ಕೊಡು- ಕೊಳ್ಳುವ ಅನುಬಂಧ
ಶ್ರಾವಣ ಮಾಸ ಬಂತೆಂದರೆ ಹೆಣ್ಣು ಮಕ್ಕಳಿಗೆ ಇನ್ನಿಲ್ಲದ ಸಂಭ್ರಮ. ಮದುವೆ ಆದವರಿಗಂತೂ ಪಂಚಮಿ ಅಥವಾ ರಾಖಿ ಹಬ್ಬದ ನೆಪದಲ್ಲಿ ತವರಿಗೆ ಹೋಗಿ ತಂದೆ-ತಾಯಿ, ಸಹೋದರ-ಸಹೋದರಿಯರನ್ನು ಭೇಟಿ ಮಾಡಿ ಬಾಯ್ತುಂಬಾ ಮಾತನಾಡುವ, ಸುಖ-ದುಃಖ, ನೋವು-ನಲಿವುಗಳನ್ನು ಹಂಚಿಕೊಳ್ಳುವ ತವಕ.
| ರಾಖಿ ಹಿನ್ನೆಲೆ ಅರಿಯಿರಿ ರಾಣಿ ಕರವಂತಿಯು ತನ್ನ ರಾಜ್ಯದ ಮೇಲೆ ದಂಡೆತ್ತಿ ಬಂದ ಹುಮಾಯೂನ್‌ಗೆ ರಾಖಿಯನ್ನು ಉಡುಗೊರೆಯಾಗಿ ಕಳುಹಿಸಿದ್ದಳು. ಅದರ ಬಂಧನಕ್ಕೆ ಒಳಗಾದ ಆತ ತನ್ನ ನಿರ್ಧಾರವನ್ನೇ ಬದಲಿಸಿ ಕರವಂತಿಯನ್ನು ತಂಗಿಯನ್ನಾಗಿ ಸ್ವೀಕರಿಸಿದ. ಬಳಿಕ ಆತ ಗುಜರಾತ್‌ನ ರಕ್ಷಣೆಗೆ ನಿಂತಿದ್ದು ಇತಿಹಾಸ. ಇದನ್ನು ನೆನಪಿಸಲೆಂದೇ ನೂಲು ಹುಣ್ಣಿಮೆಯನ್ನು ಸಾಂಕೇತಿಕವಾಗಿ ಆಚರಿಸಲಾಗುತ್ತದೆ. |
ಬಾಲ್ಯದಿಂದ ಬಂದ ಪ್ರೀತಿ ಒಲುಮೆಗಳಲ್ಲಿ ಹೆಚ್ಚಿನ ಪಾತ್ರ ವಹಿಸುವುದು ಸಹೋದರ- ಸಹೋದರಿಯರ ಪ್ರೀತಿ- ವಿಶ್ವಾಸ. ಬಾಳಿನ ಮುಂಜಾವಿನಿಂದ ಅಂತಿಮ ಪಯಣದವರೆಗೂ ಜೊತೆಯಾಗಿ ಬರುವ ಈ ಬಾಂಧವ್ಯದ ಸವಿ ವರ್ಣನಾತೀತ.
ಒಂದೇ ಕುಟುಂಬ, ಒಂದೇ ರಕ್ತ, ಒಂದೇ ಬಗೆಯ ಒಡನಾಟ- ಹವ್ಯಾಸಗಳನ್ನು ಹೊಂದಿರುವ ಈ ಸಂಬಂಧಕ್ಕೆ ಬೇರೆ ಸಂಬಂಧಗಳು ಸಾಟಿಯಾಗುವುದೇ ಇಲ್ಲ.
ಒಡಹುಟ್ಟಿದವರು ಬಾಹ್ಯ ಪ್ರಪಂಚಕ್ಕೆ ಎಷ್ಟೇ ದೊಡ್ಡವರಾದರೂ ಆಂತರ್ಯದಲ್ಲಿ ಒಬ್ಬರಿಗೊಬ್ಬರು `ಕಿರಿಯ'ರೇ. ಬಾಲ್ಯದಲ್ಲಿ ಉಡುಗೆ-ತೊಡುಗೆಗೆ, ಆಟದ ಸಾಮಾನುಗಳಿಗೆ, ತಿಂಡಿ-ತೀರ್ಥಕ್ಕೆ, ಕೊನೆಗೆ ಪೋಷಕರ ಪ್ರೀತಿಗೂ ಪ್ರತಿಸ್ಪರ್ಧಿಗಳಾಗುತ್ತಿದ್ದ ಈ ಎರಡು ಜೀವಗಳು `ಕಳೆದು'ಕೊಳ್ಳುವುದಕ್ಕಿಂತ `ಹಂಚಿ'ಕೊಳ್ಳುವುದೇ ಅಧಿಕ.
