‘ಜಿ14’ ಬಿಡುಗಡೆ ಮಾಡಿದ ಮೋಟೊರೊಲಾ

ಬೆಂಗಳೂರು: ಮೋಟೊರೊಲಾ ಕಂಪನಿಯು ‘ಜಿ’ ಸರಣಿಯಲ್ಲಿ ಹೊಸ ಸ್ಮಾರ್ಟ್‌ಫೋನ್‌ ಬಿಡುಗಡೆ ಮಾಡಿದೆ. ‘ಮೋಟೊ ಜಿ14’ ಹೆಸರಿನ ಈ ಸ್ಮಾರ್ಟ್‌ಫೋನ್‌ ಪ್ರೀಮಿಯಂ ವಿನ್ಯಾಸ ಹೊಂದಿದ್ದು, ಈ ಶ್ರೇಣಿಯ ಇತರ ಸ್ಮಾರ್ಟ್‌ಫೋನ್‌ಗಳಿಗಿಂತ ಭಿನ್ನವಾಗಿ ನಿಲ್ಲುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ.

ಇದು 6.5 ಇಂಚಿನ ಪರದೆಯನ್ನು ಹೊಂದಿದೆ. ವಾತಾವರಣದಲ್ಲಿನ ಬೆಳಕು ಕಡಿಮೆ ಇದ್ದಾಗ, ಕಣ್ಣಿಗೆ ತ್ರಾಸವಾಗದಂತೆ ಇದು ನೋಡಿಕೊಳ್ಳುತ್ತದೆ. 4 ಜಿಬಿ ರ್‍ಯಾಮ್‌ ಹೊಂದಿರುವ ಈ ಸ್ಮಾರ್ಟ್‌ಫೋನ್‌ನಲ್ಲಿ 128 ಜಿಬಿ ಆಂತರಿಕ ಮೆಮೊರಿ ಇದೆ. ಇದನ್ನು ಮೈಕ್ರೊ ಎಸ್‌ಡಿ ಕಾರ್ಡ್‌ ಬಳಸಿ 1 ಟಿ.ಬಿ.ವರೆಗೆ ವಿಸ್ತರಿಸಿಕೊಳ್ಳುವ ಅವಕಾಶ ಇದೆ. ಅಲ್ಲದೆ, ಎರಡು ಸಿಮ್‌ ಸ್ಲಾಟ್ ಇದರಲ್ಲಿ ಲಭ್ಯವಿದೆ.

ಈ ಸ್ಮಾರ್ಟ್‌ಫೋನ್‌ 5000 ಎಂಎಎಚ್ ಸಾಮರ್ಥ್ಯದ ಬ್ಯಾಟರಿಯನ್ನು ಹೊಂದಿದೆ. ‘ಜಿ ಸರಣಿಯ ಸ್ಮಾರ್ಟ್‌ಫೋನ್‌ಗಳ ಮೂಲಕ ನಾವು, ಎಲ್ಲರಿಗೂ ಪ್ರೀಮಿಯಂ ಅನುಭವ ನೀಡುವ ಸ್ಮಾರ್ಟ್‌ಫೋನ್‌ಗಳು ಸಿಗುವಂತೆ ಮಾಡುವ ಉದ್ದೇಶ ಹೊಂದಿದ್ದೇವೆ’ ಎಂದು ಮೋಟೊರೊಲಾ ಏಷ್ಯಾ ಪ್ಯಾಸಿಫಿಕ್ ವಿಭಾಗದ ಕಾರ್ಯನಿರ್ವಾಹಕ ನಿರ್ದೇಶಕ ಪ್ರಶಾಂತ್ ಮಣಿ ಹೇಳಿದ್ದಾರೆ.