ಶುಭಮನ್ ಗಿಲ್–ಸಾರಾ ತೆಂಡೂಲ್ಕರ್ ಬೆನ್ನುಬಿದ್ದ ಡೀಪ್‌ಫೇಕ್‌!

ಬೆಂಗಳೂರು: ಇಂಟರ್‌ನೆಟ್ ಲೋಕದಲ್ಲಿ ಡೀಪ್‌ಫೇಕ್ ಎಂಬ ಮಾಯಾಜಾಲ ಇತ್ತೀಚಿಗೆ ಹೆಚ್ಚು ಸದ್ದು ಮಾಡುತ್ತಿದ್ದು, ನಟ–ನಟಿಯರಿಗೆ, ಸೆಲಿಬ್ರಿಟಿಗಳಿಗೆ, ಕ್ರಿಕೆಟ್ ಆಟಗಾರರಿಗೆ ಇದರಿಂದ ತುಂಬಾ ಮುಜುಗರವಾಗುತ್ತಿದೆ.

ಇತ್ತೀಚೆಗಷ್ಟೇ ನಟಿ ರಶ್ಮಿಕಾ ಮಂದಣ್ಣ ಅವರ ಡೀಪ್‌ಫೇಕ್ ವಿಡಿಯೊ ಸಾಕಷ್ಟು ಸದ್ದು ಮಾಡಿ, ಕಡೆಗೆ ಆ ವಿಷಯ ಕೇಂದ್ರ ಸರ್ಕಾರದ ಐಟಿ ಇಲಾಖೆಯ ಗಮನಕ್ಕೂ ಹೋಗಿ ಕ್ರಮದ ಮಾತಾಯಿತು..

ಇದೀಗ ಈ ಡೀಪ್‌ಫೇಕ್ ಎಂಬ ಕೆಟ್ಟ ನಡೆ ಟೀಂ ಇಂಡಿಯಾದ ಉದಯೋನ್ಮುಖ ಬ್ಯಾಟರ್ ಶುಭಮನ್ ಗಿಲ್‌ ಹಾಗೂ ಸಚಿನ್ ತೆಂಡೂಲ್ಕರ್ ಮಗಳು ಮತ್ತು ರೂಪದರ್ಶಿ ಸಾರಾ ತೆಂಡೂಲ್ಕರ್ ಅವರಿಗೂ ತಟ್ಟಿದ್ದು, ಕಿಡಿಗೇಡಿಗಳು ಅವರ ಬೆನ್ನುಬಿದ್ದಿದ್ದಾರೆ.

ಈಗಾಗಲೇ ಕ್ರಿಕೆಟ್ ಹಾಗೂ ಬಾಲಿವುಡ್ ವಲಯದಲ್ಲಿ ಈ ಇಬ್ಬರ ಬಗ್ಗೆ ರೂಮರ್ ಇದೆ. ಸಾರಾ –ಶುಭಮನ್ ಲವ್ ಮಾಡುತ್ತಿದ್ದಾರೆ ಎನ್ನುವ ಮಾತಿದೆ. ಆದರೆ ಯಾರೊಬ್ಬರೂ ಬಹಿರಂಗವಾಗಿ ಹೇಳಿಕೊಂಡಿಲ್ಲ. ಅದು ಅವರ ಖಾಸಗಿತನ.

ಆದರೆ, ಈ ಸಾಮಾಜಿಕ ಜಾಲತಾಣದಲ್ಲಿರುವ ಕುಚೋದ್ಯೋಗಿಗಳು ಅವರನ್ನು ಬೆಂಬಿಡದೇ ಕಾಡುತ್ತಿದ್ದಾರೆ. ಡೀಪ್‌ಫೇಕ್ ಕುತಂತ್ರಜ್ಞಾನ ಬಳಸಿಕೊಂಡು ಸಾರಾ–ಶುಭಮನ್ ಫೋಟೊ ಜೋಡಿಸಿ ಇಬ್ಬರೂ ಡೇಟಿಂಗ್ ನಡೆಸುತ್ತಿದ್ದಾರೆ ಎಂದು ಹುಯಿಲೆಬ್ಬಿಸುತ್ತಿದ್ದಾರೆ.

ಅಸಲಿಗೆ ಆ ಫೋಟೊ ಸಾರಾ ಅವರು ಸಹೋದರ ಅರ್ಜುನ್ ತೆಂಡೂಲ್ಕರ್ ಅವರ ಜೊತೆಗಿರುವ ಫೋಟೊ. ಕಿಡಿಗೇಡಿಗಳು ಅದನ್ನೇ ಡೀಪ್‌ಫೇಕ್ ಮಾಡಿದ್ದಾರೆ.

ಇತ್ತಿಚಿಗೆ ನಟಿ ಕತ್ರಿನಾ ಕೈ‍ಫ್ ಅವರನ್ನೂ ಡೀಪ್‌ಫೇಕ್ ಮಾಡಲಾಗಿತ್ತು. ಅಶ್ಲೀಲವಾಗಿ ಅವರ ಫೋಟೊವನ್ನು ತಿರುಚಿ ಹರಿಬಿಡಲಾಗಿತ್ತು.