ಮಾಂಟೆ ಕಾರ್ಲೊ: ಫೋಗ್ನಿನಿಗೆ ಪ್ರಶಸ್ತಿ

ಮಾಂಟೆ ಕಾರ್ಲೊ: ಪ್ರೇಕ್ಷಕರಿಗೆ ಭರಪೂರ ರಂಜನೆ ನೀಡಿದ ಇಟಲಿಯ ಫ್ಯಾಬಿಯೊ ಫಾಗ್ನಿನಿ ಅವರು ಮಾಂಟೆ ಕಾರ್ಲೊ ಮಾಸ್ಟರ್ಸ್ ಟೆನಿಸ್ ಟೂರ್ನಿಯ ‍ಪ್ರಶಸ್ತಿ ತಮ್ಮದಾಗಿಸಿಕೊಂಡರು. ಭಾನುವಾರ ಇಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಸರ್ಬಿಯಾದ ದೂಸಾನ್‌ ಲಾಜೊವಿಚ್‌ ಅವರನ್ನು 6–3, 6–4ರಿಂದ ಮಣಿಸಿದರು.

13ನೇ ಶ್ರೇಯಾಂಕದ ಫಾಗ್ನಿನಿ ಅರ್ಧ ಶತಮಾನದ ನಂತರ ಇಲ್ಲಿ ಪ್ರಶಸ್ತಿ ಗೆದ್ದ ಇಟಲಿಯ ಮೊದಲ ಆಟಗಾರ ಎಂದೆನಿಸಿಕೊಂಡರು. 51 ವರ್ಷಗಳ ಹಿಂದೆ ಪ್ರಶಸ್ತಿ ಗೆದ್ದ ನಿಕೋಲ ಪೀಟ್ರಂಗೆಲಿ ಸಮ್ಮುಖದಲ್ಲೇ ನಡೆದ ಫೈನಲ್‌ ಪಂದ್ಯದ ಆರಂಭದಲ್ಲೇ ಫಾಗ್ನಿನಿ ಹಿಡಿತ ಸಾಧಿಸಿದರು. 44 ನಿಮಿಷಗಳಲ್ಲಿ ಮೊದಲ ಸೆಟ್‌ನಲ್ಲಿ ಗೆಲುವು ಸಾಧಿಸಿದರು.

ಎರಡನೇ ಸೆಟ್‌ನ ಆರಂಭದಲ್ಲಿ ಸ್ವಲ್ಪ ಪ್ರತಿರೋಧ ಎದುರಾದರೂ ಛಲ ಬಿಡದ ಅವರು ಗೆದ್ದು ಪ್ರಶಸ್ತಿ ತಮ್ಮದಾಗಿಸಿಕೊಂಡರು.