ಪ್ರೀತಿಗಿಂತ ದೊಡ್ಡ ಶಕ್ತಿ ಯಾವುದೂ ಇಲ್ಲ: ಮದುವೆಯ ನಂತರ ಬದುಕು ಮುಗಿಯದು....

ದಕ್ಷಿಣ ಕನ್ನಡದ ಪುತ್ತೂರಿನಿಂದ ಪುಣೆಯಲ್ಲಿ ನಡೆದ ಮಿಸ್ಸೆಸ್‌ ಇಂಡಿಯಾ ಕೋ–ಪೆಜೆಂಟ್ ಸ್ಪರ್ಧೆಯಲ್ಲಿ ಎರಡನೇ ರನ್ನರ್ ಅಪ್‌ ಪ್ರಶಸ್ತಿಯ ತನಕದ ನನ್ನ ಪಯಣ, ಒಂದು ಪ್ರೀತಿಯ ಪಯಣ.

ಚಿಕ್ಕಂದಿನಿಂದಲೂ ನನಗೆ ಸೌಂದರ್ಯ, ಅಲಂಕಾರ, ಪ್ರಸಾದನ, ಉಡಿಗೆತೊಡಿಗೆ... ಇಂಥದ್ದರ ಬಗೆಗೆಲ್ಲಾ ಹೆಚ್ಚು ಪ್ರೀತಿ. ಆದರೆ, ಯಾವುದೇ ಮಧ್ಯಮ ವರ್ಗದ ಸಾಂಪ್ರದಾಯಿಕ ಕುಟುಂಬಗಳಲ್ಲಿರುವಂತೆ ನಮ್ಮ ಮನೆಯಲ್ಲಿಯೂ ಸೌಂದರ್ಯ ಸ್ಪರ್ಧೆಗಳ ಬಗ್ಗೆ ಮಡಿವಂತಿಕೆ. ಹೀಗಾಗಿ, ‘ಈಗ ಅದೇನೂ ಬೇಡ. ಮೊದಲು ಓದು’ ಅಂದರು. ಕಂಪ್ಯೂಟರ್ ಸೈನ್ಸ್‌ ಎಂಜಿನಿಯರಿಂಗ್‌ ಮುಗಿಸಿದೆ. ಆಮೇಲೆ? ‘ಒಂದೊಳ್ಳೇ ಕೆಲಸ ಹಿಡಿ, ಸ್ವಾವಲಂಬನೆ ಮುಖ್ಯ’ ಎನ್ನುವ ಬುದ್ಧಿವಾದ. ಯುಎಸ್‌ ಮೂಲದ ಐಟಿ ಕಂಪನಿಯೊಂದರಲ್ಲಿ ಟೆಕ್ನಿಕಲ್‌ ಮ್ಯಾನೇಜರ್‌ ಆಗಿ ಸೇರಿಕೊಂಡೆ. ಈಗಲಾದರೂ...? ‘ಇಲ್ಲ, ಮೊದಲು ಮದುವೆಯಾಗು, ಆಮೇಲೆ ನಿನಗೆ ಹೇಗೆ ಬೇಕೊ ಹಾಗಿರು’ ಅಂದರು ಅಪ್ಪ. ಇದಂತೂ ಪ್ರತಿ ಮನೆಯಲ್ಲಿ ಹೆಣ್ಣುಮಕ್ಕಳಿಗೆ ಪೋಷಕರು ಹೇಳುವ ಖಾಯಂ ಕಿವಿಮಾತು. ಮದುವೆಯಾಗಿ ಸಂಸಾರದಲ್ಲಿ ಬಿದ್ದ ಮೇಲೆ ಬೇರೆ ಏನನ್ನೂ ಮಾಡಲಾರರು ಅಂತ ಪೋಷಕರು ಅಂದುಕೊಂಡಿರುತ್ತಾರೆ. ಬಹಳಷ್ಟು ಹೆಣ್ಣುಮಕ್ಕಳೂ ಅದನ್ನೇ ನಿಜ ಮಾಡುತ್ತಾರೆ. ಮದುವೆಯಾಯಿತು ಎನ್ನುವ ಕಾರಣಕ್ಕೆ ನಮ್ಮನ್ನು, ನಮ್ಮ ಬದುಕನ್ನು, ನಮ್ಮ ಕನಸನ್ನು ಕೈಬಿಡಬೇಕು ಎಂದೇನೂ ಇಲ್ಲ. ಹೊಸ ಬದುಕು, ಹೊಸ ಜವಾಬ್ದಾರಿಗಳನ್ನು ಪ್ರೀತಿಸುತ್ತಲೇ ನಮ್ಮ ಕನಸನ್ನು ಪೊರೆಯಬೇಕಾಗುತ್ತದೆ. ನಾನು ಮಾಡಿದ್ದೂ ಅದೇ.

