ಸಾಣೆ ಹಿಡಿದ ಕತ್ತರಿ ನಾಲಗೆ ಯಾವಾಗಲೂ
ಬಾಯಕಳೆದು ಚಕ ಚಕ ಆಡುತ್ತಿದೆ
ಕಲ್ಪನೆಯಂತೆ ಸಮಮೂಲೆಯ ಕತ್ತರಿಸಿ
ಚೌಕಾರಗೊಳಿಸಿದ ಎಲೆಗಳ ಓತಿದ್ದಾರೆ
ಹದವಾದ ಹರೆಯದ ಎಲೆಗಳನ್ನೇ ಆರಿಸಿ
ತಾಳದ ತೊಡೆ ಮೇಲೆ ಹೊಸೆದೊಸೆದು
ಸುರುಳಿಗಟ್ಟಿಸಿ, ಮೈತುಂಬ
ಆವೇಶದ ತಂಬಾಕು ಹುಡಿಯ ತುಂಬಿ
ತಲೆಯ ಮಡಚಿ ಮಡಚಿ ಉರಿವ ಕಣ್ಣಾಗಿಸಿ
ಬಿಚ್ಚದಂತೆ ಸೇದುವ ತುದಿಗೆ ವಿಶ್ವಾಸದ
ನೂಲ ಸುತ್ತಿ ಭದ್ರಮಾಡಿಟ್ಟಿದ್ದಾರೆ
ಬ್ರಾಂಡ್ ಬೀಡಿಗಳು ಎಲ್ಲೂ ದೊರೆಯುತ್ತವೆ
ಎಲ್ಲೆಂದರಲ್ಲಿ ನಶೆ ಹತ್ತಿಸಿ ಆವೇಶದ ಮಜಾ
ತಲೆ ತುಂಬ ಮಂಜು ಕಣ್ಣಲ್ಲಿ ವೇಷ ಭಾಷೆಯ ನಂಜು
ಸೇದುವುದು ಸೇದಿಸುವುದು ಹುಚ್ಚು ಸುಖದ ಕೇಕೆ
ಹೊಗೆಯ ಕೋಟೆಯೊಳಗೆ ರಾಜನ ಸಿಂಹಾಸನ ಭದ್ರ
ಕಬ್ಬಿನ ಗದ್ದೆಯಂತೆ ತರಗಟ್ಟಿರುವ ಊರೂರು
ಪುಡಾರಿ ಪುಂಡರ ಬೀಡಿ ನಶೆಯ ಚಟಕ್ಕೆ ಕಿಡಿಯುದುರಿ
ಕತ್ತಲ ನಾಲಗೆಯಾಗಿ ಧಗಧಗಿಸುತ್ತ ಸೌದೆ ಸಾಲಿಟ್ಟಿವೆ
ಎಲ್ಲೂ ಕೆಮ್ಮು ಕಫವಾಗಿ ಉಗಿವ ಮಾತು
ಸಪಾಟು ನೆಲದಲ್ಲೂ ಬೋರೆಹತ್ತಿದ ಆಯಾಸ
ರಕ್ತದ ವಾಂತಿ ನೆಲವೆಲ್ಲ ಭೀತಿಯ ವಾಸನೆ
ಬೆರಳಾಟದ ಬೀಡಿಗಳು ದೇಹದ ಕೊಳ್ಳಿಯಾಗಿವೆ
ನಶೆಯಲ್ಲಿ ನಕ್ಕವರು ಉಕ್ಕಿದವರು ಸೊಕ್ಕಿದವರು
ಧರ್ಮಕ್ಕೆ ತೂತು ಕೊರೆದು, ಹೆಣ್ಣುಗಳ ಕಣ್ಣ ಹಿಂಡಿ
ಚಿತೆಯ ಬೆಳಕಿನಲ್ಲಿ ಮುಖವ ತೀಡಿಕೊಂಡವರು
ಮಸಣ ವೈಭವದಲ್ಲಿ ಯೋಗ ನಿದ್ರೆಗೆ ಜಾರಿ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.