ಇನ್‌ಸ್ಟಾಗ್ರಾಮ್‌ ರೀಲ್ಸ್ ಸ್ಟಾರ್ ಕಿಲಿ ಪಾಲ್ ಮೇಲೆ ಅಪರಿಚಿತರಿಂದ ದಾಳಿ

ಬೆಂಗಳೂರು: ಸಾಮಾಜಿಕ ಜಾಲತಾಣ ಇನ್‌ಸ್ಟಾಗ್ರಾಮ್‌ನಲ್ಲಿ ವಿಶೇಷ ಹವಾ ಸೃಷ್ಟಿಸಿರುವ ತಾಂಜಾನಿಯಾದ ಯುವಕ ಕಿಲಿ ಪಾಲ್ ಮೇಲೆ ಅಪರಿಚಿತರು ಹಲ್ಲೆ ನಡೆಸಿದ್ದಾರೆ.

ತಮ್ಮ ಮೇಲೆ ಹಲ್ಲೆ ನಡೆದಿರುವ ಬಗ್ಗೆ ಕಿಲಿ ಪಾಲ್‌ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.

‘ಹೊರಗಡೆ ಹೋಗಿದ್ದಾಗ, ಅಪರಿಚಿತರು ನನ್ನ ಮೇಲೆ ಚೂರಿ ಮತ್ತು ದೊಣ್ಣೆಯಿಂದ ಹಲ್ಲೆ ನಡೆಸಿದ್ದಾರೆ. ಇದರಿಂದ ನನ್ನ ಕೈಬೆರಳಿಗೆ ಗಾಯವಾಗಿದೆ. ಆದರೆ ಅವರಿಂದ ತಪ್ಪಿಸಿಕೊಂಡು ಬಂದಿದ್ದೇನೆ‘ ಎಂದು ಕಿಲಿ, ಇನ್‌ಸ್ಟಾಗ್ರಾಮ್‌ ಸ್ಟೋರೀಸ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ಕಿಲಿ ಪಾಲ್ ಅವರಿಗೆ ಇನ್‌ಸ್ಟಾಗ್ರಾಮ್‌ನಲ್ಲಿ 36 ಲಕ್ಷಕ್ಕೂ ಅಧಿಕ ಫಾಲೋವರ್ಸ್ ಇದ್ದಾರೆ. ಕಿಲಿ ಸಹೋದರಿ ನೀಮಾ ಪಾಲ್ ಕೂಡ, ಹಲವು ವಿಡಿಯೊಗಳಲ್ಲಿ ಕಿಲಿ ಜತೆ ಕಾಣಿಸಿಕೊಂಡು ಗಮನ ಸೆಳೆದಿದ್ದಾರೆ.

ಇತ್ತೀಚೆಗೆ, ತಾಂಜಾನಿಯದಲ್ಲಿರುವ ಭಾರತ ರಾಯಭಾರ ಕಚೇರಿ, ಕಿಲಿ ಅವರನ್ನು ಸನ್ಮಾನಿಸಿತ್ತು. ಭಾರತೀಯ ಸಿನಿಮಾ ಹಾಡುಗಳನ್ನು ಅನುಕರಿಸುವ ಮೂಲಕ ಕಿಲಿ, ಅಲ್ಲಿಯೂ ಬಾಲಿವುಡ್ ಮತ್ತು ದಕ್ಷಿಣ ಭಾರತ ಸಿನಿಮಾಗಳ ಕಂಪು ಪಸರಿಸಿದ್ದಾರೆ.