ಪ್ರೀತಿಯ ಹಿಂದೆ ಹೋದವರು ಸೋತಿಲ್ಲ...

ಪ್ರೀತಿ ಯಾವತ್ತೂ ಸೋಲಿಸುವುದಿಲ್ಲ; ಗೆಲ್ಲಿಸುತ್ತದೆ. ಅದು ವ್ಯಕ್ತಿ ಪ್ರೀತಿಯಾಗಿರಲಿ, ಸ್ವಪ್ರೀತಿಯಾಗಿರಲಿ, ನಮ್ಮ ಕನಸು, ನಮ್ಮ ಬದುಕಿನ ಮೇಲಿನ ಪ್ರೀತಿಯೇ ಆಗಿರಲಿ. ಮದುವೆಯಾಗಿ, ಗಂಡ, ಮನೆ, ಮಗು, ವೃತ್ತಿಯ ನಡುವೆ ಕಳೆದು ಹೋದ ನನ್ನನ್ನು ಆಗಾಗ ನನ್ನ ಕನಸು ಎಚ್ಚರಿಸುತ್ತಲೇ ಇತ್ತು. ಇದಿಷ್ಟೇ ನನ್ನ ಬದುಕಲ್ಲ. ನನ್ನ ಖುಷಿ, ನೆಮ್ಮದಿ ಇನ್ನೆಲ್ಲೊ ಇದೆ ಎನ್ನುವ ಭಾವ ಆಗಾಗ ಮೀಟುತ್ತಲೇ ಇತ್ತು. ಹೆರಿಗೆ ರಜೆಯಲ್ಲಿದ್ದಾಗ ಮೇಕಪ್‌ ಆರ್ಟಿಸ್ಟ್‌ ಕೋರ್ಸ್‌ ಮಾಡಿದೆ. ನಾನು ಮೇಕಪ್‌ ಮಾಡಿದ ಯುವತಿಯರ ಕಣ್ಣಲ್ಲಿ ಖುಷಿ ನೋಡಿದಾಗ ನಾನೂ ಆ ಖುಷಿಯನ್ನು ಅನುಭವಿಸುತ್ತಿದ್ದೆ. ನನ್ನೊಳಗಿನ ಸೌಂದರ್ಯ ಪ್ರಜ್ಞೆ ಮರುಹುಟ್ಟು ಪಡೆಯಲಾರಂಭಿಸಿತ್ತು. ಅವರನ್ನು ಚಂದಗೊಳಿಸುತ್ತ, ನಾನೂ ಚಂದವಾಗುವುದನ್ನು ಕಲಿತೆ.

ಸೌಂದರ್ಯ ಒಂದು ಶಕ್ತಿ. ನಾನು ಸುಂದರವಾಗಿದ್ದೀನಿ, ಸುಂದರವಾಗಿರಬೇಕು ಎನ್ನುವ ಭಾವವೇ ಚೈತನ್ಯವನ್ನು ನೀಡುವಂತದ್ದು. ಮದುವೆ, ಗರ್ಭಾವಸ್ಥೆ, ಹೆರಿಗೆಯ ನಂತರ ಮತ್ತೆ ಯಾವಾಗ ನಾನು ಸೌಂದರ್ಯದತ್ತ ಗಮನ ಕೊಡಲು ಆರಂಭಿಸಿದೆನೊ ಆಗ ನನ್ನೊಳಗಿನ ಶಕ್ತಿಯೂ ವೃದ್ಧಿಸಿದಂತಹ ಅನುಭವ. ನನ್ನ ಕನಸೂ ಮತ್ತೆ ನಳನಳಿಸಿದ್ದು ಆಗಲೇ.

ಸ್ಫೂರ್ತಿ ಒಳಗೇ ಇದೆ

ಅನೇಕ ಸಲ ಸಾಧನೆಗೆ ಹೊರಗಿನಿಂದ ಸ್ಫೂರ್ತಿಯನ್ನು ಹುಡುಕಿ ಸೋಲುತ್ತೇವೆ. ಆದರೆ ನಿಜವಾದ ಸ್ಫೂರ್ತಿ ನಮ್ಮೊಳಗಿನಿಂದಲೇ ಬರಬೇಕು. ಅದನ್ನು ನಾವೇ ಹುಡುಕಿಕೊಳ್ಳಬೇಕು. ನಾನು ಮಾಡಿದ್ದೂ ಅಷ್ಟೇ. ನನ್ನೊಳಗೆ ಹುದುಗಿ ಮರೆಯಾಗಿದ್ದ ಸ್ಫೂರ್ತಿಗೆ ಉತ್ತೇಜನ ಕೊಟ್ಟೆ. ಅದು ನನ್ನನ್ನು ನನ್ನ ಕನಸಿನ ದಾರಿಗೆ ಕರೆದುಕೊಂಡು ಹೋಯಿತು.

