ಅಂಧರ ವಿಶ್ವ ಮಹಿಳಾ ಮತ್ತು ಜೂನಿಯರ್ ಚೆಸ್‌ | ಮುನ್ನಡೆಯಲ್ಲಿ ಲಿಸೆಂಕೊ ಲುಬೊವ್
ಬೆಂಗಳೂರು: 12ನೇ ಐಬಿಎಸ್‌ಎ ಅಂಧ ಮತ್ತು ದೃಷ್ಟಿದೋಷವುಳ್ಳವರ ಮಹಿಳಾ ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಆಡುತ್ತಿರುವ 20 ಮಂದಿಯಲ್ಲಿ ಕೆಲವರು 60 ವರ್ಷ ಮೀರಿದ ಆಟಗಾರ್ತಿಯರು. ಆದರೆ ಉತ್ಸಾಹದಲ್ಲಿ, ಕೌಶಲದಲ್ಲಿ ಅವರು ಕಡಿಮೆಯಿಲ್ಲ. 12ನೇ ಐಬಿಎಸ್‌ಎ ಅಂಧ ಮತ್ತು ದೃಷ್ಟಿದೋಷವುಳ್ಳವರ ಮಹಿಳಾ ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಅಗ್ರಸ್ಥಾನದಲ್ಲಿರುವ ಆಟಗಾರ್ತಿ ಝಿಲ್ಟ್‌ಝೋವಾ ಲಿಸೆಂಕೊ ಲುಬೊವ್ ಅವರ ವಯಸ್ಸು 68!
ಉಕ್ರೇನ್‌ನ ಲುಬೊವ್ ಅವರು ಸೋಮವಾರ, ನಾಲ್ಕನೇ ಸುತ್ತಿನ ನಂತರ ಗರಿಷ್ಠ ನಾಲ್ಕು ಅಂಕ ಗಳಿಸಿದ್ದು ಒಂಟಿಯಾಗಿ ಮುನ್ನಡೆಗೇರಿದ್ದಾರೆ. ಸಮೀಪದ ಸ್ಪರ್ಧಿಗಳಿಗಿಂತ ಒಂದು ಪೂರ್ಣ ಪಾಯಿಂಟ್ ಮುನ್ನಡೆ ಪಡೆದಿರುವ ಅವರು ಆಡುತ್ತಿರುವ ಆಟ ನೋಡಿದರೆ, ಅವರು ಮತ್ತೊಮ್ಮೆ ಪ್ರಶಸ್ತಿ ಹಾದಿಯಲ್ಲಿದ್ದಂತೆ ಕಾಣುತ್ತಿದೆ.
ಅವರು ನಾಲ್ಕನೇ ಸುತ್ತಿನಲ್ಲಿ ಎರಡನೇ ಶ್ರೇಯಾಂಕದ ಎಜೆಮನ್ ಎಮಿಲಿಯಾ (ಪೋಲೆಂಡ್‌) ಅವರನ್ನು ಸೋಲಿಸಿದರು. ಪೋಲೆಂಡ್‌ನ ಟ್ರಿಜನ್‌ಸ್ಕಾ ಎಮಿಲಿಯಾ, ಕಜಕಸ್ತಾನದ ಮುರಟೊವಾ ಅಲಿಯಾ, ಅಮೆರಿಕದ ಲೌಸರ್ ಜೆಸಿಕಾ ಅವರು ತಲಾ ಮೂರು ಪಾಯಿಂಟ್ಸ್ ಪಡೆದು ಎರಡನೇ ಸ್ಥಾನ ಹಂಚಿಕೊಂಡಿದ್ದಾರೆ.
ಇಂದು ಎರಡು ಸುತ್ತಿನ ಪಂದ್ಯಗಳು ನಡೆದವು. ಮಂಗಳವಾರ ಟೂರ್ನಿಗೆ ವಿಶ್ರಾಂತಿಯ ದಿನ. ಇನ್ನೂ ನಾಲ್ಕು ಸುತ್ತುಗಳ ಆಟ ಬಾಕಿಯಿದೆ.
ವಿಶ್ವ ಜೂನಿಯರ್ (19 ವರ್ಷದೊಳಗಿನವರ) ವಿಭಾಗದಲ್ಲಿ ಹಾಲಿ ಚಾಂಪಿಯನ್, ಪೋಲೆಂಡ್‌ನ ರೇಸಿಸ್‌ ಮೈಕೆಲ್ (3.5) ಮುನ್ನಡೆಯಲ್ಲಿದ್ದಾರೆ. ಅವರು ಭಾರತದ ಜಾನ್ ಹ್ಯಾರಿಸ್ ಸುಜಿನ್ (2.5) ವಿರುದ್ಧ ಜಯಗಳಿಸಿದರು. ಇಬ್ಬರು– ಎರಡನೇ ಶ್ರೇಯಾಂಕದ ಸಾಲೊಮನ್ ಜೂಲಿಯಾ (ಪೋಲೆಂಡ್‌) ಮತ್ತು ಕಜಕಸ್ತಾನದ ಕುವಾನ್ಶುಲಿ ನುರ್ಗಿಸ ತಲಾ ಮೂರು ಪಾಯಿಂಟ್ಸ್ ಗಳಿಸಿದ್ದು ಎರಡನೇ ಸ್ಥಾನದಲ್ಲಿದ್ದಾರೆ. ನುರ್ಗಿಸ, ಭಾರತದ ರಾಹುಲ್ ವಘೇಲಾ (1.5) ವಿರುದ್ಧ ಜಯಗಳಿಸಿದರು. ಜೂಲಿಯಾ, ಸ್ಲೊವೇನಿಯಾದ ಗ್ರಾಡಿಸೆಕ್‌ ಬೊರ್‌ (2.5) ಜೊತೆ ಡ್ರಾ ಮಾಡಿಕೊಂಡರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.