ಬೈಯ್ದುಕೊಂಡು, ಹೊಡೆದಾಡಿಕೊಂಡು ಬೆಳೆಯುವ ಸಹೋದರಿ- ಸಹೋದರರ ನಡುವೆ, ಅವರಿಗೇ ಅರಿವಿಲ್ಲದಂತೆ ಗಾಢವಾದ ಒಲುಮೆಯೂ ಬೆಳೆಯುತ್ತಿರುತ್ತದೆ. `ಇವನು ನನ್ನ ಸಾಮಾನು ಮುಚ್ಚಿಟ್ಟ', `ಇವಳು ನನ್ನ ಸಾಮಾನು ಉಪಯೋಗಿಸಿದ್ದಾಳೆ' ಎಂದು ಕ್ಷುಲ್ಲಕ ಕಾರಣಗಳಿಗೆ ಮನೆಯನ್ನು ರಣಾಂಗಣ ಮಾಡಿಕೊಳ್ಳುವ ಈ ಎರಡು ಜೀವಗಳು, ಕಾಲ ಸಂದಂತೆ ತಮ್ಮಲ್ಲಿ ಇರುವುದರಲ್ಲೇ ಇನ್ನೊಬ್ಬರಿಗೆ ಧಾರಾಳವಾಗಿ ಹಂಚಿಕೊಟ್ಟು ಜೀವನದುದ್ದಕ್ಕೂ ಒಬ್ಬರಿಗೊಬ್ಬರು ಆಧಾರವಾಗಿ ಧನ್ಯತೆಯನ್ನು ಪಡೆಯುತ್ತಾರೆ!
ಹೀಗೆ ಒಂದೆಡೆ `ಸಹೋದರ- ಸಹೋದರಿ'ಯರ ಅದ್ಭುತವಾದ ಒಲುಮೆ ಕಂಡುಬಂದರೆ, ಮತ್ತೊಂದೆಡೆ ವಿರಸವೆಂಬ ವಿಷದ ವರ್ತುಲದಲ್ಲಿ ಬೇಯುತ್ತಿರುವ 'ದಾಯಾದಿ'ಗಳೂ ಇದ್ದಾರೆ. ಲೌಕಿಕ ಆಮಿಷಗಳಿಗೇ ಹೆಚ್ಚು ಬೆಲೆ ಕೊಡುವ ಕೆಲವರು ತಮ್ಮ ರಕ್ತಸಂಬಂಧಿಯನ್ನೇ ತ್ಯಜಿಸುವುದು ವಿಪರ್ಯಾಸ.
ಅಣ್ಣ-ತಮ್ಮ, ಅಕ್ಕ- ತಂಗಿಯರನ್ನು ಪಡೆದ ಜೀವಿಗಳೇ ಅದೃಷ್ಟವಂತರು. ಭೂಮಿಯ ಮೇಲೆ ನೆಲೆಸಿರುವ ಪ್ರತಿ ಸಂಬಂಧಕ್ಕೂ ಒಂದು ಅರ್ಥವಿರುತ್ತದೆ ಹಾಗೂ ಅದರ ಅವಶ್ಯಕತೆಯೂ ಇರುತ್ತದೆ.
ಅಂತಹ ಸಂಬಂಧಗಳಲ್ಲಿ ಮಹತ್ವವಾದ ಸಹೋದರ- ಸಹೋದರಿಯರ ಸಂಬಂಧ ಕೇವಲ ಒಂದು ಹಬ್ಬ ಅಥವಾ ಆಚರಣೆಯೊಂದಿಗೆ ಸೇರಿ ಹೋಗುವುದು ಬೇಡ. ಅದು ಪ್ರತಿ ದಿನವೂ ಹೊಚ್ಚ ಹೊಸದಾಗಿ ಸಂಭ್ರಮಿಸುವ ಮಹೋತ್ಸವ ಆಗಬೇಕು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.