ಕುಟುಂಬವೇ ದೊಡ್ಡ ಶಕ್ತಿ

ಒಂದು ಹೆಣ್ಣಿಗೆ ಸಾಧನೆಯ ಹಾದಿಯಲ್ಲಿ ಕುಟುಂಬವೇ ದೊಡ್ಡ ಶಕ್ತಿ. ಆರಂಭದಲ್ಲಿ ನನ್ನ ಕನಸಿಗೆ ಬ್ರೇಕ್‌ ಹಾಕಿದ್ದ ಅಪ್ಪ ಮೋಹನ್‌ ಹಾಗೂ ಅಮ್ಮ ಗುಣವತಿ ನಂತರದಲ್ಲಿ ಅದೇ ಕನಸನ್ನು ಪೋಷಿಸಲೂ ನೆರವಾದರು. ನನ್ನ ಮೇಲೆ ಜವಾಬ್ದಾರಿ ಹೆಚ್ಚಿದಾಗ, ನಾನು ಕಾರ್ಯನಿಮಿತ್ತ ಬೇರೆ ಊರುಗಳಿಗೆ ಹೋಗಬೇಕಾಗಿ ಬಂದಾಗ ಒಂದೇ ಕರೆಗೆ ಅಮ್ಮ ಓಡಿ ಬರದೇ ಹೋಗಿದ್ದರೆ ಇವತ್ತು ಇಷ್ಟೆಲ್ಲಾ ಸಾಧ್ಯವಾಗುತ್ತಿರಲಿಲ್ಲ. ಈ ಕ್ಷೇತ್ರದ ಬಗ್ಗೆ ಸಣ್ಣ ಕಳವಳವನ್ನಿಟ್ಟುಕೊಂಡ ಪತಿ ಅರ್ಜುನ್‌ ಸಹ ಮೊದ ಮೊದಲು ಹಿಂದೇಟು ಹಾಕಿದರು. ಅನಂತರ ನನ್ನ ನೆರವಿಗೆ ನಿಂತದ್ದು ಈ ಸಾಧನೆಗೆ ಪೂರಕವಾಯಿತು.

ಸೌಂದರ್ಯ ಸ್ಪರ್ಧೆ ಎಂದರೆ…

ಸೌಂದರ್ಯ ಸ್ಪರ್ಧೆ ಎಂದರೆ ಅಂದ–ಚಂದ, ಮೈಮಾಟ–ಮೈಕಾಂತಿ, ಥಳಕು–ಬಳಕು, ಒನಪು–ಒಯ್ಯಾರ... ಇದಷ್ಟೇ ಅಲ್ಲ. ಬಾಹ್ಯ ಸೌಂದರ್ಯದಷ್ಟೇ ಆಂತರಿಕ ಪ್ರಭೆಯೂ ಬೇಕು. ಬದುಕನ್ನು ನೋಡುವ ನಿಮ್ಮ ದೃಷ್ಟಿಕೋನ, ಧೋರಣೆ, ಕೌಶಲ್ಯ, ನೈಪುಣ್ಯ, ಚಾತುರ್ಯ, ಮಾನವೀಯತೆ, ಮನೋಧರ್ಮ, ದೇಹದ ಭಂಗಿ ಎಲ್ಲವೂ ಮುಖ್ಯವಾಗುತ್ತದೆ. ಸೌಂದರ್ಯಸ್ಪರ್ಧೆಗೆ ಸಜ್ಜಾಗುವುದು ಎಂದರೆ ನಮ್ಮ ಒಳ–ಹೊರಗನ್ನು ನಾವು ಉದ್ದೀಪನಗೊಳಿಸಿಕೊಳ್ಳುವುದು.

ಮುಂದಿದೆ ಕನಸು

ನನ್ನ ಕನಸಿನೆಡೆ ಇದೊಂದು ಪುಟ್ಟ ಹೆಜ್ಜೆ. ಸಾಧಿಸುವುದು ಇನ್ನೂ ಮುಂದಿದೆ. ಮಿಸ್ಸೆಸ್‌ ಗ್ಲೋಬ್‌, ಮಿಸ್ಸೆಸ್‌ ಯೂನಿವರ್ಸ್‌, ಮಿಸ್ಸೆಸ್‌ ವರ್ಲ್ಡ್ ನಂತಹ ಅಂತರರಾಷ್ಟ್ರೀಯ ಸೌಂದರ್ಯ ಸ್ಪರ್ಧೆಗಳಲ್ಲಿ ಭಾರತವನ್ನು ಪ್ರತಿನಿಧಿಸಬೇಕೆನ್ನುವ ಮಹದಾಸೆ ಇದೆ. ಅದಕ್ಕೆ ನನ್ನನ್ನು ನಾನು ಸಜ್ಜುಗೊಳಿಸಿಕೊಳ್ಳುತ್ತ, ಅವಕಾಶಕ್ಕಾಗಿ ಕಾಯುವೆ.