‘ಕುಂದಲಹಳ್ಳಿ ಬಳಿ ಬ್ಯಾಗ್ ಹಿಡಿದು ನಿಂತಿದ್ದ ಶಂಕಿತ, ಬನಶಂಕರಿಯಿಂದ ಐಟಿಪಿಎಲ್‌ನತ್ತ ಹೊರಟಿದ್ದ ಬಿಎಂಟಿಸಿ ಬಸ್ ಹತ್ತಿದ್ದ. ಸಿಎಂಆರ್‌ಐಟಿ ಕಾಲೇಜು ತಂಗುದಾಣ ದಲ್ಲಿ ಇಳಿದಿದ್ದ. ನಂತರ, ಅಲ್ಲಿಂದ ನಡೆದುಕೊಂಡು ದಿ ರಾಮೇಶ್ವರಂ ಕೆಫೆಗೆ ಹೋಗಿದ್ದ. ಬಸ್ಸಿನ ಚಾಲಕ ಹಾಗೂ ನಿರ್ವಾಹಕರಿಂದ ಮಾಹಿತಿ ಪಡೆಯಲಾಗಿದೆ’ ಎಂದು ತಿಳಿಸಿದರು.
ಶಂಕಿತನನ್ನು ನೋಡಿದ್ದ ವ್ಯವಸ್ಥಾಪಕ:
ಸ್ಫೋಟದ ಬಗ್ಗೆ ಕೆಫೆಯ ಮೇಲ್ವಿಚಾರಕ ರಾಜೇಶ್ ಅವರು ದೂರು ನೀಡಿದ್ದಾರೆ. ಅಪರಾಧಿಕ ಸಂಚು, ಹಲ್ಲೆ, ಕೊಲೆಗೆ ಯತ್ನ ಆರೋಪ ಹಾಗೂ ಕಾನೂನುಬಾಹಿರ ಚಟುವಟಿಕೆಗಳ ತಡೆಗಟ್ಟುವಿಕೆ ಕಾಯ್ದೆಯಡಿ (ಯುಎಪಿಎ) ಎಚ್‌ಎಎಲ್‌ ಠಾಣೆಯಲ್ಲಿ ಎಫ್‌ಐಆರ್ ದಾಖಲಾಗಿದೆ.
‘ಪರಿಣತರಿಂದ ಬಾಂಬ್ ತಯಾರಿ’
‘ಸ್ಫೋಟದ ಸ್ಥಳದಲ್ಲಿ ಸಿಕ್ಕಿರುವ ಕಚ್ಚಾ ವಸ್ತುಗಳನ್ನು ಗಮನಿಸಿದರೆ, ಪರಿಣತರು ಬಾಂಬ್ ತಯಾರಿಸುವ ಅನುಮಾನ ವ್ಯಕ್ತವಾಗುತ್ತಿದೆ’ ಎಂದು ಪೊಲೀಸ್ ಮೂಲಗಳು ಹೇಳಿವೆ. ‘ರಾಜ್ಯದಲ್ಲಿ ಈ ಹಿಂದೆ ನಡೆದಿದ್ದ ಬಾಂಬ್ ಸ್ಫೋಟ ಪ್ರಕರಣಗಳ ಬಗ್ಗೆ ಮಾಹಿತಿ ಕಲೆಹಾಕಲಾಗುತ್ತಿದೆ. ಜೈಲಿನಲ್ಲಿರುವ ಶಂಕಿತ ಉಗ್ರರು ಹಾಗೂ ನಿಷೇಧಿತ ಸಂಘಟನೆಗಳ ಸದಸ್ಯರ ಚಲನವಲನಗಳ ಬಗ್ಗೆಯೂ ನಿಗಾ ವಹಿಸಲಾಗಿದೆ’ ಎಂದು ತಿಳಿಸಿವೆ.
‘ಮೇಲ್ಭಾಗಕ್ಕೆ ಸಿಡಿದ ಬಾಂಬ್: ತಪ್ಪಿದ ದೊಡ್ಡ ಅನಾಹುತ’
ಬಾಂಬ್ ಸ್ಫೋಟ ಸ್ಥಳಕ್ಕೆ ಭೇಟಿ ನೀಡಿ ಮಾದರಿಗಳನ್ನು ಸಂಗ್ರಹಿಸಿದ್ದ ವಿಧಿವಿಜ್ಞಾನ ಪ್ರಯೋಗಾಲಯದ ತಜ್ಞರು, ಸಿಸಿಬಿ ಪೊಲೀಸರ ಜೊತೆ ಪ್ರಾಥಮಿಕ ವರದಿ ಹಂಚಿಕೊಂಡಿದ್ದಾರೆ. ‘9 ವೋಲ್ಟ್ ಬ್ಯಾಟರಿ, ಮೊಬೈಲ್ ಸರ್ಕೀಟ್, ಟೈಮರ್ ಹಾಗೂ ಇತರೆ ಕಚ್ಚಾ ಸಾಮಗ್ರಿಗಳನ್ನು ಬಳಸಿ ಬಾಂಬ್ ತಯಾರಿಸಲಾಗಿದೆ. ಇದು ಹೆಚ್ಚು ತೀವ್ರತೆ ಇರುವ ಬಾಂಬ್. ಕೆಫೆಯಲ್ಲಿ ಮೇಲ್ಭಾಗದ ಕಡೆಗೆ ಬಾಂಬ್ ಸಿಡಿದಿದ್ದರಿಂದ ಹಾರಿದ್ದರಿಂದ, ಅಕ್ಕ–ಪಕ್ಕದಲ್ಲಿ ತೀವ್ರತೆ ಕಡಿಮೆ ಇತ್ತು. ಆಕಸ್ಮಾತ್, ಅಕ್ಕ–ಪಕ್ಕಕ್ಕೆ ಬಾಂಬ್ ಸಿಡಿದಿದ್ದರಿಂದ ದೊಡ್ಡ ಅನಾಹುತ ನಡೆಯುವ ಸಾಧ್ಯತೆ ಹೆಚ್ಚಿತ್ತು’ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
‘ಬೆಂಗಳೂರಿನಲ್ಲಿ ಕಟ್ಟೆಚ್ಚರ: ತಪಾಸಣೆ’
ಬೆಂಗಳೂರಿನ ಮೆಜೆಸ್ಟಿಕ್ ಬಸ್ ನಿಲ್ದಾಣ, ರೈಲು ನಿಲ್ದಾಣ, ಬಸ್ ತಂಗುದಾಣಗಳು ಹಾಗೂ ಜನರು ಹೆಚ್ಚು ಸೇರುವ ಸ್ಥಳಗಳಲ್ಲಿ ಬಾಂಬ್ ನಿಷ್ಕ್ರಿಯ ದಳ ಹಾಗೂ ಶ್ವಾನ ದಳದ ಸಿಬ್ಬಂದಿ ಶನಿವಾರ ತಪಾಸಣೆ ನಡೆಸಿದರು. ಮೆಜೆಸ್ಟಿಕ್, ಎಂ.ಜಿ.ರಸ್ತೆ, ಬ್ರಿಗೇಡ್ ರಸ್ತೆ, ಕಮರ್ಷಿಯಲ್ ಸ್ಟ್ರೀಟ್, ಇಂದಿರಾನಗರ, ಕೋರಮಂಗಲ ಹಾಗೂ ಇತರೆಡೆ ಅನುಮಾನಾಸ್ಪದ ವಸ್ತುಗಳನ್ನು ಪೊಲೀಸರು ಪರಿಶೀಲಿಸಿದರು.
