೋಘ ರೇಡಿಂಗ್‌ ಬಲದಿಂದ ಯು.ಪಿ ಯೋಧಾಸ್‌ ತಂಡವು ಗುರುವಾರ ಪ್ರೊ ಕಬಡ್ಡಿ ಲೀಗ್‌ನ ಪಂದ್ಯದಲ್ಲಿ 40–34 ರಿಂದ ತೆಲುಗು ಟೈಟನ್ಸ್‌ ವಿರುದ್ಧ ಗೆಲುವು ಸಾಧಿಸಿತು.

ಮಧ್ಯಂತರದ ವೇಳೆಗೆ 4 (16–20) ಪಾಯಿಂಟ್ಸ್‌ಗಳಿಂದ ಹಿನ್ನಡೆಯಲ್ಲಿದ್ದ ಯೋಧಾಸ್‌ ಉತ್ತರಾರ್ಧದಲ್ಲಿ ಪಾರಮ್ಯ ಮೆರೆಯಿತು. ಭವಾನಿ ಮತ್ತು ಭರತ್‌ ಕ್ರಮವಾಗಿ ಕ್ರಮವಾಗಿ 12 ಮತ್ತು 11 ಅಂಕ ಕಲೆಹಾಕಿದರು.

ಟೈಟನ್ಸ್‌ನ ವಿಜಯ್‌ ಮಲಿಕ್‌ (15 ಅಂಕ) ಏಕಾಂಗಿ ಹೋರಾಟ ನಡೆಸಿದರು. ಅವರಿಗೆ ಉಳಿದ ಆಟಗಾರರಿಂದ ನಿರೀಕ್ಷಿತ ಬೆಂಬಲ ಸಿಗಲಿಲ್ಲ. 

ಯೋಧಾಸ್ ತಂಡಕ್ಕೆ ಇದು 9 ಪಂದ್ಯಗಳಲ್ಲಿ ನಾಲ್ಕನೇ ಗೆಲುವಾಗಿದೆ. ಒಟ್ಟು 25 ಅಂಕ ಸಂಗ್ರಹಿಸಿ ಪಾಯಿಂಟ್ಸ್‌ ಪಟ್ಟಿಯಲ್ಲಿ ಎಂಟನೇ ಸ್ಥಾನದಲ್ಲಿದೆ. 27 ಅಂಕ ಹೊಂದಿರುವ ಟೈಟನ್ಸ್‌ ಆರನೇ ಸ್ಥಾನದಲ್ಲಿದೆ.

ಮುಂಬಾಗೆ ಜಯ: ದಿನದ ಮತ್ತೊಂದು ಪಂದ್ಯದಲ್ಲಿ ಯು ಮುಂಬಾ ತಂಡವು 35–32ರಿಂದ ತಮಿಳು ತಲೈವಾಸ್‌ ತಂಡವನ್ನು ಸೋಲಿಸಿತು.

ಈ ಗೆಲುವಿನೊಂದಿಗೆ ಮುಂಬಾ (34 ಅಂಕ) ಪಾಯಿಂಟ್ ಪಟ್ಟಿಯಲ್ಲಿ ಎರಡನೇ ಸ್ಥಾನಕ್ಕೆ ಬಡ್ತಿ ಪಡೆದಿದೆ. ತಲೈವಾಸ್‌ (22) 10ನೇ ಸ್ಥಾನದಲ್ಲಿದೆ.